رەسەيدىڭ سانكت-پەتەربۋرگ قالاسىنداعى ۆاگانوۆ اتىنداعى ورىس بالەت اكادەمياسىنىڭ كوركەمدىك جەتەكشىسى ءارى وقۋ ورنىنىڭ پرورەكتورى التىناي اسىلمۇراتوۆا لاۋازىمىن ساقتاپ قالدى. بۇل تۋرالى رف مادەنيەت مينيسترلىگىنىڭ مانبەسىنە سۇيەنگەن يتار-تاسس حابارلادى.
ۆەدومستۆودا اكادەمياعا جاقىندا رەكتوردىڭ مىندەتىن اتقارۋشى بولىپ تاعايىندالعان نيكولاي تسيسكاريدزەنىڭ: «مەنىڭ ەڭ ءبىرىنشى كەلىسىم-شارتقا قول قويعان ادامىم التىناي اسىلمۇراتوۆا بولدى. اكادەمياعا كەلگەن ءبىرىنشى جۇمىس كۇنىمنەن ءجيى ەستىگەنىم دە ونىڭ وقىتۋشىلار قۇرامىندا التىناي اسىلمۇراتوۆانى قالدىرۋ تۋرالى ءوتىنىش بولدى. مەن سول وتىنىشتەردى تىڭدادىم», - دەگەن سوزدەرى كەلتىرىلەدى.
دەگەنمەن, الماتى قالاسىنىڭ تۋماسى بولىپ تابىلاتىن قازاق قىزى التىناي ابدىۋاحيمقىزى اسىلمۇراتوۆانىڭ ورنىنا قايتا تاعايىندالۋىنىڭ باستى سەبەبى, ۆاگانكا رەكتورى مىندەتىن اتقارۋشىنىڭ ايتۋىنشا, «وقۋ پروتسەسىنىڭ ۇزىلىسسىزدىگى مەن ساباقتاستىعىن ساقتاپ قالۋ» بولعان كورىنەدى. «قالعان پرورەكتورلار دا جۇمىستارىن جالعاستىرا بەرەدى», - دەدى ول سوسىن.
ال جەكسەنبى كۇنى ۆاگانوۆكا پروفەسسور-وقىتۋشىلار قۇرامىنىڭ جۇزگە جۋىق ادام قول قويعان اشىق حاتى جاريالاندى. وندا ۇستازدار قاۋىمى نيكولاي تسيسكاريدزەنى اكادەميا رەكتورىنىڭ مىندەتىن اتقارۋشى جانە ۋليانا لوپاتكينانى كوركەمدىك جەتەكشى ەتىپ تاعايىنداۋ تۋرالى كادرلىق شەشىمدى قايتا قاراۋدى تالاپ ەتەدى. اتالمىش شەشىم ۆاگانوۆكا ۇجىمىنىڭ بارىنشا كەرى رەاكتسياسىن تۋعىزىپتى.
رەسەي حالىق ءارتىسى نيكولاي تسيسكاريدزە ۆاگانوۆكانىڭ رەكتورى مىندەتىن اتقارۋشى بولىپ بيىلعى جىلعى 28 قازاندا بەلگىلەندى. مەملەكەتتىك اكادەميالىق ۇلكەن تەاتردا جيىرما جىلدان استام ۋاقىت ەڭبەك ەتكەن ءبيشى 30 ماۋسىمدا ول جەردەن بالەت ءسوليسى رەتىندەگى دە, پەداگوگ-رەپەتيتور رەتىندەگى دە قىسقا مەرزىمدى كەلىسىم-شارتتارىنىڭ مەرزىمى بىتۋىنە بايلانىستى كەتۋگە ءماجبۇر بولعان ەدى. بىراق ول ەشقاشان دا جەكە مەكەمە باسقارىپ كورمەگەن. ۇلكەن تەاتردا دا سوڭعى كەزدەرى جانجالدىڭ ورتاسىندا ءجۇردى.
مۇرات ايتقوجا.
