سۋرەتتى تۇسىرگەن اۆتور
«قازاقستان تۇرعىن ءۇي قۇرىلىس جيناق بانكى» اق وبلىستىق فيليالىنىڭ ديرەكتورى نازيگۇل اككۋلوۆا «شاڭىراق» («5-10-20») باعدارلاماسى بويىنشا جەڭىلدەتىلگەن پايىزبەن باسپانا الۋدىڭ ءتيىمدى جولدارىن ايتىپ بەردى.
«نۇرلى جەر» مەملەكەتتىك باعدارلاماسىنىڭ جاڭا باعىتتارىنىڭ ءبىرى بولىپ تابىلاتىن «شاڭىراق» («5-10-20») قاناتقاقتى جوباسىن «تۇرعىن ءۇي قۇرىلىس جيناق بانكى» جۇزەگە اسىرادى. بۇل جوبا پرەزيدەنت قاسىم-جومارت توقاەۆتىڭ تاپسىرماسى بويىنشا قولعا الىنعان. تىڭ جوبانىڭ نەگىزگى ماقساتى – قازاقستاندىقتاردى ءتيىمدى زايم بەرۋ ارقىلى باسپانامەن قامتاماسىز ەتۋ.
قاراپايىم حالىق ءۇشىن بۇل باعدارلاما وتە ءتيىمدى كورىنەدى. بانك قىزمەتكەرلەرىنىڭ ايتۋىنشا, نەسيەنىڭ جىلدىق مولشەرلەمەسى بەس پايىزعا تەڭ. الايدا باسپانالى بولۋعا نيەتتى ادام تۇرعىن ءۇي قۇنىنىڭ كەم دەگەندە 10 پايىزىن دەپوزيتكە جيناۋ قاجەت. ال نەسيەلەندىرۋ مەرزىمى – 20 جىل.
نازيگۇل اككۋلوۆانىڭ مالىمەتىنە سۇيەنسەك, اتالعان باعدارلاما ارقىلى كەز كەلگەن ادام ءۇي الا المايتىن كورىنەدى. باعدارلاما بويىنشا جەڭىلدىكپەن نەسيە الۋ جونىندەگى ءوتىنىشتى 1986 جىلدان باستاپ 2015 جىلعا دەيىن جەرگىلىكتى اكىمدىكتەردە باسپاناعا مۇقتاج ازامات رەتىندە تىركەلگەن قازاقستاندىقتار بەرە الادى ەكەن.
وتىنىشتەردى قابىلداۋ مەرزىمى اياقتالعاننان كەيىن, بانكتىڭ «شاڭىراق» جوباسىن ودان ءارى نەسيەلەندىرۋگە قاجەتتى قاراجاتى بولعان جاعدايدا, باعدارلامانىڭ ەكىنشى كەزەڭىنە اكىمشىلىك كەزەگىنە كەيىنگى جىلدارى تۇرعان ازاماتتار دا شاقىرىلۋى مۇمكىن.
سونداي-اق باعدارلاماعا قاتىسۋ ءۇشىن سوڭعى التى اي ىشىندەگى وتباسىنىڭ ءار مۇشەسىنە كەلەتىن تابىستىڭ ءبىر ايلىق كولەمى 3,1 كۇنكورىس مينيمۋمىنان (2020 جىلدىڭ 1 ساۋىرىنەن باستاپ كم – 32 668 تەڭگەگە تەڭ) اسپاۋى تالاپ ەتىلەدى. وعان ەڭبەك جانە كاسىپكەرلىك قىزمەتتەن تۇسەتىن كىرىستى (زەينەتاقى اۋدارىمدارىن, جەكە تابىس سالىعى مەن باسقا دا مىندەتتى اۋدارىمداردى ەسەپتەمەگەندە) جاتقىزۋعا بولادى. دەمەك, 2020 جىلى وتباسىنىڭ ءار مۇشەسىنە كەلەتىن تابىس مولشەرى 101 271 تەڭگەدەن ارتىق بولماۋى ءتيىس.
– وزدەرىڭىزگە بەلگىلى بولعانداي, بۇل باعدارلاما بويىنشا تەك باستاپقى نارىقتاعى, ياعني جاڭادان سالىنعان تۇرعىن ۇيلەردى عانا ساتىپ الۋعا بولادى. ۇمىتكەرلەر اتالعان باعدارلاما بويىنشا سالىنىپ جاتقان ۇيلەردىڭ ءتىزىمىن «hcsbk.kz» سايتىنان كورە الادى, – دەپ ءتۇسىندىردى نازيگۇل اككۋلوۆا.
