قوعام • 25 قىركۇيەك، 2020

Nur Otan پارتياسىنا جاڭا مۇشەلەردى قابىلداۋ كەزىندە بولعان ولقىلىقتار انىقتالدى

45 رەت كورسەتىلدى

Nur Otan پارتياسىنىڭ ورتالىق اپپاراتى نۇر-سۇلتان قالاسىندا جاڭا مۇشەلەردى قابىلداۋ كەزىندە بولعان ولقىلىقتاردى انىقتادى. بۇل تۋرالى پارتيالىق باقىلاۋ كوميتەتىنىڭ وتىرىسى بارىسىندا بەلگىلى بولدى، دەپ حابارلايدى Egemen.kz.

ەلباسى، پارتيا ليدەرى نۇرسۇلتان نازارباەۆتىڭ پارتياىشىلىك سايلاۋدا اشىق، انىق جانە ءادىل داۋىس بەرۋدى قامتاماسىز ەتۋ قاجەتتىگى تۋرالى تاپسىرماسىن ورىنداۋ اياسىندا Nur Otan ورتالىق اپپاراتى پارتيانىڭ جاڭادان قابىلدانعان مۇشەلەرى مەن "پرايمەريز" اقپاراتتىق جۇيەسىندە تىركەۋدەن وتكەندەرگە تالداۋ جۇرگىزەدى.

وسىلايشا، كەزەكتى تەكسەرۋ بارىسىندا ەلوردادا "ازيا ورتالىق سناب" جشس باستاۋىش پارتيا ۇيىمى قابىلداعان 2466 جاڭا پارتيا مۇشەسىنىڭ ەسەپتىك مالىمەتتەرى راستالمادى. وسى ورايدا، 11 قىركۇيەكتەن 4 قازانعا دەيىن پارتياعا قابىلداۋدىڭ توقتاتىلۋىنا قاراماستان، 12-17 قىركۇيەك ارالىعىندا مۇنىڭ ارى قاراي دا جۇزەگە اسىرىلعانى انىقتالدى.

"بۇل ورەسكەل ءتارتىپ بۇزۋشىلىقتار.  بىزگە پارتيادا جەكە "قاجەتتى" كانديداتتار ءۇشىن داۋىس بەرۋدى ۇيىمداستىرۋعا ارنالعان وزدەرىنىڭ ءبىر ساتتىك ماسەلەلەرىن شەشەتىندەر، جاي عانا قارا كوبەيتەتىندەر قاجەت ەمەس.  سوندىقتان داۋىس بەرۋ كەزىندە ىقتيمال بۇرمالاۋلاردى بولدىرماۋ ءۇشىن پرايمەريز كەزەڭىندە پارتياعا قابىلداۋ توقتاتىلدى. وسى فاكتىلەردى ەسكەرە وتىرىپ، پارتيانىڭ استانالىق فيليالى "ازيا تسەنتر سناب" جشس بپۇ-داعى بارلىق پارتيا مۇشەلەرىنىڭ دەرەكتەرىن سالىستىرىپ، تەكسەرۋى ءتيىس"، دەپ مالىمدەدى پارتيالىق باقىلاۋ كوميتەتىنىڭ توراعاسى پاۆەل كازانتسەۆ.

ءباسپاسوز قىزمەتىنىڭ مالىمەتىنشە، پارتيالىق باقىلاۋ كوميتەتىنىڭ تەكسەرۋى بارىسىندا پارتيا مۇشەلەرىن ءبىر تەلەفون نومىرىمەن تىركەۋ دەرەكتەرى انىقتالدى.

مىسالى، اقمولا وبلىسىنىڭ بۋراباي اۋدانىندا ء"بىلىم بۋراباي" جانە "بىرلىك بۋراباي" بپۇ-دا پارتيانىڭ 105 مۇشەسىنىڭ ءبىر تەلەفون ءنومىرى بار. ال قاراعاندى وبلىسىنىڭ بالقاش قالاسىندا "ارداگەر"، "گۇلدەر"، "بالقاش ستانتسياسى" جانە "شيپاگەر" بپۇ-دا ءبىر تەلەفون ءنومىرىنىڭ يەلەرى 279 ادام بولدى.

وتىرىس قورىتىندىسى بويىنشا ايماقتىق جانە اۋماقتىق پارتيالىق باقىلاۋ كوميسسيالارىنا بارلىق ايقىندالعان فاكتىلەردى انىقتاپ، كىنالىلەردى جازالاۋ تاپسىرىلدى.

ەسكە سالا كەتەيىك، بۇعان دەيىن پارتيا توراعاسىنىڭ ءبىرىنشى ورىنباسارى باۋىرجان بايبەك پرايمەريزدە ونلاين-داۋىس بەرۋدىڭ اشىقتىعىن قامتاماسىز ەتۋ ءۇشىن ارنايى راستاۋ (ۆەريفيكاتسيا) جۇيەسى (ينتەرنەت-بانكينگ ۇلگىسى بويىنشا جەكە تۇلعانى انىقتاۋ) قولدانىلاتىنىن ايتقان بولاتىن.

جۇيە قاعيداتى: ء"بىر داۋىس، ءبىر جسن، ءبىر ءموبيلدى ءنومىر جانە ءبىر IP-مەكەنجاي". ياعني، ەشكىم ەكى رەت كىرە المايدى جانە تيىسىنشە، باسقا ادامعا داۋىس بەرە المايدى. مۇنىڭ ءبارى ءار ءتۇرلى بۇرمالاۋشىلىقتاردى، ايلا-شارعىنى، سونداي-اق جاپپاي داۋىس بەرۋگە ماجبۇرلەۋدى بولدىرماۋ ءۇشىن ىستەلىپ وتىر.

پارتيانىڭ ءباسپاسوز قىزمەتى بارلىق ءتارتىپ بۇزۋشىلىق دەرەكتەرى بويىنشا 8 (800) 080 4441 "جەدەل جەلىگە" (قوڭىراۋ شالۋ تەگىن) نەمەسە komek@nurotan.kz ەلەكتروندىق پوشتاعا  حابارلاسۋعا بولاتىنىن اتاپ ءوتتى.  

سوڭعى جاڭالىقتار

ۇقساس جاڭالىقتار