قوعامداعى ءدىني احۋال توڭىرەگىندەگى شيەلەنىستەرگە جۇرتشىلىقتىڭ الاڭ كوڭىلمەن قاراۋى – قۇلشىلىق قىلۋدىڭ ءمانىسىن تەرەڭنەن تۇيسىنە الماۋشىلىقتىڭ, يمان ۇعىمىن عيبادات تۇسىنىگىنەن ايىرا الماي داعدارۋشىلىقتىڭ بەلگىسىندەي كورىنەدى. مۇنىڭ ءوزى بىزگە يسلامنىڭ رۋحاني الەمىنە تەرەڭدەپ بارۋدىڭ, وعان «جۇرەك كوزىمەن» قايتا قاراۋدىڭ مەزگىلى جەتكەنىن اڭعارتىپ وتىر.
قوعامداعى ءدىني احۋال توڭىرەگىندەگى شيەلەنىستەرگە جۇرتشىلىقتىڭ الاڭ كوڭىلمەن قاراۋى – قۇلشىلىق قىلۋدىڭ ءمانىسىن تەرەڭنەن تۇيسىنە الماۋشىلىقتىڭ, يمان ۇعىمىن عيبادات تۇسىنىگىنەن ايىرا الماي داعدارۋشىلىقتىڭ بەلگىسىندەي كورىنەدى. مۇنىڭ ءوزى بىزگە يسلامنىڭ رۋحاني الەمىنە تەرەڭدەپ بارۋدىڭ, وعان «جۇرەك كوزىمەن» قايتا قاراۋدىڭ مەزگىلى جەتكەنىن اڭعارتىپ وتىر.
بۇگىندە دۇنيە ديدارىن شارپىعان رۋحاني جانە ءدىني داعدارىس قازاق قوعامىن دا اينالىپ وتپەي, الاڭداۋشىلىق تۋعىزا باستادى. اسىرەسە, اعا بۋىن وكىلدەرى جات ىلىمدەردىڭ جەتەگىندە كەتكەن, تەرىس ۋاعىزدىڭ شىرماۋىنا ىلىنگەن جاستاردىڭ ءدىني كوزقاراستارىن ۇعىنا الماي, باس شايقايتىنى راس. مىنە, وسىدان شىعار قورىتىندى قانداي بولماق؟ تەرىس پيعىلدى اعىمداردىڭ تۇزاعىنا تۇسكەن, سولاردىڭ اسەرىنەن اداسۋشىلىققا بوي الدىرعان جانداردى قالىپتى ورتاعا قالاي قايتارۋعا بولادى؟ ارينە, بۇل ساۋالداردىڭ بارلىعىنا جاۋاپ تابۋ, ەڭ الدىمەن, قوعامدى رۋحاني تۇردە ساۋىقتىرۋ ءۇشىن قاجەت.
«ۇلەس-2020» قوعامدىق قورى مەن ءبىلىم جانە عىلىم مينيسترلىگىنىڭ جاستار ءىسى جونىندەگى كوميتەتىنىڭ, سونداي-اق, استاناداعى پوليتەحنيكالىق كوللەدجدىڭ ۇيىتقى بولۋىمەن «ءدىني ەكسترەميزمنىڭ الدىن الۋ» تاقىرىبى بويىنشا ۇيىمداستىرىلعان دارىستە, مىنە, وسى ساۋالدار تالقى تارازىسىنا سالىندى.
كوللەدج ستۋدەنتتەرى مەن وقىتۋشىلارىنا ارنالعان ءدارىسكە ءدىني ەكسترەميزمنىڭ الدىن الۋدا اقپاراتتىق-ناسيحاتتىق جۇمىستاردى بەلسەندى تۇردە جۇرگىزۋ, ءداستۇرلى دىندەردىڭ تاريحى جونىندە جەتكىلىكتى مولشەردە اقپار بەرۋ, قازاقستانداعى كونفەسسياارالىق تۇراقتىلىقتى دامىتۋ, دەسترۋكتيۆتى اعىمداردىڭ نەگىزگى باعىتىن اشكەرەلەۋ, قازاق حالقىنىڭ ءمادەنيەتى مەن رۋحاني مۇراسىن ناسيحاتتاۋ سەكىلدى بىرقاتار ماسەلەلەر وزەك بولدى.
اعارتۋشىلىق باعىتتاعى ءدارىستى جۇرگىزگەن «دەسترۋكتيۆتى ءدىني اعىمداردان زارداپ شەككەندەرگە كومەك كورسەتەتىن ورتالىقتار اسسوتسياتسياسىنىڭ» ديرەكتورى يۋليا دەنيسەنكو: «مۇنداي دارىستەر جاستار ورتاسىنداعى مادەني-رۋحاني سانا-سەزىمىن قالىپتاستىرۋ, ولاردىڭ ءدىني ساۋاتىن كوتەرۋ ماقساتىندا ۇيىمداستىرىلىپ وتىر», – دەي كەلە, بۇل دارىستەر اياسىندا جاستاردىڭ تەرىس اعىمداردىڭ جەتەگىندە كەتپەۋى ءۇشىن ءتيىستى باعىت-باعدار بەرىلەتىنىن اتاپ ءوتتى. ونىڭ ايتۋىنشا, مۇنداي ساۋات اشۋ دارىستەرىنىڭ تاربيەلىك ماڭىزى زور بولاتىندىقتان, كەلەسى كەزدەسۋلەردى استاناداعى ساكەن سەيفۋللين اتىنداعى اگروتەحنيكالىق ۋنيۆەرسيتەتتە ۇيىمداستىرۋ كوزدەلىپ وتىر ەكەن. بۇل وقۋ ورداسىندا «قازاقستانداعى كونفەسسياارالىق جانە ۇلتارالىق كەلىسىمدى قالىپتاستىرۋ جانە نىعايتۋ», «جاستار ورتاسىنداعى مادەني سانانى قالىپتاستىرۋ» تاقىرىپتارىندا دوڭگەلەك ۇستەلدەر ۇيىمداستىرىلماق.
ارينە, يمانى جارىم, ءدىني ساۋاتى تومەن جاستاردىڭ بولمىس-باعدارى كۇماندى اعىمداردىڭ تۇزاعىنا وڭاي ىلىگەتىنىن ەسكەرسەك, مۇنداي سيپاتتاعى دارىستەردى جۇيەلى وتكىزۋدىڭ وزەكتىلىگىن ۋاقىت كورسەتىپ وتىر.
ءلايلا ەدىلقىزى,
«ەگەمەن قازاقستان».
