العاش رەت پرايمەريز وتكىزۋ تۋرالى ەلباسى, Nur Otan پارتياسىنىڭ توراعاسى نۇرسۇلتان ءابىش ۇلى نازارباەۆ وتكەن جىلدىڭ 21 تامىزىندا پارتيا ساياسي كەڭەسىنىڭ كەڭەيتىلگەن وتىرىسىندا باستاما كوتەرگەن بولاتىن. نۇرسۇلتان ءابىش ۇلى نازارباەۆ پرايمەريزدىڭ باستالۋى قارساڭىندا جاساعان ۇندەۋىندە: «پارتيا بيلىككە جاڭا ادامداردى – ءوز ءىسىنىڭ ناعىز ماماندارىن, بەدەلدى كوشباسشىلاردى, ەلىمىزدىڭ تاعدىرىنا جانى اشيتىن, ءتيىمدى شەشىمدەر قابىلداپ, سىندارلى ۇسىنىستار ەنگىزۋگە قابىلەتتى ادامداردى جىلجىتۋلارى ءتيىس», – دەدى.
ەلىمىزدىڭ ساياسي جۇيەسىندە العاش رەت جاڭاشا فورماتتا قولدانىسقا ەنگەن پرايمەريز كوپشىلىكتىڭ ەرەكشە ىقىلاسى مەن قىزۋ قولداۋىنا يە بولىپ وتىر. ويتكەنى ول بارشا قازاقستاندىقتارعا, ونىڭ ىشىندە ايەل ازاماتتار مەن كرەاتيۆتى جاستارعا ەلدى دامىتۋ جونىندەگى جاڭاشا يدەيالارىمەن جانە تىڭ باستامالارىمەن بولىسۋگە, ءوز قابىلەتتەرى مەن الەۋەتتەرىن كەڭىنەن تانىتۋعا, سول ارقىلى قازاقستان رەسپۋبليكاسى پارلامەنتىنىڭ ماجىلىسىنە, بارلىق دەڭگەيدەگى ماسليحاتتارعا, مەملەكەتتىك ورگاندارعا وتۋگە «الەۋمەتتىك ليفت» قىزمەتىن اتقاراتىن بولادى. پرايمەريزدىڭ تاعى ءبىر جاعىمدى تۇسى – پارتيالىق تىزىمدەگى ايەل ازاماتتار ۇلەسىنىڭ 30 پايىزدان, ال جاستار ۇلەسىنىڭ 20 پايىزدان كەم بولماۋى. حالقىمىزدىڭ «انا رازى بولماي, اللا رازى بولمايدى» دەگەن دانا ءسوزى بار. «ايەل ءبىر قولىمەن بەسىك تەربەتسە, ەكىنشى قولىمەن الەمدى تەربەتەدى» دەپ تە ءدوپ باسىپ ايتقان. بۇگىنگى قازاق ايەلى وتباسى قامىن عانا ويلاپ قويماي, شارۋاشىلىقتىڭ ءتۇرلى سالالارىندا تاماشا تابىستارعا قول جەتكىزە وتىرىپ, ەلىمىزدىڭ ءوسىپ-وركەندەۋىنە ەداۋىر ۇلەس قوسۋدا. پرايمەريز ەرلەرمەن قاتار ايەل ازاماتتاردىڭ دا مەملەكەتتىك ساياساتقا ىقپالداسۋى ءۇشىن تەڭ مۇمكىندىكتەر تۋعىزۋدا. سونىمەن قاتار Nur Otan پارتياسى جانىنداعى Jas Otan جاستار قاناتىنىڭ مۇشەسى, جاس كاسىپكەر رەتىندە پرايمەريزدىڭ بىزگە – جاستارعا بەرىپ وتىرعان وسى مۇمكىندىگى ءۇشىن ءدان ريزاشىلىعىمدى بىلدىرەمىن. سەبەبى, بۇگىنگى كۇننىڭ جاستارى ەكونوميكانىڭ ءتۇرلى سالالارىندا ايانباي ەڭبەك ەتىپ, ەلىمىزدىڭ ساياسي ومىرىنە بەلسەندى قاتىسۋدا جانە ولاردىڭ اراسىندا ناعىز كوشباسشىلار ايقىندالۋدا.
