1990 جىلداردىڭ باسىنداعى توقىراۋ كەزەڭىندە باسپاسوزگە جازىلۋ وتە قيىن بولدى. ودان كەيىن ەل ەگەمەندىگىن العان تۇستان باستاپ, ۇلتتىق باسپاسوزگە دەگەن وقىرماننىڭ رۋحاني سۇرانىسى ارتا ءتۇستى.
پوشتا قىزمەتى ارقىلى قانشاما گازەت-جۋرنال جازىلۋشىلاردىڭ قولىنا جەتىپ جاتتى. دەيتۇرعانمەن, «حالىقتىڭ ءۇنى بولعان باسىلىمدار بىزگە ۋاقتىلى جەتپەيدى», دەگەن سىن-ەسكەرتپەلەر دە ءجيى ايتىلىپ جاتادى. بۇعان بولا بارلىق پوشتا قىزمەتكەرلەرىن ايىپتاۋعا بولمايدى. ولاردىڭ ىشىندە ءوز جۇمىسىنا دەگەن ماحابباتى وزگەشە جاندار كوپ.
42 جىلدان كەيىن زەينەتكە شىققان شاعىمدا زەينەتاقى قورىنداعى ساناقتان ءوزىمنىڭ 1993 جىلى ايلىق جالاقىمنىڭ 80 تەڭگە بولعانىن, سودان 8 تيىن زەينەتاقى قورىنا اۋدارىلىپ تۇرعاندىعىن كورىپ تاڭداندىم. سول قيىن-قىستاۋ جىلداردا از عانا جالاقىعا اتالعان سالادا تاپجىلماي ەڭبەك ەتتىم. بۇگىندە سول بەينەتتىڭ جەمىسىن تاتىپ وتىرمىن.
كۇندەلىكتى جۇمىستا الدىما كەلگەن باسىلىمداردى پاراقتاپ وتىرىپ, ءوزىمنىڭ وي-ءورىسىمدى, بىلىكتىلىگىمدى ارتتىردىم. ءوز ورتامدا قازاق باسلىمىدارىنا جاناشىر جاننىڭ ءبىرى بولدىم.
جولداسىم, «Egemen Qazaqstan» گازەتىنەن باستاپ بىرقاتار رەسپۋبليكالىق باسىلىمدى ۇزبەي وقيتىن. ءبىر كۇن كەلمەي كەشىگىپ جاتسا, كادىمگىدەي سابىرسىزدانىپ كۇتەتىن. ءار گازەتتى تۇگەندەپ, رەت-رەتىمەن تىگىندى جاسايتىن. ءبىز ەڭبەك ەتكەن جىلدارى گازەت-جۋرنال كۇندەلىكتى جەتكىزىلىپ تۇراتىن. ءتىپتى التى جۇمىس كۇنى تىنباي تاراتۋ جۇمىستارىمەن اينالىساتىن. ال قازىر اپتاسىنا 1-2 رەت جيناپ جەتكىزىپ جاتادى.
اششى دا بولسا شىندىق, بۇگىندە پوشتا سالاسىندا گازەت-جۋرنال جەتكىزۋمەن اينالىسىپ جۇرگەن كەي ارىپتەستەرىمىز ءوز قىزمەتىنە ءجۇردىم-باردىم قارايدى. سالدارىنان اقپاراتتى ينتەرنەت ارقىلى العان وقىرمانعا كەشىگىپ جەتكەن گازەتتىڭ ماڭىزى جوعالىپ جاتادى. وسى ورايدا التىن ارقاۋعا اينالعان بايلانىس قىزمەتىنىڭ ماماندارىن ءوز ءىسىنىڭ شىنايى جاناشىرى بولۋعا شاقىرامىن.
كەيدە, گازەت وقىلمايدى, جاڭالىقتاردى سمارتفوننان وقىپ الامىز دەگەن اڭگىمە ايتىلىپ, جازىلىپ ءجۇر. مەن وعان كەلىسە قويمايمىن. سەبەبى ءبىزدىڭ بۋىن ءالى دە گازەتتى قولعا ۇستاپ وقىعاندى, ونى ساقتاعاندى ادەتكە اينالدىرعان. تەحنيكا بۇزىلادى, ىستەن شىعادى. ال قاعازعا باسىلعان گازەت تاريح بولىپ ارحيۆتەردە تۇرادى.
قاديشا بالىمبەتوۆا,
بايلانىس قىزمەتىنىڭ ارداگەرى
