ايماقتار • 26 قىركۇيەك، 2020

اقتاۋدا گەولوگتار اللەياسى اشىلدى

31 رەت كورسەتىلدى

اقتاۋدىڭ 57 جىلدىعىنا وراي، ەلىمىزدىڭ كەن بايلىعىن يگەرۋگە ات سالىسىپ جۇرگەن گەولوگتار قاۋىمىنىڭ قۇرمەتىنە تۇڭعىش رەت اللەيا اشىلدى، دەپ حابارلايدى Egemen.kz.

اشىلۋ سالتاناتىنا وبلىس اكىمىنىڭ ورىنباسارى عالىمجان نيازوۆ، قالا اكىمى نۇرداۋلەت قيلىباي، ارداگەر گەولوگ-بارلاۋشىلار،  قازاقستان مۇنايشى-گەولوگتار قوعامىنىڭ  پرەزيدەنتى بالتابەك مۇقان ۇلى قۋاندىقوۆ جانە ارنايى تەمىرتاۋ قالاسىنان كەلگەن اقتاۋ كەنتىنىڭ اكىمى التىنبەك ەسمۇرزاەۆ باستاعان دەلەگاتسيا قاتىستى. 

اقتاۋ كەنتىنەن كەلگەن دەلەگاتسيا قالانىڭ 57 جىلدىق مەرەيتويىمەن قۇتتىقتاپ، شاھار تۇرعىندارىن مەرەكەمەن قۇتتىقتادى.

"نۇرداۋلەت يگىلىك ۇلىنىڭ شاقىرۋىمەن ارنايى كەلدىك. بۇگىن ەرەكشە كۇن. ەكى اقتاۋدىڭ اكىمدەرى كەزدەستى. الداعى ۋاقىتتا تىعىز ارىپتەستىك قارىم-قاتىناستا بولماقپىز. بۇگىن ەكى ءوڭىردىڭ اراسىندا ساۋدا جانە ەكونوميكالىق قاتىناستاردى ورناتۋ، ءبىلىم، مادەنيەت، دەنساۋلىق سالاسىندا ورتاق جوبالاردى ىسكە اسىرۋ ماقساتىندا ىنتىماقتاستىق تۋرالى مەموراندۋمعا قول قويامىز. اقتاۋ قالاسىنىڭ مەرەيتويىمەن قۇتتىقتايمىن! بىرلىگىمىز ارتا بەرسىن"، دەدى التىنبەك ەسمۇرزاەۆ.

ارحيتەكتۋرالىق نىساندا بۇرعىلاۋ، مۇناي الۋ قوندىرعىسى، گەولوگتاردىڭ اتريبۋتى: بالعا مەن تابىلعان تاس كومپوزيتسياسى بەينەلەندى. ماڭعىستاۋدا اشىلعان كەن-ورىندارىنىڭ ءتىزىمى مەن اتاقتى گەولوگ-بارلاۋشىلاردىڭ ەسىمدەرى جازىلدى. اللەيانىڭ اۆتورى ارداگەر بەيسەنباي بيسەنعاليەۆ، ال قۇرىلىسىن سالۋعا قازاقستان مۇنايشى-گەولوگتار قوعامى مەن وڭىرلىك فيليالىنىڭ قىزمەتكەرلەرى مۇرىندىق بولدى. 

 

سوڭعى جاڭالىقتار

ۇقساس جاڭالىقتار