قازىرگى ۋاقىتتا شىعىس قازاقستاندا «5-10-20» باعدارلاماسى بويىنشا التى تۇرعىن ءۇيدىڭ قۇرىلىسى ءجۇرىپ جاتىر. ماسەلەن, وسكەمەندە 64 پاتەرلى ءتورت ءۇي مەن 72 پاتەرلى ءبىر تۇرعىن ءۇي بوي كوتەرۋدە. تاعى ءبىر ءۇي ۇلان اۋدانىندا سالىنىپ جاتىر. بولاشاقتا وندا 80 وتباسى قونىستويىن تويلاماق. بۇل نىسان اعىمداعى جىلدىڭ قاراشا ايىندا قولدانىسقا بەرىلەدى دەپ جوسپارلانۋدا. ال وبلىس ورتالىعىنداعى ۇيلەرگە 2021 جىلى قونىستانۋعا بولادى.
جەرگىلىكتى اكىمدىكتەر سالعان نەسيەلىك تۇرعىن ۇيلەردىڭ ءبىر شارشى مەترى ءوڭىر تۇرعىندارى ءۇشىن 160 مىڭ تەڭگەدەن ساتىلادى. شىعىس قازاقستان وبلىسىندا اتالعان باعدارلاما بويىنشا بوي كوتەرگەن باسپانانىڭ باعاسى 12 ملن تەڭگەدەن اسپاۋى ءتيىس ەكەن.
– اكىمدىك كەزەگىندە تۇرعان ازاماتتار وعان قاتىسۋعا ءوتىنىش ءبىلدىرۋ ءۇشىن «hcsbk.kz» سايتىنا تىركەلۋى قاجەت. وتىنىشتەردى قابىلداۋ مەرزىمى 17 قىركۇيەكتەن 16 قازانعا دەيىن جالعاسادى. ەگەر سايت ارقىلى ءوتىنىش بەرۋ قيىندىق تۋعىزسا نەمەسە باسقا دا سۇراقتار مازالاسا, بانك بولىمشەسىنە بارۋعا بولادى. ءتىپتى بولماسا, بانكتىڭ كەڭەسشىسىمەن حابارلاسا الاسىزدار, – دەدى ن.اككۋلوۆا.
ال باسپانالى بولۋ ءۇشىن ءوتىنىش بەرەمىن دەسەڭىز, ءبىرىنشى قادام – hcsbk.kz ۆەب-سايتىنداعى «قولجەتىمدى باسپانا»/«شاڭىراق» قاناتقاقتى جوباسىنىڭ بولىمىنە كىرىپ, ەلەكتروندى ءوتىنىم بەرۋگە بولادى. ءۇش كۇن ىشىندە ءوتىنىش بەرۋشىگە بانك قىزمەتكەرى حابارلاسىپ, نەسيە شارتتارى, باعدارلاما تالاپتارى تۋرالى ەگجەي-تەگجەيلى ايتىپ بەرەدى. ءوتىنىش بەرۋى ءۇشىن فيليالدىڭ ەسەبىنە تىركەپ قويادى.
بۇدان سوڭ تولەم قابىلەتتىگىن باعالاۋ ءۇشىن ءوتىنىش بەرۋشى قاجەتتى قۇجاتتار پاكەتىمەن بانك بولىمشەسىنە بارۋى ءتيىس. ەگەر وڭ شەشىم قابىلدانسا, بانكتىڭ تالاپتارىنا سايكەس كەلەتىن قۇرىلىسشىلاردان باسپانا تاۋىپ, كەلىسىمدى بەكىتۋى قاجەت.
كەلەسى قادام – بانكتەن نەسيە الۋ. جوعارىدا ايتقانىمىزداي, نەسيە ءوتىنىش بەرۋشىنىڭ جيناق شوتىندا قاجەتتى سومانىڭ 10 پايىزدان كەم ەمەس مولشەرى بولعان كەزدە عانا بەرىلەدى.
اكىمشىلىك كەزەگىنە قاي ۋاقىتتان باستاپ ەسەپكە تۇرعانىڭىزدى eGov.kz سايتى ارقىلى نەمەسە جەرگىلىكتى اتقارۋشى بيلىك ورگاندارىنان بىلۋگە بولادى.
بەتتى دايىنداعان
مەرەي قاينار ۇلى,
«Egemen Qazaqstan»
شىعىس قازاقستان وبلىسى
