قوعام • 25 قىركۇيەك، 2020

ءماجىلىس دەپۋتاتى جۇمىسپەن قامتۋ ورتالىقتارىنىڭ بىلىعىن اشكەرەلەدى

219 رەت كورسەتىلدى

ءماجىلىس دەپۋتاتى قۇدايبەرگەن ەرجان جۇمىسپەن قامتۋ ورتالىقتارى جوعارى كورسەتكىشتەرگە قانداي جولمەن قول جەتكىزەتىنىن ايتىپ بەردى، دەپ حابارلايدى Egemen.kz

دەپۋتات بۇگىندە جۇمىس ىستەپ تۇرعان 200-گە جۋىق جۇمىسپەن قامتۋ ورتالىعىنىڭ باستى مىندەتى – جۇمىسسىزداردى جۇمىسقا ورنالاستىرۋعا جاردەمدەسۋ ەكەنىن اتاپ ءوتتى. بىراق مۇنداي ورتالىقتار جوعارى كورسەتكىشتەرگە قول جەتكىزۋ ءۇشىن ءتۇرلى زاڭبۇزۋشىلىقتارعا بارىپ جاتادى.

"ماسەلەن، جۇمىسپەن قامتۋ ورتالىقتارىنىڭ قىزمەتكەرلەرى جۇمىس بەرۋشىلەرمەن كەلىسەدى دە ورتالىق جولداماسىمەن قايتادان جۇمىسقا ورنالاستى دەپ بەلگى قويادى. ياعني ەڭبەك نارىعى اقپاراتتىق جۇيەسىنە وزگەرىس ەنگىزۋ ولار ءۇشىن وڭاي. ال شىن مانىندە جاڭا جۇمىس ورنى اشىلعان جوق. بىراق ءىس جۇزىندە الگى ادام ءوز كاسىپورنىندا جۇمىسىن جالعاستىرىپ جاتدادى. وسىلايشا جۇمىسپەن قامتۋ كوبىنە، فورمالدى تۇردە وتەدى"، دەدى دەپۋتات ماجىلىستە وتكەن ۇكىمەت ساعاتىندا.

وسىعان بايلانىستى قۇدايبەرگەن ەرجان جۇمىسپەن قامتۋ پروتسەستەرىن اۆتوماتتاندىرۋ قاجەتتىگى تۋىنداعانىن ايتتى.

سونداي-اق ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ دەپۋتاتتىڭ سوزىمەن تولىق كەلىسەتىنىن ءبىلدىردى.

"مۇنداي پروبلەما بارى جاسىرىن ەمەس. ونى پروكۋراتۋرا تەكسەرىپ، ايقىنداعان. نىسانالى كورسەتكىشتەر ءۇشىن جالعان جۇمىسقا ورنالاستىرۋ، ءبىر مەكەمەدەن شىعارىپ، وعان قايتا كىرگىزۋ جاعدايلارى تىركەلدى. جۇمىسپەن قامتۋ ورتالىعى ادامدى جۇمىسقا جىبەرەردىڭ الدىندا، اقپاراتتىق جۇيە ونىڭ الدىڭعى جۇمىسىن تەكسەرىپ الادى. ءسويتىپ ول ادامعا ءبىر جەردەن جۇمىستان شىعىپ، وعان قايتىپ بارۋىنا اقپاراتتىق جۇيە جول بەرمەيدى"، دەيدى ب.نۇرىمبەتوۆ.

سوڭعى جاڭالىقتار

ۇقساس جاڭالىقتار