سۋرەتتى تۇسىرگەن ەرلان ومار, «ەQ»
باسىلىمدارعا جازىلىم ناۋقانى باستالار ساتتە ارنايى بۇيرىق شىعارىلىپ, بارلىق مەكەمەلەرگە حات رەتىندە جولدانادى. بۇل شارا جىلىنا ەكى مارتە ۇيىمداستىرىلعانمەن ءار اي سايىن دا جازىلىم جۇمىستارى جالعاسا بەرەدى.
الايدا قازىرگى تاڭدا باسپاسوزگە جازىلۋدا ەڭ ۇلكەن ءبىر قيىندىق ءبىلىم بەرۋ مەكەمەلەرىنە قاتىستى بولىپ وتىر. سەبەبى, «گازەت-جۋرنالعا مۇعالىمدەر مەن بالاباقشا تاربيەشىلەرىن كۇشتەپ جازدىرۋعا بولمايدى», دەگەن ەرەجەنى كولدەنەڭ تارتقان ۇجىم باسشىلارى بىزبەن وڭايلىقپەن كەلىسىمشارتقا تۇرا قويمايدى. ەكىنشىدەن اكىمدىك تاراپىنان ەشقانداي قولداۋ كورسەتىلمەيدى. كوبىنە جەكە تۇلعالاردىڭ ءوز قالاۋىنا قالدىرىپ جاتادى. سوندىقتان بيىل قاعاز باسىلىمداردىڭ تيراجى كۇرت تومەندەپ كەتتى. كوبىنە زاڭدى تۇلعالارمەن جۇمىس ىستەگەندىكتەن ولارمەن كەپىلدەمە حاتپەن جازىلىم قابىلداپ الامىز. ماسەلەن, 60 كۇن دەپ الساق, كەيدە سونىڭ ءوزى 6 ايعا سوزىلىپ كەتىپ جاتادى. بيۋدجەتتىك مەكەمەلەردەن جازىلىم اقىسى ۋاقتىلى اۋدارىلمايدى. ەسەسىنە رەداكتسيالارعا ءوز ەسەبىمىزدەن قارجىنى ۋاقتىلى اۋدارعانمەن, ەكى ورتادا ءبىز قينالىپ جاتامىز.
وبلىس كولەمىندە قازپوشتا فيليالىمەن قاتار جازىلىم جۇمىستارىن جۇرگىزەتىن 10 باسەكەلەس مەكەمە بار. ولار ءتۇرلى سىياقىلار, جەڭىلدىكتەر قاراستىرۋ ارقىلى ءبىزدىڭ جازىلۋشىلارىمىزدى وزدەرىنە تارتىپ الۋدا. دەگەنمەن, بۇرىننان بەرى ىسكەرلىك بايلانىستا جۇمىس ىستەپ كەلە جاتقان «قازاقستان تەمىر جولى, «پەتروقازاقستان» سەكىلدى ۇجىمدار ءالى دە قازپوشتا قىزمەتىنە جۇگىنۋدە.
شالعايداعى ەلدى مەكەندەرگە گازەت-جۋرنال جەتكىزۋدە باسقا مەكەمەلەر بىزگە باسەكەلەس بولا المايدى. انىعىندا, ءبىز اپتاسىنا التى رەت, كارانتين جاعدايىندا اۋداندارعا بەس رەتتەن جەتكىزۋ جۇمىسىن جولعا قويدىق. اۋىلدىق اكىمدىكتەر, بالاباقشالار, مەكتەپتەر مەن اۋرۋحانالار قازپوشتا ارقىلى جازىلادى.
ەلىمىزدىڭ باس باسىلىمى «Egemen Qazaqstan» گازەتى كۇندەلىكتى جارىق كورەتىندىكتەن, وقىرمانعا جىلدام جەتكىزۋ ءۇشىن بارىمىزدى سالامىز. سەبەبى, عاسىرلىق تاريحى بار گازەتتە ساياسي, ەكونوميكالىق, الەۋمەتتىك ماڭىزدى جاڭالىقتار, ساراپتامالار كوپتەپ جارىق كورەدى. ونى جازىلۋشى پاتشا كوڭىل وقىرمانعا جەتكىزۋ ءاربىر قازپوشتا قىزمەتكەرىنىڭ مىندەتى.
ءبىزدىڭ تۇرعىلىقتى جازىلۋشىلارىمىز ءتۇرلى مەكەمە قىزمەتكەرلەرى مەن زەينەتكەرلەر بولعاندىقتان گازەتتىڭ ۋاقتىلى جەتكەنىن باقىلاپ, كەرى بايلانىسقا شىعىپ تۇرادى. سول سەبەپتى, گازەتتىڭ وڭىردەگى تىلشىلەرى ارقىلى گازەتتىڭ كۇندەلىكتى جارىق كورگەننەن باستاپ, كەشىكپەي تارالۋىنا دەيىن قاداعالاپ وتىرامىز.
قازىرگى تاڭدا پوشتا وندىرىستىك لوگيستيكا ءبولىمىنىڭ باسشىسى بولىپ جۇمىس ىستەيمىن. بارلىق پوشتا جونەلتىمدەرىنىڭ كەلىپ-كەتۋىن, ۋاقتىلى جەتكىزىلۋىن قاداعالاپ وتىرامىز. سونداي-اق ءار اپتادا اۋدان, اۋىلدارعا 5 رەتتەن جەتكىزۋ قىزمەتىن ۇسىنامىز.
قالدىگۇل سابدەنوۆا,
«قازپوشتا» اق وڭتۇستىك قازاقستان وبلىستىق فيليالىنىڭ وندىرىستىك لوگيستيكا ءبولىمىنىڭ باسشىسى
