Messa di Gloria – دجاكومو ءپۋچچينيدىڭ ەڭ ايگىلى تۋىندىلارىنىڭ ءبىرى, بۇعان قوسا ول ۇلى كومپوزيتوردىڭ سيرەك ورىندالاتىن شىعارماسى سانالادى.
– مەسسانىڭ ءاربىر نومىرىندە ايرىقشا سۇلۋلىق بار, بۇل – بەينەلى, مانەرلى مۋزىكا. كاتوليكتىك شىركەۋدەگى مەسسا – سالتاناتتى عيبادات ەتۋ. اتالعان شىعارمانىڭ ايقىن مۋزىكالىق تاقىرىپتارىندا ءتاڭىردى ماداقتاۋ انىق ەستىلەدى. ءدىني مۋزىكاسى بار بۇل تۋىندىعا پۋچچيني شىعارماشىلىعىن بىرەگەي ءارى وعان دەيىنگىلەردىڭ جۇمىستارىنان وزگەشە ەتەتىن بارلىق بەلگىلەر ءتان. بۇل دەگەنىمىز – ءبىزدىڭ «توسكا», «تۋراندوت», «بوگەما», «مادام باتتەرفلياي» نەمەسە «مانون لەسكو» سىندى وپەرالاردان كورىپ-تىڭداپ ۇيرەنگەن نارسەلەردىڭ ءبارى – نازىك اۋەندىلىك, وركەسترگە كەرەمەت لايىقتاۋ, ادەتتەن تىس ۇيلەسىمدى قادامدار. حور شىركەۋدە ءان ايتقاندا, ءمىناجات جاساۋعا كەدەرگى كەلتىرمەۋ ءۇشىن ەموتسياسىز ايتۋى ءتيىس دەپ ەسەپتەلەدى. بىراق ءبىز شىركەۋدە ەمەس, ساحنادا ورىندايتىن بولعاندىقتان, ماقساتىمىز دا باسقا: تىڭدارمان قاۋىم بىزبەن بىرگە كومپوزيتوردىڭ پارتيتۋراعا ەنگىزگەن سەزىمدەرىن ءتۇيسىنۋى ءۇشىن مۋزىكانىڭ بار اسەمدىگىن, كەمەڭگەر ءپۋچچينيدىڭ تەرەڭدىگىن كورسەتۋگە تىرىستىق, – دەدى عالامات مۋزىكا كەشى جايىندا تەاتردىڭ باس حورمەيستەرى ەرجان ءداۋىتوۆ.
تۋىندىداعى جەكە پارتيالاردى تەاتر سوليستەرى رامزات بالاكيشيەۆ (تەنور) پەن تالعات عالەەۆ (باريتون) ورىندادى.
ەسكە سالار بولساق, 2018 جىلدىڭ جەلتوقسان ايىندا «استانا وپەرا» حورى وسى شىعارمامەن رەسەيدىڭ ءۇش تانىمال كونسەرۆاتوريالارىنىڭ ءبىرى ورنالاسقان جانە كوپتەگەن تانىمال مۋزىكالىق ۇجىم جۇمىس ىستەيتىن ءسىبىردىڭ ءىرى مادەني ورتالىعى نوۆوسىبىردە ونەر كورسەتتى. ءنوۆوسىبىر مەملەكەتتىك اكادەميالىق وپەرا جانە بالەت تەاترىنىڭ ساحناسىندا دج.ءپۋچچينيدىڭ Messa di Gloria شىعارماسى دا العاش رەت شىرقالدى. كلاسسيكالىق مۋزىكادان حابارى بار قالانىڭ تالعامپاز كورەرمەندەرى قازاقستاندىق ارتىستەردىڭ ورىنداۋىن ۇلكەن قوشەمەتپەن قابىل العان بولاتىن.
