اسىرەسە اۋىل تۇرعىندارى ءۇشىن پوشتاشىنىڭ مارتەبەسى زور. ويتكەنى ەلىمىزدە ينتەرنەت جەلىسى تۇگىلى تەلەفون بايلانىسى تولىقتاي قولجەتىمدى بولماعان ەلدى مەكەندەر كوپتەپ سانالادى. ال بۇل اۋىلدار ءۇشىن نەگىزگى اقپارات تاسىمالداۋشىنىڭ جۇگىن پوشتاشىلار كوتەرىپ تۇر. بىراق وسى پوشتاشىنىڭ الەۋمەتتىك جاعدايى تاعى ءماز ەمەس. جالاقىسى از جۇمىس بولعاندىقتان, بۇل مىندەتتى اتقارۋعا ءوز ىسىنە قۇلاي بەرىلگەن ادام بولماسا, ەكىنىڭ ءبىرى تاۋەكەل ەتىپ كەلە قويمايدى. دەرەك بويىنشا, قازىر اۋىلداعى پوشتاشى 15 000 تەڭگە مەن 25 000 تەڭگەنىڭ ارالىعىندا ايلىق جالاقى الادى. ياعني پوشتاشىنىڭ ەڭبەكاقىسى ەلىمىزدەگى ەڭ تومەنگى جالاقى مولشەرىنەن دە تومەن بولىپ وتىر. مۇنداي جاعدايدا ءۇي-ءۇيدى ارالاپ, حات-حابار, گازەت-جۋرنال تاراتاتىن قىزمەتتىڭ ساپاسى تۋرالى ايتۋ قيىن. بۇل ماسەلە بيىل جىل باسىندا ءماجىلىس قابىرعاسىندا دا كوتەرىلگەن بولاتىن. مىسالى, شايماردان نۇرىموۆ ۇكىمەتكە دەپۋتاتتىق ساۋال جولداپ, ايماقتارداعى پوشتاشىلاردىڭ الەۋمەتتىك جاعدايىن جەتكىزگەن بولاتىن.
– «قازپوشتا» كومپانياسى قىزمەت كورسەتۋدىڭ كوپتەگەن تۇرلەرىن جۇزەگە اسىرادى. قارجىلىق وپەراتسيالار, تاۋارلار تاسىمالى, تولەمدەر, بانكتىك قىزمەتتىڭ كەيبىر تۇرلەرى جانە تاعى باسقا قىزمەتتەردى جۇزەگە اسىراتىن بۇل ۇيىم تابىستان, ارينە, كەندە ەمەس. وسىلاي بولا تۇرا, پوشتاشىلاردىڭ جالاقىسى وتە تومەن دەڭگەيدە قالىپ قويعانى اقىلعا سىيمايدى, – دەگەن بولاتىن دەپۋتات ءوز سوزىندە.
حالىق قالاۋلىسى بۇل ماسەلەگە الماتى وبلىسىنا جاساعان ساپارى بارىسىندا كوز جەتكىزىپتى. تۇرعىندار حات-حابار مەن گازەت-جۋرنالداردىڭ ەكى اپتادان ارتىق ۋاقىتقا دەيىن كەشىگىپ جەتەتىنىن ايتىپ شاعىمدانعان ەكەن. ياعني اۋدانداردا پوشتاشىلاردىڭ جەتىسپەۋىنەن وسىنداي قيىندىق تۋىپ وتىرعانى جاسىرىن ەمەس. ال ادامدار جۇمىسسىز جۇرگەنىنە قاراماستان پوشتاشى بولۋعا ق ۇلىقسىز. ونىڭ باستى سەبەبى جالاقىنىڭ تومەندىگىندە بولىپ وتىر. شىندىعىندا, الماتى وبلىسىنىڭ اۋداندارى بويىنشا انىقتالعان مالىمەتكە سۇيەنسەك, اۋىلداعى پوشتاشىنىڭ ايلىق جالاقىسى از جانە الا-قۇلا. مىسالعا, ەڭبەكشىقازاق اۋدانىندا پوشتاشى 15 000 تەڭگە مەن 28 000 تەڭگە السا, پانفيلوۆ اۋدانىندا بۇل سوما 18 000-20 000 تەڭگە ارالىعىندا-مىس. ال ەڭ تومەنگى جالاقى ۇيعىر اۋدانىندا ەكەن: 12 000 تەڭگە مەن 15 000 تەڭگە شاماسىندا عانا. ال وسىنداي جالاقىسى بار پوشتاشىدان اۋىلدى جاياۋ ارالاپ, گازەت-جۋرنالدى, حات-حاباردى كەشىكتىرمەي جەتكىزۋدى تالاپ ەتۋدىڭ ءوزى ادىلەتتى بولماس ەدى...
سونداي-اق ايماقتاعى پوشتا بولىمشەلەرىنىڭ جۇمىسىنا قاتىستى دا سىن كوپ ايتىلادى. ال اۋىلدىق جەردەگى «قازپوشتا» بولىمشەسى تۇرعىنداردان ءتۇرلى تولەم قابىلدايتىن ورىننىڭ مىندەتىن اتقارادى. زەينەتاقى دا وسى پوشتا بولىمشەلەرى ارقىلى تاراتىلادى. جۇرت اۋىلداعى ماڭىزدى مەكەمەنىڭ ءبىرى بولىپ سانالاتىن پوشتا بولىمشەلەرى قونىستانعان عيماراتتاردا قىزمەت كورسەتۋگە مۇمكىندىك جوق ەكەنىنە نارازى. ماسەلەن, جەتىسۋداعى كوپتەگەن ەلدى مەكەندەردەگى پوشتا عيماماراتتارىنىڭ توزىعى جەتكەن. سونىڭ ءبىرى تالعار اۋدانىنا قاراستى تالدىبۇلاق اۋىلىنداعى جاعداي.
– عيمارات «قازاقتەلەكومنىڭ» يەلىگىندە, جالعا الىنعان وسى ەكى بولمەدە ەڭبەك ەتەمىز, 20 جىلدان استى. تالدىبۇلاقتا تۇرعىندار سانى جىلدان-جىلعا ءوسىپ كەلەدى. قازىردىڭ وزىندە 7 مىڭعا جۋىقتاپ قالدى. تۇرعىندارعا زەينەتاقى, جاردەماقى تۇرلەرىمەن قوسا, سالەمدەمەلەر, تولەماقى تۇرلەرىن قابىلداپ, تاپسىرامىز. بولمە تار, كومپيۋتەرلىك تەحنيكالارىمىز ەسكى. جۇمىس ورنىمىز قىستا سۋىق, ەلەكتر جىلىتقىش قوسىپ وتىرامىز, – دەيدى پوشتا بولىمشەسىنىڭ قىزمەتكەرلەرى.
الماتى وبلىسى
