ايماقتار • 26 قىركۇيەك، 2020

شەكتەن شىققان احۋال جوق

13 رەت كورسەتىلدى

قىركۇيەك ايى باستالعالى بەرى سولتۇستىك قازاقستان وبلىسىنىڭ مەكتەپتەرىندە 20 وقۋشىدان جامان ىندەت تابىلعان، دەپ حابارلايدى Egemen.kz.

بۇل تۋرالى كەشە جۋرناليستەرگە وبلىستىق قوعامدىق دەنساۋلىقتى ساقتاۋ دەپارتامەنتى باستىعىنىڭ ورىنباسارى تاتيانا گورلوۆا جۋرناليستەرگە ايتىپ بەردى.

سول وقۋشىلاردىڭ 7 مەكتەپكە بارىپ جۇرگەندەر جانە 13 مەكتەپتەن تىس ساباق وقيتىندار. بۇلار پەتروپاۆل قالاسى مەكتەپتەرىندە عانا ەمەس وبلىس اۋداندارىنىڭ مەكتەپتەرىنەن تابىلعان. وقۋشىلاردىڭ بويىنان جامان ىندەت اشىق بىلىنبەگەن، ءبارىنىڭ دە سيمپتومدارى جوق. تەك جوتەلگەنگە تۇماۋراتىپ قالدى ما دەپ دارىگەرلەرگە كورسەتكەندە ماماندار جامان ىندەتتىڭ بار-جوعىن تەكسەرتكەندە انىقتالعان. وسى بالالارمەن تىعىز ارالاسقان 109 ادام تەكسەرىلءىپ، ولاردىڭ بىردە بىرەۋىنىڭ بويىنان جامان ىندەت تابىلماعان.  

ت.گورلوۆانىڭ ايتۋىنا قاراعاندا قازىر بويىنان ىندەت تابىلعان بالالار وقشاۋلانىپ، ەم-دوم قابىلداۋدا. ولار وقيتىن مەكتەپتەر دە 7 تاۋلىك كارانتينگە جابىلعان. سونىمەن بىرگە بالاباقشاعا باراتىن ءبىر ءبۇلدىرشىننىڭ بويىنان دا جامان ىندەتتىڭ بەلگىسى تابىلعان. بۇل بوبەك تە قازىر وقشاۋلانىپ، ءتيىستى ەم-دومدار جاسالۋدا. بالاباقشانىڭ ءوزى كارانتينگە جابىلعان. تىعىز ارالاسقان ادامداردىڭ ءبارى تەكسەرىلىپ، ولاردىڭ امان ەكەندىگى انىقتالعان.

وسىندايدا الىپقاشپا داقپىرت جامان. سەنساتسيا ىزدەۋدى قالايتىن بىرەۋلەر سولتۇستىك قازاقستاندا بالالار اراسىنان جامان ىندەت تابىلىپ جاتىر دەپ جالعانعا جار سالىپ جاتىر. ماماننىڭ ايتۋىنا قاراعاندا احۋال شەكتەن شىققان جوق، ءبارى دە قالىپتى جاعدايدا. سوندىقتان ونى جالاۋلاتا بەرۋدىڭ قاجەتى جوق.

سولتۇستىك قازاقستان وبلىسى

سوڭعى جاڭالىقتار

ۇقساس جاڭالىقتار