اقش-تا بارلىق شتاتتار مەن قالالاردىڭ مەرلەرىن سايلاۋ بولىپ ءوتتى. ەلدىڭ ەڭ الىپ شاھارى – نيۋ-يوركتى 1989 جىلدان بەرى العاش رەت دەموكرات باسقاراتىن بولدى. ياعني, اتالعان قالا ءۇشىن سايلاۋدا 52 جاستاعى ادۆوكات بيلل دە-بلازيو جەڭىسكە جەتتى.
اقش-تا بارلىق شتاتتار مەن قالالاردىڭ مەرلەرىن سايلاۋ بولىپ ءوتتى. ەلدىڭ ەڭ الىپ شاھارى – نيۋ-يوركتى 1989 جىلدان بەرى العاش رەت دەموكرات باسقاراتىن بولدى. ياعني, اتالعان قالا ءۇشىن سايلاۋدا 52 جاستاعى ادۆوكات بيلل دە-بلازيو جەڭىسكە جەتتى.
2001 جىلدان بەرى نيۋ-يوركتى اشسا الاقانىندا, جۇمسا جۇدىرىعىندا ۇستاپ كەلگەن مايكل بلۋمبەرگ ءۇش رەت قاتارىنان قالاباسى بولىپ سايلانعاندىقتان, زاڭ بويىنشا ءتورتىنشى مارتە سايلاۋعا قاتىسا العان جوق. ال دەترويت مەرى بولىپ 55 جاستاعى مايكل داگگان سايلاندى. ول سايلاۋشىلار داۋىسىنىڭ 55 پايىزىن العان. بۇل قالانى ەرەكشە ايتىپ وتىرعان سەبەبىمىز, ونىڭ تۇرعىندارىنىڭ 82 پايىزىن افروامەريكالىقتار قۇرايدى. سوندىقتان 1973 جىلدان بەرى العاش رەت قالاعا اق ءناسىلدى ادام باسشىلىق جاسايتىن بولدى.
راحمون ءوز جەڭىسىنە سەنىمدى
تاجىكستان پرەزيدەنتى ەمومالي راحمون ەل پرەزيدەنتىن سايلاۋعا قاتىسىپ, ءوز داۋىسىن بەردى. ونىڭ قورىتىندىسى بويىنشا, ە.راحمون جاڭا مەرزىمگە قايتا سايلانباق نيەتىندە. ول ەل استاناسى – دۋشانبە قالاسىنداعى سايلاۋ ۋچاسكەلەرىنىڭ بىرىندە داۋىس بەرگەن.
تاجىكستانداعى پرەزيدەنتتىك سايلاۋ كەشە جەرگىلىكتى ۋاقىت بويىنشا تاڭعى 6.00-دە باستالىپ, كەشكى 20.00-گە دەيىن جالعاستى. بۇكىل ەل بويىنشا 3 مىڭنان استام سايلاۋ ۋچاسكەلەرى اشىلدى. 60 ۋچاسكە ەلدەن تىسقارى جۇرگەن تاجىك ازاماتتارى داۋىس بەرۋ ءۇشىن شەتەلدەردە جاساقتالدى. ال سايلاۋعا پرەزيدەنتتىكتەن ۇمىتكەرلەر رەتىندە تاعى بەس كانديدات قاتىستى. ولار: اگرارلىق پارتيانىڭ وكىلى, اكادەميك توليببەك بۋحوريەۆ, ەكونوميكالىق رەفورمالار پارتياسىنىڭ سەركەسى وليمدجون بوبوەۆ, كوممۋنيستىك پارتيا سەركەسىنىڭ ورىنباسارى يسمويل تالباكوۆ, سوتسياليستىك پارتيا سەركەسى ابدۋحاليم گاففوروۆ جانە دەموكراتيالىق پارتيانىڭ سەركەسى سايددجافار يسمونوۆ.
