ەلوردا • 24 قىركۇيەك، 2020

ەلوردادا قوعامدىق كولىكتەر تسيفرلاندىرىلادى

17 رەت كورسەتىلدى

جىل اياعىنا دەيىن قالاداعى كوشە قيىلىستارىنىڭ 80% وسى تسيفرلى جۇيەمەن قامتىلاتىن بولادى. اتالعان شارا تاۋلىكتىڭ قاربالاس ۋاقىتىندا ءتۇيىندى باعىتتاردىڭ جۇكتەمەسىن ازايتادى. بۇل تۋرالى نۇر-سۇلتان قالاسىنىڭ اكىمى التاي كولگىنوۆ ءوزىنىڭ "ينستاگرام" پاراقشاسىندا جازدى، دەپ حابارلايدى Egemen.kz

"بۇگىن Kazan Digital Week حالىقارالىق فورۋمىنا ونلاين قاتىستىم. باسقا ەلدەردەگى ارىپتەستەرمەن بىرگە ينتەللەكتۋال ترانسپورت جۇيەلەرىن تالقىلاپ، تاجىريبەمىزبەن بولىستىك. قوعامدىق تاسىمالدىڭ مودەرنيزاتسياسى مەن تسيفرلانۋى − باسىم باعىتتاردىڭ ءبىرى. اۆتوبۋستاردى جاڭارتىپ قانا قويماي، جاڭا مارشرۋتتار قوسىپ، جول سالىپ، قالالىقتاردىڭ ىڭعايى ءۇشىن ەلەكتروندى قارىم-قاتىناس مەحانيزمدەرىن ەنگىزۋ كەرەك"، دەيدى ەلوردا اكىمى.

ءبىرىنشى. ينتەللەكتۋال ترانسپورت جۇيەسىن دامىتۋ

كوشە قيىلىستارىندا تۇرعان باعدارشامداردىڭ 50% اداپتيۆ باسقارۋ جۇيەسىمەن قامتىلعان. مۇنداي تەحنولوگيا كولىك اعىنىن اۆتوماتتى رەجىمدە ەسەپتەپ، باعىتتار بويىنشا شەشىم قابىلدايدى. بۇل كولىك اعىنىنىڭ جىلدامدىعىن ارتتىرىپ، جولدا جوعالاتىن ورتاشا ۋاقىتتى 20% قىسقارتۋعا مۇمكىندىك بەردى. جىل اياعىنا دەيىن قالاداعى كوشە قيىلىستارىنىڭ 80% وسى تسيفرلى جۇيەمەن قامتىلادى. بۇل – تاۋلىكتىڭ قاربالاس ۋاقىتىندا ءتۇيىندى باعىتتارعا جۇكتەمەنى ازايتادى.

ەكىنشى. قاۋىپسىزدىكتى قامتاماسىز ەتۋ

باقىلاۋ كامەرالارى جول-كولىك وقيعالارىن 20% قىسقارتىپ، ولىمگە اكەپ سوعاتىن جاعدايلاردى 40% ازايتۋعا مۇمكىندىك بەردى.

ءۇشىنشى. قوعامدىق تاسىمالدى دامىتۋ

قالالىقتاردىڭ ىڭعايى ءۇشىن قالاماڭى كولىك قاتىناسى ەنگىزىلدى (32 ەلدى مەكەنگە قىزمەت كورسەتىلەدى); ەكسپرەسس، sport shuttle bus مارشرۋتتار دا بار (بۇقارالىق مادەني شارالار ءۇشىن). تۇرعىنداردىڭ ءوتىنىشى بويىنشا 40 مارشرۋت وڭتايلاندىرىلعان.

قوعامدىق كولىكتەردى 70%-دان استامىن جاڭارتىپ، جىل باسىندا كوشەلەرگە 100 جاڭا ەلەكتر اۆتوبۋستار شىقتى. جىل اياعىنا دەيىن ەلەكتر اۆتوبۋستاردىڭ تاعى ءبىر پارتياسى شىعادى.

بارلىق اۆتوبۋس جولاقى تولەۋدىڭ ەلەكتروندى جۇيەسىمەن جابدىقتالعان، بۇل كارانتين كەزەڭىندە ىندەت جۇقتىرۋ ىقتيمالدىعىن ازايتتى. ەلەكتروندى ەسەپ ايىرىسۋعا 100% ءوتۋدىڭ ارقاسىندا 6 ملرد تەڭگە "كولەڭكەلى اينالىمنان" شىعارىلدى.

سونىمەن بىرگە قالالىقتار اۆتوبۋستاردىڭ قاي جەردە كەلە جاتقانىن موبيل قوسىمشا ارقىلى قاراپ، ايالدامالارداعى ەلەكتروندى تابلولاردان كورە الادى.

"اۆتوبۋس جولاقتارى دا ناتيجەلى بولدى: اۆتوبۋستاردىڭ جولداعى ورتاشا ۋاقىتى 15-20% قىسقاردى. جولاقتاردىڭ سانىن 24-تەن 36-عا كوبەيتپەكپىز. بۇل اۆتوبۋستى كۇتۋ ۋاقىتىن جانە 15% ازايتادى. بارلىق باعىتتار بويىنشا جۇمىستار تۇراقتى جۇرگىزىلىپ كەلەدى"، دەپ جازدى التاي كولگىنوۆ.

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار