ء"بىز ۇيدە وقشاۋلانىپ وتىرعاندا, دارىگەرلەر جۇمىس ورنىندا قالىپ, ادامداردىڭ دەنساۋلىعى مەن ءومىرى ءۇشىن جان اياماي كۇرەستى. سول سەبەپتى دە, ءبىز, جاڭا ماۋسىمنىڭ العاشقى ون كونتسەرتىن مەديتسينا قىزمەتكەرلەرىنە ارناپ, وسىلايشا العىسىمىز بەن قۇرمەتىمىزدى بىلدىرگىمىز كەلدى", دەدى "استانا بالەت" تەاترىنىڭ ديرەكتورى الەكساندر سوۆوستيانوۆ.
استانالىق تەاتر ارتىستەرى ەكى بولىمنەن تۇراتىن كونتسەرتتىك باعدارلاماسىن تارتۋ ەتتى: ريكاردو امارانتەنىڭ "LoveFearLoss" ءبىر اكتىلى بالەتى مەن " ۇلى دالا مۇراسى" ديۆەرتيسمەنتى. وسى حورەوگرافيالىق توپتاماعا ايگۇل ءتاتي, اننا تسوي, زاۋىربەك رايباەۆ, داۋرەن ءابىروۆ سىندى كەشەگى جانە بۇگىنگى قازاقستاندىق بالەتمەيستەرلەر قويعان 13 بي مينياتيۋراسى ەنگەن.
جەتى جۇزدەن استام ادامعا ارنالعان كورەرمەن زالى بۇرىنعىداي ەمەس, وزگەشەلەۋ كورىندى: استانالىق سانيتارلىق دارىگەردىڭ قاۋلىسىنا سايكەس, سپەكتاكل اۋديتورياسى ەلۋ ادامنان اسپاۋى ءتيىس. الايدا, وسىنشالىقتى بوس زالدىڭ وزىندە, كونتسەرتتەن كەيىن ارتىستەرگە كورسەتىلگەن قوشەمەت وتە زور ەدى.
"ەرەكشە ەستەتيكالىق ءلاززات الدىم. ارتىستەردىڭ پلاستيكاسى قانداي, شىركىن؟! زاماناۋي ورنەكتەرگە باي ۇلتتىق ناقىشتاعى بي قانداي؟! ءبارى وتە ادەمى, وتە اسەرلى بولدى. تالانتتى ارتىستەرىڭىز قۋانىشتى كوڭىل-كۇيىمەن ءبولىستى. مۇنى ءار كورەرمەن سەزىنگەنىنە ءشۇبام جوق", دەگەن ويىمەن ءبولىستى, قالالىق فتيزيوپۋلمونولوگيا ورتالىعىنىڭ دارىگەرى گۇلنار امانجولوۆا.
تەاتر باسشىلىعى ون قايىرىمدىلىق كونتسەرت وتكىزۋدى جوسپارلاپ ەدى, سونىڭ التاۋى شىمكەنت پەن نۇر-سۇلتان قالالارىندا ءوتتى. قاراشا ايىندا تەاتر قاراعاندى مەن سەمەيدە تاعى 4 قايىرىمدىلىق كونتسەرت وتكىزبەكشى.