كاريموۆانىڭ پرەزيدەنت بولعىسى جوق
وزبەكستان پرەزيدەنتى يسلام كاريموۆتىڭ ۇلكەن قىزى گۇلنار كاريموۆا پرەزيدەنتتىك امبيتسيادان باس تارتىپ وتىر. ول بۇل تۋرالى ءوزىنىڭ تۆيتتەرىندە جازدى. ونىڭ اتاپ وتۋىنشە, ول ءوزىن ساياساتكەر سانامايدى جانە وزبەكستاندى ايەل باسقارۋ كەرەك, ويتكەنى, ايەل ەركەكتەن اقىلدىراق دەگەن ۇستانىممەن دە كەلىسپەيتىنىن ءبىلدىردى.
«بۇل نە ساندىراق؟! ەشكىم ەشقاشان پرەزيدەنتتىك تۋرالى تالقىلاعان ەمەس جانە تالقىلاپ تا جاتقان جوق. بۇل قۋاتتى دا جىگەرلى جانە حالىق تاڭداعان ەر ادامنىڭ شارۋاسى», دەيدى رەسپۋبليكا باسشىسىنىڭ قىزى. جالپىسىندا, گۇلنار كاريموۆا بۇگىندە 75-تەگى ەل پرەزيدەنتى يسلام كاريموۆتىڭ ىقتيمال ءىزباسارى رەتىندە قاراستىرىلىپ كەلگەن ەدى. بىراق, سوڭعى كەزدەرى, كەيبىر باق-تاردىڭ اقپاراتتارىنا قاراعاندا, ول كوپشىلىككە جەككورىنىشتى كۇيگە ۇشىراعان سەكىلدى. ءتىپتى, ونى اكەسى ساباپ سالعان دەگەن دە اڭگىمە بار.
قىتايدا تاعى دا جارىلىس
قىتايدىڭ شانسي پروۆينتسياسىنداعى تايۋان كوممۋنيستىك پارتياسى قالالىق كوميتەتىنىڭ عيماراتى الدىندا بىرنەشە جارىلىس جاسالدى. وقيعا سالدارىنان ءبىر ادام قازا تاپسا, سەگىزى جارالانعان. مۇنى «سينحۋا» اگەنتتىگى حابارلادى.
جارىلىس كەشە شامامەن تاڭەرتەڭگى ساعات 7.40-تا جاسالعان. جارىلىس, كەيبىر دەرەكتەرگە قاراعاندا, جەتەۋدەن كەم بولماعان. وقيعاعا كۋاگەرلەردىڭ ءبىرى «سينحۋا» اگەنتتىگىنە ينتسزە كوشەسىندە ميكرواۆتوبۋس جارىلعانىن مالىمدەگەن. ال قىتاي تەلەۆيزياسىنىڭ حابارلاۋىنا قاراعاندا, بومبالار گۇل كلۋمبالارىنا جاسىرىلىپتى. وسى وقيعادان ءسال بۇرىن, دالىرەك ايتقاندا, 28 قازان كۇنى ەل استاناسى – پەكين قالاسىنىڭ ورتالىعىندا قولدان جاسالعان جول-كولىك وقيعاسى ورىن الىپ, بەس ادام كوز جۇمعانى بەلگىلى.
كەڭەس باسقىنشىلىعىنىڭ قۇنى قانشا؟
لاتۆيا مينيسترلەر كابينەتى كەشە ەلگە كەڭەستىك باسقىنشىلىقتان كەلگەن زالال كولەمىن انىقتايتىن كوميسسيا جۇمىسىن قايتا جانداندىردى. بۇل ىسكە اۋەلدە ادىلەت مينيسترلىگى باستاماشىلىق تانىتسا, كوميسسيانى قارجىلاندىرۋ سەيمدە (پارلامەنت) ماقۇلدانعان بولاتىن.
