ساقتىق شارالارىنا قاراماستان, شىعىستا دەرت دەندەپ تۇر. ىندەتپەن كۇرەسۋ ءۇشىن اق حالاتتى جاندارمەن بىرگە اۋىرىپ تۇرعان ازاماتتار دا قان پلازماسىن تاپسىرىپ, كوروناۆيرۋسقا شالدىققاندارعا كومەك كورسەتۋدە.
ناقتى ەمىن تاپپاعان سوڭ الەمنىڭ عالىمدارى اتى جامان دەرتكە قاتتى شالدىعىپ, ايىققان ادامنىڭ قان پلازماسى ەم بولادى دەپ شەشكەن. سودان بەرى شىعىس قازاقستان ءوڭىرى قان پلازماسىن ازىرلەۋدى مىقتاپ قولعا العان. بۇل ءادىس كوپتەگەن ناۋقاستىڭ بەتىن بەرى قاراتىپ جاتقانى دا راس.
قان پلازماسى ناۋقاس ومىرىنە اراشا تۇسە الاتىنىنا كوز جەتكىزگەندەردىڭ كوبى قان تاپسىرۋعا نيەتتەنگەن. جۋىقتا عانا شىعىستىڭ بىرقاتار پوليتسەيى كوروناۆيرۋس ينفەكتسياسىمەن اۋىرىپ جاتقان ناۋقاستارعا كومەك بولسىن دەپ قان پلازماسىن تاپسىردى. پوليتسيا دەپارتامەنتىنىڭ قىزمەتكەرلەرى ەرىكتى تۇردە دونورلىق كان جانە كوروناۆيرۋستى ەمدەۋ ءۇشىن پلازما تاپسىرۋ اكتسياسىن ۇيىمداستىرىپ, وعان وزدەرى بەلسەندى قاتىستى. پوليتسيا قىزمەتكەرلەرى جىلدار بويى دونورلىق قان تاپسىرۋدى ادەتكە اينالدىرعان ەدى. مىسالى, وتكەن جىلى پوليتسەيلەردىڭ كۇشىمەن 60 ليترەن استام قان جينالعان. ەسەپتەي بەرىڭىز, قانشاما ادامنىڭ ءومىرىن امان ساقتاپ قالۋعا سەپتىگىن تيگىزەدى؟!
– ءبىز جىل سايىن وسىنداي ءىس-شارالار وتكىزەمىز. دونور بولامىن دەۋشىلەر جىل سايىن كوبەيىپ كەلەدى. بيىل تاجىريبەلى دونورلارمەن قاتار جاس پوليتسەيلەر دە قاتىستى, – دەيدى پوليتسيا دەپارتامەنتىنىڭ كادر ساياساتى باسقارماسى باستىعىنىڭ ورىنباسارى ەركىن قوجامسەيىتوۆ.
پوليتسەيلەر اراسىنداعى ءداستۇرلى اكتسيانىڭ ماقساتى – دونورلىق قاندى قاجەت ەتەتىن ادامداردىڭ ءومىرىن قۇتقارۋ. قۇقىق قورعاۋ قىزمەتكەرلەرىنىڭ جاناشىرلىعىن, مەيىرىمدىلىگىن كورسەتۋ ەدى.
دەپارتامەنت قىزمەتكەرلەرىنىڭ ايتۋىنشا, جۇمىس بابىمەن ءجۇرىپ, ءتۇرلى اپاتتاردىڭ كۋاسى بولادى, قان جوعالتىپ, ءومىر ءۇشىن ارپالىسقانداردى كورەدى. سوندايدا كەۋدەسىندە جۇدىرىقتاي جۇرەگى بار ادام كومەك كورسەتۋگە تىرىسادى. دارىگەرلەر دە قان تاپسىرۋشىلار قاتارىندا ءتارتىپ ساقشىلارى بولعانىنا قۋانادى. ويتكەنى پوليتسەيلەر تۇراقتى تۇردە مەديتسينالىق تەكسەرۋدەن ءوتىپ, دەنە شىنىقتىرۋمەن جۇيەلى اينالىسادى.
اتاپ ايتساق, COVID-19 ىندەتىنە شالدىققاندارعا كومەك قولىن سوزۋ ءۇشىن وسكەمەن قالالىق پوليتسيا ءبولىمىنىڭ ون قىزمەتكەرى قان پلازماسىن تاپسىردى. ساقشىلار تاپسىرعان پلازمالار ناۋقاستاردىڭ دەرتىن جەڭىلدەتۋگە سەپتىگىن تيگىزەرى انىق. ادام ومىرىنە اراشا تۇسەم دەۋشى كەز كەلگەن ازاماتقا وسكەمەندەگى قان ورتالىعىنىڭ ەسىگى اشىق.
شىعىس قازاقستان وبلىسى
