ورال قالاسىندا قازاقستان جازۋشىلار وداعى باتىس قازاقستان وبلىستىق فيليالىنىڭ وتىرىسى ءوتىپ, وعان قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت جانە توراعانىڭ ورىنباسارى مەرەكە قۇلكەنوۆ قاتىستى.
ۇلىقبەك ەسداۋلەت بيىل 80 جاسقا كەلگەن اقىن ايتقالي نارىكوۆ پەن جەرگىلىكتى فيليالدى وسى كەزگە دەيىن باسقارىپ كەلگەن اقۇشتاپ باقتىگەرەەۆاعا جەمىستى ەڭبەگى ءۇشىن العىس ايتىپ, شاپان مەن كامزول جاپتى.
بۇدان كەيىن قازاقستان جازۋشىلار وداعىنىڭ باسقارما توراعاسىنىڭ ورىنباسارى مەرەكە قۇلكەنوۆ ءسوز الىپ, قالامگەرلەر ۇيىمىنىڭ جەرگىلىكتى بولىمشەسىن بىرنەشە ادامنىڭ كانديداتى تۇسكەنىن, وداق سەكرەتارياتىنىڭ ءبىراۋىزدان شەشىمىمەن فيليال ديرەكتورى بولىپ اقىن باۋىرجان حاليوللا تاعايىندالعانىن جەتكىزدى.
وتىرىستا ورالدىق قالامگەرلەر دە ءسوز الىپ, فيليال الدىندا تۇرعان مىندەتتەر مەن شەشىمىن كۇتكەن ماسەلەلەردى ورتاعا سالدى. اقىن عايساعالي سەيتاق جازۋشىلار وداعى سەكرەتارياتىنىڭ شەشىمىمەن كەلىسەتىنىن ايتىپ, جاڭا باسشىنىڭ جۇمىسىنا ساتتىلىك تىلەدى.
وسى كۇنى قازاقستان جازۋشىلار وداعى مۇشەلەرىنىڭ قاتارى قوس جاس اقىنمەن تولىقتى. ولار – رەسپۋبليكالىق رەسمي ءمۇشايرالاردا باس جۇلدە العان تالانتتى جاس اقىندار ايبول يسلامعالي مەن تالعات مىقي.
باۋىرجان حاليوللا بىزبەن اڭگىمەسىندە تاياۋ بولاشاقتا جۇزەگە اسىرعالى وتىرعان جوسپار-جوبالارى بار ەكەنىن جەتكىزدى. سونىڭ ءبىرى – ورال قالاسىندا اقىن قاسىم امانجولوۆ تۇرعان تاريحي ءۇيدى «قاسىم مەن ابدوللا اتىنداعى ادەبيەت ۇيىنە» اينالدىرىپ, مۋزەي رەتىندە اشۋ. بۇل جونىندە بولاشاقتا كەڭىرەك توقتالاتىن بولامىز.
باتىس قازاقستان وبلىسى