كوميسسيا قۇرامىندا پروكۋراتۋرانىڭ, اسكەري مۇراجايدىڭ, بالتيا مەن سولتۇستىك زەرتتەۋ ورتالىعىنىڭ, باسقىنشىلىق مۇراجايىنىڭ, باسقىنشىلىقتى زەرتتەۋ قوعامىنىڭ, لاتۆيا ۋنيۆەرسيتەتىنىڭ, سونداي-اق, بىرقاتار مينيسترلىكتەردىڭ –ەكونوميكا, قورعانىس, سىرتقى ىستەر جانە وڭىرلىك دامۋ مينيسترلىكتەرىنىڭ وكىلدەرى بار. لاتۆيا ادىلەت ءمينيسترى يانيس بوردانستىڭ پىكىرىنشە, كەڭەستىك باسقىنشىلىققا كەڭەس وداعى كىنالى بولسا, ونىڭ مۇراگەرى رەسەي دە سونداي دەڭگەيدە جاۋاپتى. وسى رەتتە لاتۆيا رەسەيدەن وتەماقى الۋعا ءۇمىتتى سەكىلدى.
باپكەر 18 كگ. گەروينمەن ۇستالدى
ماسكەۋدە ەسىرتكى اينالىمىن باقىلاۋ جونىندەگى فەدەرالدى قىزمەت وكىلدەرى دزيۋدو جاتتىقتىرۋشىسىن 18 كيلوگرامم گەروينمەن ۇستاعان. بۇل تۋرالى كەشە «ينتەرفاكس» اگەنتتىگى حابارلادى.
28 جاستاعى تاجىكستان ازاماتى «ششەلكوۆو» سپورت كەشەنىندە دزيۋدو كۇرەسى بويىنشا جاتتىقتىرۋشى بولىپ ىستەيدى ەكەن. جاقىندا ول تۇرعىن ءۇيدىڭ ءبىر بولىگىن ساتىپ السا, قۇقىق قورعاۋ ورگاندارىنىڭ دەرەكتەرى بويىنشا, ەسىرتكى ساقتايتىن ورىن رەتىندە پايدالانىپ كەلگەن. ءۇيدى تەكسەرۋ بارىسىندا 2 كيلوگرامم گەروين تابىلسا, تاعى 2,7 كيلوگرامى جاتتىقتىرۋشىنىڭ جالدايتىن پاتەرىنەن شىققان. قالعان 13 كيلوگرامم گەروين ۇستالعاننىڭ گاراجىنان الىنعان. ەندى باپكەر ءومىر بويى تۇرمەگە وتىرۋ جازاسىنا كەسىلۋى مۇمكىن.
بەلارۋس وپپوزيتسيونەرى تۇتقىندالدى
پولشانىڭ ششيتنو قالاسىندا بەلارۋستىك وپپوزيتسيونەر سەرگەي پونومارەۆ قاماۋعا الىنعان. بۇل تۋرالى «بەلسات» تەلەارناسى حابارلادى. وپپوزيتسيونەر ەكى ساياجاي ءۇيىن ورتەدى دەپ ايىپتالىپ وتىرعان كورىنەدى.
كۇدىكتى اتالعان ءىس بويىنشا قىركۇيەك ايىندا-اق تۇتقىندالسا, اڭگىمە س.پونومارەۆ تۋرالى بولىپ وتىرعانى كەيىن انىقتالعان. پوليتسيا كۇدىكتىنى وقيعا ورنىندا ۇستاسا كەرەك. ال ول ءوزىنىڭ ارەكەتىن ورتەنگەن ءۇي يەلەرىنىڭ ءبىرى قارىزىن بەرمەي جۇرگەندىگىمەن تۇسىندىرۋگە تىرىسىپتى. ال پروكۋراتۋرا وكىلىنىڭ سوزىنە قاراعاندا, س.پونومارەۆ ءوزىنىڭ كىناسىن تولىق موينىنا العان. كەيىن بەلگىلى بولعانىنداي, ورتەنگەن ۇيلەر يەسىنىڭ ءبىرى بەلارۋس ازاماتى ەكەن. ەندى وپپوزيتسيونەر ون جىلعا دەيىن باس بوستاندىعىنان ايىرىلۋى مۇمكىن.
ينتەرنەت ماتەريالدارى نەگىزىندە ازىرلەندى.
