ايماقتار • 25 قىركۇيەك، 2020

قوستاناي وبلىسىندا قۇس فابريكاسى اشىلادى

69 رەت كورسەتىلدى

الداعى جىلى قوستاناي وبلىسىنا قاراستى قارابالىق اۋدانىندا جىلىنا 20 مىڭ تونناعا دەيىن قۇس ەتىن وندىرەتىن ىرگەلى كاسىپورىن اشىلادى، دەپ حابارلايدى Egemen.kz

Poultry-Agro جشس-ءى يەلىك ەتەتىن قۇس فابريكاسى ىسكە قوسىلسا، 250 ادام تۇراقتى جۇمىسپەن قامتىلماق. اۋداننىڭ الەۋمەتتىك-ەكونوميكالىق دامۋىنا تىڭ سەرپىن بەرەتىن ينۆەستيتسيالىق جوبانىڭ جالپى قۇنى – 5،5 ملرد تەڭگە.

قوماقتى قارجىنىڭ كولدەنەڭ كوك اتتىعا جەم بولماي، ءتيىمدى جۇمسالۋىن سىبايلاس جەمقورلىققا قارسى ءىس-قيمىل دەپارتامەنتى قامتاماسىز ەتەتىن بولادى. جەمقورلىققا قارسى قىزمەت پەن Poultry-Agro سەرىكتەستىگى Protecting Business and Investments جوباسى اياسىندا ءوزارا ىنتىماقتاستىق ورناتىپ، وسىنداي ۇيعارىمعا كەلىپ وتىر. ەكى جاقتى كەلىسىم شارتىنا قول قويۋ ءراسىمى "قوستاناي – ادالدىق الاڭى" جوبالىق وفيسىندە ءوتتى.

ء"وزارا ارىپتەستىك شەڭبەرىندە ءبىز بيزنەس وكىلدەرىنە ءتۇرلى بيۋروكراتيالىق كەدەرگىلەردىڭ، مەملەكەتتىك ورگاندار تاراپىنان جاسالۋى مۇمكىن ءجونسىز تەكسەرىستەر مەن توسىن توسقاۋىلداردىڭ بولماۋىن قاداعالايمىز. ال كاسىپكەرگە جەمقورلىق تاۋەكەلدەرىنىڭ پايدا بولۋىنا سەبەپ بولاتىن جاعدايلاردى تۋىنداتپاي، زاڭ شەڭبەرىندە عانا  جۇمىس ىستەپ، ءوز بيزەنسىن ادال جۇرگىزۋ مىندەتى جۇكتەلەدى.   ءبىزدىڭ باستى ماقساتىمىز – بيزنەسكە قولايلى جاعداي جاساۋ جانە قانداي دا ءبىر سىبايلاس جەمقورلىق تاۋەكەلدەرىنە جول بەرمەۋ"، دەدى سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى قۋانىش بەكباسوۆ.

بۇگىندە قوستاناي وبلىسىندا Protecting Businessand Investments جوباسى اياسىندا جالپى سوماسى 180 ملرد تەڭگە بولاتىن ينۆەستيتسيالىق جوبانى جۇزەگە اسىرىپ جاتقان 44 كاسىپورىن قورعاۋعا الىنعان.  

الايدا كەڭسە ماماندارىنىڭ ايتۋىنشا، سوڭعى ۋاقىتتا وزدەرىمەن كەلىسىم-شارتقا وتىرۋعا نيەت بىلدىرگەن كاسىپكەرلەر قاتارى كوبەيە تۇسكەن. سوندىقتان الداعى ۋاقىتتا ينۆەستورلار قۇقىعىن قورعاۋ بويىنشا جۇرگىزىلەتىن جۇمىس اۋقىمى ەكى ەسە ۇلعايماق. بيىلدىڭ وزىندە 100-دەن استام كاسىپكەردىڭ قۇقىعىن قورعاپ قالدىق.

"مۇنىڭ سىرتىندا، ءتۇرلى قۇقىقتىق كەڭەستەر مەن تاجىريبەلىك كومەك كورسەتىلدى. بيزنەس سالاسىندا تۋىنداعان ماسەلەلەردىڭ وڭ شەشىم تابۋىنا Kazakh Invest اق، كاسىپكەرلىك جانە يندۋستريالىق يننوۆاتسيالىق دامۋ   باسقارماسى، سونداي-اق "اتامەكەن" ۇكپ سىندى تۇراقتى سەرىكتەستەرىمىزدىك كوپ كومەگى ءتيىپ وتىر"، دەدى «Protecting Business and Investments جوبالىق كەڭسەسىنىڭ جەتەكشىسى يۋليا ياروشەنكو.

سوڭعى جاڭالىقتار

ۇقساس جاڭالىقتار