ايماقتار • 25 قىركۇيەك، 2020

شامالعان ستانساسىندا جۇرگىنشىلەرگە ارنالعان جەر ءۇستى كوپىرى پايدالانۋعا بەرىلدى

26 رەت كورسەتىلدى

بۇگىن الماتى وبلىسى قاراساي اۋدانىنداعى شامالعان ستانساسىندا جىبەك جولى اۋىلىنا وتەتىن تەمىر جول وتكەلىندە جاياۋ جۇرگىنشىلەرگە ارنالعان جەر ءۇستى كوپىرى پايدالانۋعا بەرىلدى، دەپ حابارلايدى Egemen.kz

شامالعان ستانساسىنداعى اينالما اۆتوكولىك جولى مەن جاياۋ جۇرگىنشىلەرگە ارنالعان اتالعان كوپىر وتكەلىنىڭ قۇرىلىسىنا جەرگىلىكتى بيۋدجەتتەن 364،5 ملن تەڭگە بولىنگەن.

سالتاناتتى شارادا قۇتتىقتاۋ ءسوز العان وبلىس اكىمى اماندىق باتالوۆ: "وسىدان ءبىر جىل بۇرىن وسى جەردە قايعىلى وقيعا ورىن الىپ، سول وقيعادان سوڭ ءبىز تۇرعىندارعا كوپىر سالىپ بەرەمىز دەپ ۋادە بەرگەن ەدىك. بۇگىن، مىنە، سول جاڭا كوپىردىڭ اشىلۋىنا جينالىپ تۇرمىز. ءبىر جىل ىشىندە جەرگىلىكتى بيۋدجەتتەن 360 ملن تەڭگەدەن استام قارجى ءبولىپ، جوباسىن دايىندادىق، ساراپتامادان وتكىزىپ، وسى نىساندى سالدىق. قۇرىلىس جۇمىستارىن ساپالى ورىنداعان "دسۋ-13" مەردىگەر كومپانياسىنا راحمەت ايتامىن. سونىمەن بىرگە بۇل جەردە كولىك لەگىنىڭ كوپتىگىنە بايلانىستى، ءبىز "قازاۆتوجول" مەكەمەسىمەن بىرلەسىپ، اينالما جول جاساۋ قاجەت دەپ شەشتىك. كەلەسى جىلدىڭ كۇزىنە ول نىسان دا دايىن بولادى دەپ جوسپارلانىپ وتىر"، دەدى وبلىس اكىمى.

اتاپ وتسەك، جۇرگىنشىلەر كوپىرىنىڭ باسپالداقتارىن قوسقانداعى جالپى ۇزىندىعى 61،56 مەتر، بيىكتىگى – 9،8 مەتر. ەكى جەدەلساتىسى بار، بۇل جۇرگىنشىلەر كوپىرىنىڭ قولايلىلىعىن ارتتىرا تۇسەدى.

جالپى وتكەن جىلدىڭ وزىندە وبلىستا 364،7 كم جول مەن 8 كوپىرگە جوندەۋ جاسالعان. بيىلعى جىلى تاعى 506،6 كم جول مەن 12 كوپىر جوندەلەدى. ءسويتىپ جىل باسىندا جاقسى جانە قاناعاتتانارلىق جاعدايداعى وبلىستىق ماڭىزى بار جولداردىڭ ۇلەسى 81% بولسا، جىلدىڭ سوڭىنا قاراي بۇل كورسەتكىش 84%-عا جەتپەك.

سوڭعى جاڭالىقتار

ۇقساس جاڭالىقتار