ۇكىمەت مەملەكەت باسشىسىنىڭ سىن-ەسكەرتپەلەرىنەن كەيىن ءبىر اي وتسە دە جۇيەلى ۇسىنىس جاساماي وتىر. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا پارلامەنت ءماجىلىسى ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى, دەپۋتات ازات پەرۋاشەۆ مالىمدەدى.
«كەدەن وداعى ەلدەرىمەن ساۋداعا قاتىستى, پرەزيدەنت «پراگماتيكالىق ەكونوميكالىق ەسەپ, سونىمەن قاتار قاي تۇستا جەڭىلىپ, قاي تۇستا اسىپ تۇسەتىنىمىزگە تالداۋ جاساۋدى جانە نە ىستەۋ كەرەكتىگى» جونىندە تاپسىرما بەرگەن ەدى. بىراق ازىرگە ۇكىمەت تاراپىنان مۇنداي ەسەپ جاسالعان جوق», - دەدى پەرۋاشەۆ.
ونىڭ ايتۋىنشا, «اق جول» ساراپشىلارى بيىلعى جىلدىڭ شىلدە ايىندا 2011-2012 جىلدارعا تالداۋ جاساعان. ول قازاقستاندا جىلدان-جىلعا كەدەن وداعى ەلدەرىمەن ساۋدا بويىنشا كەرى سالدو ورىن الىپ وتىرعانىن كورسەتىپ وتىر.
«2011 جىلى ول 8 ملرد دوللاردان استى, 2012 جىلى 10,9 ملرد دوللاردى قۇرادى. وسى رەتتە قازاقستاندىق ەكسپورت تومەندەپ, يمپورتتىڭ ءوسۋى جالعاسۋدا», - دەدى ول.
دەپۋتاتتىڭ ايتۋىنشا, «قازاقستان-2050» ستراتەگياسىنىڭ جاريالانعانىنا ءبىر جىل, ال پرەزيدەنتتىڭ جاپپاي جەكەشەلەندىرۋ جانە كۆازيمەملەكەتتىك سەكتوردا مەملەكەتتىك-جەكە مەنشىك سەرىكتەستىكتى دامىتۋ بويىنشا ۇكىمەتكە تاققان سىن-ەسكەرتپەلەرىنەن كەيىن ءبىر اي ءوتتى. الايدا, ءالى دە ايتارلىقتاي ناتيجە مەن جۇيەلى ۇسىنىستار جوق.
ساكەن مايلىباي.
