«استانا وپەرا» بالەت ماۋسىمىنىڭ اشىلۋى كورەرمەن قاۋىمدى عانا ەمەس, سونىمەن قاتار قازاقستاندىق جەتەكشى بۇقارالاق اقپارات قۇرالدارى وكىلدەرىنىڭ دە زور قىزىعۋشىلىعىن تۋدىردى. ءىس-شارانىڭ باستالۋىنا دەيىن جۋرناليستەر التىناي اسىلمۇراتوۆاعا ءوز سۇراقتارىن جاۋدىرتتى. البەتتە, «كارانتين كەزىندە ترۋپپا قالايشا جاقسى جۇمىس قالپىن ساقتاي الدى؟» دەگەن ساۋال باستى نازاردا بولدى. بالەت ترۋپپاسى كوركەمدىك جەتەكشىسىنىڭ سوزىنشە, بۇل وڭاي شارۋا ەمەس, كارانتين تالاپتارىن جەڭىلدەتكەن سوڭ عانا بارلىق سانيتارلىق نورمالارعا سايكەس ارتىستەر زالدا بار كۇشىمەن دايىندىقتارىن باستاي الدى.
– كەرەمەت ساحنامىز بەن كورەرمەن قاۋىمدى قالايشا ساعىنعانىمىزدى سوزبەن ايتىپ جەتكىزۋ قيىن. بالەت ماۋسىمىنىڭ اشىلۋى بارشامىز ءۇشىن ۇلكەن قۋانىش. ماۋسىم جارقىن ءارى مازمۇندى, ءماندى, ەڭ باستىسى جەمىستى بولسىن, – دەپ تىلەگىن ءبىلدىردى التىناي اسىلمۇراتوۆا.
شىمىلدىق ءتۇرىلدى, شاتتانعان كورەرمەن تىنا قالدى. الدىمەن بارلىعى ساحنا جابدىقتارىنا – اتاقتى يتاليالىق ستسەنوگراف ەتسيو فريدجەريونىڭ دەكوراتسيالارىنا تامساندى. سودان كەيىن كورەرمەندەر اۋديتورياسىنىڭ نازارى الەمدىك حورەوگرافيا جاۋھارلارىن, اتاپ ايتقاندا, پ.چايكوۆسكيدىڭ «اققۋ كولى», ر.پەتيدىڭ حورەوگرافياسىنداعى «پاريج قۇداي اناسىنىڭ سوبورى», م.پەتيپانىڭ حورەوگرافياسىنداعى ا.اداننىڭ «كورسار» جانە ت.ب. بالەتتەردەن ۇزىندىلەردى ۇسىنعان بالەت ترۋپپاسىنىڭ ارتىستەرىنە اۋدى. ك.زۆەرەۆانىڭ حورەوگرافياسىنداعى «زامان تىنىسى» بالەتىنەن دۋەت پەن ا.سادىقوۆانىڭ حورەوگرافياسىنداعى Steppe Sons «قورقىت» قويىلىمى كەشتىڭ كوركىن ودان سايىن قىزدىرا ءتۇستى.
بۇل كەشتە ايگەرىم بەكەتاەۆا, باقتيار ادامجان, انەل رۇستەموۆا, گاۋحار ۋسينا, ولجاس تارلانوۆ, ارمان ورازوۆ, ەركىن راحماتۋللاەۆ, اقارىس بەيبارىس, سەرىك ناقىسپەكوۆ, شۇعىلا ادەپحان, سۇلتانبەك عۇمار, ەركەجان ءجۇنىسوۆا, دالەر زاپاروۆ, اسەل شايكەنوۆا باستاعان تالانتتى ارتىستەر ءانسامبلى جۇرتشىلىققا ءوز ونەرىن پاش ەتتى.
كەلەسى كۇنى «استانا وپەرا» ۇلكەن زالىنىڭ ساحناسىندا ن.ا.ريمسكي-كورساكوۆتىڭ مۋزىكاسىنا م.فوكيننىڭ «شەحەرازادا» ءبىر ءبولىمدى بالەتى ۇسىنىلدى.
«شەحەرازادا» سپەكتاكلى حح عاسىردىڭ باسىندا – بالەت ونەرىنىڭ قارقىندى دامۋ كەزەڭىندە قويىلعانى بەلگىلى. «استانا وپەرا» ساحناسىنا ءبىر ءبولىمدى تولىققاندى بالەتتى رەسەيدىڭ حالىق ءارتىسى اندريس ليەپا الىپ شىقتى. بالەتكە شاحريار پاتشا مەن ونىڭ ءىنىسى تۋرالى «مىڭ ءبىر ءتۇن» ەرتەگىسىنىڭ جەلىسى نەگىز بولعان.
سالتاناتتى شىعىس ناقىشتارى مەن قۇشتارلىققا تولى ماحاببات وقيعاسى زالداعى بىردە-ءبىر كورەرمەندى بەيجاي قالدىرعان جوق. لەۆ باكستتىڭ قالپىنا كەلتىرىلگەن دەكوراتسيالارى مەن كوستيۋمدەرىنە كورەرمەن قاۋىم تاڭداي قاقتى. التىن قۇلدىڭ پارتياسىن «استانا وپەرا» تەاترىنىڭ جەتەكشى ءسوليسى باقتيار ادامجان, شىعىس سۇلۋى زوبەيدانىڭ بەينەسىن تەاتر ءسوليسى اناستاسيا زاكلينسكايا ۇسىندى. ولار پارتيالارىن جاي ورىنداپ قانا قويماي, ساحنا تورىندە ءوز كەيىپكەرلەرىنىڭ ءومىرىن باستان كەشىردى. سوليستەردىڭ دارىنى ارقاسىندا ساحنا ناعىز تاڭعاجايىپ ەرتەگىگە اينالدى.
شاحرياردىڭ پارتياسىنداعى جانىبەك يمانقۇلوۆ, شاحەزمان – يلدار شاكيرزيانوۆ, باس بەلسىز رولىندەگى ولجاس ماحانبەتاليەۆ, سونىمەن قاتار بالەت ترۋپپاسىنىڭ بارلىق ارتىستەرى تالعامى بيىك كورەرمەننىڭ جۇرەگىن جاۋلاپ الدى.
– بالەتتەن كەرەمەت اسەرگە بولەندىم. ارتىستەردىڭ تەر توگىپ ەڭبەك ەتكەنى كورىنىپ تۇر. بۇل, ەڭ الدىمەن, ترۋپپانىڭ پرەمەرى باقتيار ادامجان مەن اناستاسيا زاكلينسكاياعا قاتىستى. ارتىستەر ەرتەگىنى ساحنا تورىندە شىندىققا اينالدىرا ءبىلدى, – دەپ پىكىرىمەن ءبولىستى تەاتردىڭ تۇراقتى كورەرمەنى دانيار وسپانوۆ.