بۇكىلحالىقتىق پارتيامىزدىڭ بىزگە بەرىپ وتىرعان وسى مۇمكىندىگىن پايدالانىپ, مەن دە پرايمەريزگە قاتىسۋعا بەل بۋدىم. سەبەبى Nur Otan پارتياسىنىڭ ەكونوميكالىق جانە ساياسي رەفورمالاردى جۇزەگە اسىرۋعا ىقپال ەتۋگە, قوعامدى ودان ءارى دەموكراتيالاندىرۋعا, ازاماتتاردىڭ ءومىر ءسۇرۋ دەڭگەيىن ارتتىرۋعا باعىتتالعان يدەولوگيالىق باعدارلارى مەنىڭ وسى تۇرعىداعى كوزقاراستارىممەن تولىق ۇيلەسىم تابادى. پرايمەريزگە بايلانىستى ۇگىت-ناسيحات جۇمىستارىنا, دەباتتارعا قاتىسىپ ءجۇرىپ, ءوزىم تۋىپ وسكەن شىمكەنت قالاسىندا تالانتتى جاستاردىڭ, ءورشىل ازاماتتار مەن بىلىكتى باسقارۋشىلاردىڭ كوپتىگىنە كوزىم جەتتى. اقتىق سىنعا ءبىلىم, دەنساۋلىق ساقتاۋ, مادەنيەت, سپورت, اۋىل شارۋاشىلىعى, ونەركاسىپ, كاسىپكەرلىك جانە وزگە دە سالالاردىڭ ماماندارى, بۇقارالىق اقپارات قۇرالدارىنىڭ وكىلدەرى ءتۇسىپ وتىر. پرايمەريزگە قاتىسۋشى ۇمىتكەرلەردىڭ ارقايسىسىنىڭ وزىندىك وي-پىكىرى, قالىپتاسقان ۇستانىمى مەن تاجىريبەسى بار. ەڭ ۇتىمدىسى سول, پرايمەريز اتتى ساياسي دودا الاڭى وزىق وي-پىكىرلەر مەن يننوۆاتسيالىق يدەيالاردىڭ گەنەراتورىنا اينالا وتىرىپ, ۇمىتكەرلەر اراسىندا سىندارلى باسەكەلەستىك احۋال قالىپتاستىردى.
بۇگىندە الەمدى ابىگەرگە سالعان كوروناۆيرۋس ىندەتى ەل ەكونوميكاسىنا ايتارلىقتاي نۇقسان كەلتىرىپ وتىر. ەل پرەزيدەنتى قاسىم-جومارت توقاەۆ ءوزىنىڭ «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا ءداستۇرلى جولداۋىندا: «بولاشاقتا كوش باستايتىن مەملەكەتتەردىڭ باسەكەگە ءتۇسۋ قابىلەتى ءدال وسىنداي داعدارىستار مەن ىرگەلى وزگەرىستەر كەزىندە شىڭدالادى. قازاقستان جاڭا الەمدە ءوزىنىڭ لايىقتى ورنىن الۋعا ءتيىس», دەپ مالىمدەدى. ەندەشە پرايمەريزگە قاتىسۋشى ۇمىتكەرلەردىڭ دە دىتتەگەنى – تاۋەلسىز قازاقستاننىڭ تۇعىرىن بيىكتەتۋ, ونىڭ الەم ەلدەرى اراسىنداعى تاۋاشاسىن بەكەمدەي ءتۇسۋ. دودالى بايگەدە قازاقستاننىڭ قارىشتاپ دامۋىنا ءوزىنىڭ كرەاتيۆتى يدەيالارىمەن, جاڭاشا باستامالارىمەن ناقتى ۇلەس قوس الاتىن, جۇزدەن جۇيرىك, مىڭنان مىقتى ازاماتتاردىڭ جەڭىپ شىعاتىنى داۋسىز.
نۇرسۇلتان بالابيەۆ,
پرايمەريزگە قاتىسۋشى ۇمىتكەر, Nur Otan پارتياسى جانىنداعى Jas Otan جاستار قاناتىنىڭ مۇشەسى, كاسىپكەر
تۇركىستان وبلىسى
