نازارباەۆ ۋنيۆەرسيتەتىنىڭ اقىلدى جۇيەلەر مەن جاساندى ينتەللەكت ينستيتۋتى (ISSAI) قازاق ءسوزىن اۆتوماتتى تۇردە تانۋ جوباسىن ىسكە قوستى. ونىڭ كومەگىمەن قازاق ءتىلىن جاھاندىق تسيفرلى الەمگە بەلسەندى ەنگىزۋگە بولادى.
جوبانى جۇزەگە اسىرۋ ءۇشىن عالىمدار قازاق تىلىندەگى ەڭ ۇلكەن داۋىستىق دەرەكتەر جيىنتىعىن – 2 مىڭنان استام ادامنىڭ 300 ساعاتتىق جازباسىن جينادى. بۇل زەرتتەمەنى قولدانۋ قازاق ءتىلىن ۆيرتۋالدى كومەكشىلەر ارقىلى تانۋ, ءتۇرلى باعدارلامالاردا جانە «اقىلدى ءۇي» تەحنولوگيالارىندا قولدانۋ سەكىلدى جاڭا مۇمكىندىكتەر تۋعىزادى.
سونىمەن قاتار بۇل جوبا قازاقستاندا ينكليۋزيانىڭ دامۋىنا ۇلكەن سەرپىن بەرەدى. جاڭا تەحنولوگيانى ەرەكشە قاجەتتىلىكتەرى بار ادامدار كەڭىنەن قولداناتىن داۋىستىق جانە ماتىندىك باعدارلامالاردا پايدالانۋعا بولادى.
«بۇرىن ۇلكەن دەرەكتەر جيىنتىعىنىڭ جەتكىلىكتى بولماۋى قازاق ءتىلىن تسيفرلى الەمدە شەكتەيتىن. سوندىقتان ءبىز وسى جوبانى جۇزەگە اسىردىق. ەندى ەكونوميكا مەن قوعامنىڭ دامۋىنا پايدالى بولسىن دەگەن نيەتپەن قازاق تىلىندەگى داۋىستىق دەرەكتەر جيىنتىعىن اشىق باستاپقى كودىمەن بىرگە بارلىق زەرتتەۋشىلەر جانە كاسىپكەرلەرمەن بولىسۋگە دايىنبىز», دەدى ISSAI NU ديرەكتورى, پروفەسسور اتاكان ۆارول.
جوبانىڭ ىسكە قوسىلۋى نازارباەۆ ۋنيۆەرسيتەتىنىڭ اقىلدى جۇيەلەر مەن جاساندى ينتەللەكت ينستيتۋتىنىڭ قۇرىلعانىنا ءبىر جىل تولۋىنا ورايلاستىرىلدى. بيىل 14 قىركۇيەكتە ISSAI ءوزىنىڭ العاشقى تۋعان كۇنىن اتاپ ءوتتى.
وسى سىلتەمە ارقىلى issai.nu.edu.kz/kz-speech-corpus/ قازاق تىلىندەگى داۋىستىق دەرەكتەر جيىنتىعىنا قول جەتكىزۋگە, سونداي-اق قازاق ءتىلىن اۆتوماتتى تۇردە تانۋ جۇيەسىن تەكسەرۋگە بولادى.
