قوعام • 24 قىركۇيەك، 2020

جۇمىسپەن قامتۋدىڭ جول كارتاسى 179 مىڭ ادامدى جۇمىسپەن قامتاماسىز ەتتى

13 رەت كورسەتىلدى

ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ پارلامەنت ماجىلىسىندەگى ۇكىمەت ساعاتىندا دەپۋتاتتارعا حالىقتى كىرىسپەن قامتاماسىز ەتۋ ماقساتىندا جۇمىس ورىندارىن قۇرۋ بويىنشا قولعا الىنعان شارالار جايىن جەتكىزدى، دەپ حابارلايدى Egemen.kz.

ەڭبەكمينىنىڭ باسشىسى ءوز ءسوزىنىڭ باسىندا اتاپ وتكەندەي، كوروناۆيرۋس پاندەمياسى مەن جاڭا ەكونوميكالىق جاعدايدا حالىقتى جۇمىسپەن قامتاماسىز ەتۋگە ەرەكشە باسىمدىق بەرىلەدى. بۇل تۇستا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى ايرىقشا مانگە يە. ونى جۇزەگە اسىرۋ ارقىلى جۇمىسسىز جانە ءوزىن جۇمىسپەن قامتىعان حالىقتى تۇراقتى جۇمىسپەن قامتۋعا، جاڭا جۇمىس ورىندارىن قۇرۋدى قولداۋعا مۇمكىندىك تۋادى.

«2017 جىلدان بەرى باعدارلاماعا 2 ميلليوننان استام ادام، ونىڭ ىشىندە بيىل 430 مىڭ ادام قاتىستى. باعدارلامانىڭ العاشقى باعىتى بويىنشا 394 مىڭ ادامدى ءۇش كومپونەنت: تەحنيكالىق جانە كاسىپتىك ءبىلىم بەرۋ ۇيىمدارىندا، قىسقامەرزىمدى كۋرستاردا جانە دە «بيزنەس باستاۋ» جوباسى اياسىندا كاسىپكەرلىك نەگىزدەرىنە وقىتۋ قاراستىرىلدى. ەكىنشى باعىت شەڭبەرىندە 111 مىڭ ادامعا كاسىپكەرلىكتى دامىتۋعا كومەك كورسەتىلدى. ءۇشىنشى باعىتتا سۋبسيديالاناتىن جۇمىس ورىندارىنا ورنالاستىرۋ جانە حالىقتىڭ ەڭبەك ۇتقىرلىعىن ارتتىرۋ ارقىلى 598 مىڭ ادام جۇمىسپەن قامتىلدى»، - دەدى ءبىرجان نۇرىمبەتوۆ.

ءمينيستردىڭ ايتۋىنشا، ميكروكرەديتتەر جانە گرانتتار بەرۋ ارقىلى ءوزىن جۇمىسپەن قامتىعان جانە جۇمىسسىزدار قاتارىنان كاسىپكەرلەردى قالىپتاستىرۋ 153 مىڭ تۇراقتى جۇمىس ورنىن قۇرۋعا سەپتىگىن تيگىزدى،ونىڭ ىشىندە ميكروكرەديت پەن گرانت الۋشىلار قوسىمشا 42 مىڭ جۇمىس ورنىن قۇردى.

46 مىڭ قاتىسۋشى 8 مىڭ اەك-كە دەيىنگى مولشەردە كرەديت الدى. ولارعا جەڭىلدىكتى جاعداي جاسالدى - جىلدىق 6%-بەن 7 جىلعا دەيىن. ميكروكرەديت الۋشىلاردىڭ سانى ءۇش جىلدا 2،5 ەسەگە، قوسىمشا جۇمىس ورىندارىنىڭ سانى 5 ەسەگە ءوستى. العاش رەت ميكروكرەديت الۋشىلاردىڭ 63%-ى ءوز بيزنەستەرىن اشتى.

گرانت مولشەرى 200 اەك-ءتى قۇرايدى، قازىر ول 555 مىڭ تەڭگەگە تەڭ. 65 مىڭ ادام گرانت الدى، ونىڭ 56 مىڭى جەكە كاسىپكەر رەتىندە تىركەلىپ، سالىق تولەي باستادى ءارى ساقتاندىرۋ جانە زەينەتاقى جۇيەلەرىنە ەندى.           

«باعدارلاماعا قاتىسۋشىلاردىڭ ەسەبىنەن شاعىن جانە ورتا بيزنەس سالاسىنداعى جۇمىسپەن قامتۋدىڭ ءوسۋ ۇلەسى 11%-دى قۇرايدى. ەكونوميكاعا قوسىمشا وڭ اسەر شىعارىلاتىن ءونىمنىڭ جىلىنا شامامەن 73،7 ملرد تەڭگەگە وسۋىمەن باعالانادى»، - دەدى ءبىرجان نۇرىمبەتوۆ.

ەڭبەك جانە حالىقتى الەۋمەتتىك قورعاۋ مينيسترلىگىنىڭ باسشىسى جۇمىسسىزدىقتان الەۋمەتتىك قورعاۋ ارقىلى حالىقتىڭ نىسانالى توپتارى ءۇشىن مەملەكەت سۋبسيديالايتىن 586 مىڭ ۋاقىتشا جۇمىس ورنى قۇرىلعانىن حابارلادى.

وسىلايشا، جاستار پراكتيكاسى اياسىندا ءبىلىم بەرۋ ۇيىمدارىنىڭ 115 مىڭ تۇلەگى جۇمىسپەن قامتىلدى. ونىڭ 54%-ى تەحنيكالىق جانە كاسىپتىك ءبىلىم بەرۋ ۇيىمدارىنىڭ، ال 40%-ى جوعارى وقۋ ورىندارىنىڭ تۇلەكتەرى. جوو مەن تجكب-ءنىڭ ءاربىر ونىنشى تۇلەگى 69،5 مىڭ تەڭگە جالاقى الىپ، وسى قولداۋ شارالارىمەن قامتىلعان. پراكتيكادان وتكەن تۇلەكتەردىڭ جارتىسى ونى وتكەن جەرىندە تۇراقتى جۇمىسقا ورنالاسۋدا.

84 مىڭ ادام الەۋمەتتىك جۇمىس ورىندارىنا جۇمىسقا ورنالاستى، ولار – نەگىزىنەن كوپبالالى انالار، مۇمكىندىكتەرى شەكتەۋلى، باس بوستاندىعىنان ايىرۋ ورىندارىنان بوساپ شىققان ادامدار، جەتىم بالالار، زەينەتالدى جاستاعى ادامدار. 12 ايدا 65،6 مىڭ تەڭگە ورتاشا جالاقىنىڭ 35،6%-ى سۋبسيديالانادى. سودان كەيىن 68%-ى تۇراقتى جۇمىسقا ورنالاسادى.           

ءۇش جىلدان استام ۋاقىت ىشىندە قوعامدىق جۇمىستارعا 387 مىڭ ادام جىبەرىلدى. بۇل بەلگىلى ءبىر سەبەپتەرمەن ءوز بەتىنشە بوس جۇمىس ورىندارىنا تۇرا الماعان ازاماتتار. قوعامدىق جۇمىستارداعى ورتاشا جالاقى 57،4 مىڭ تەڭگەنى قۇرايدى. قوعامدىق جۇمىستارعا قاتىسۋشىلاردىڭ 61%-ىنىڭ تەك ورتا ءبىلىمى بار، 75%-ى جۇمىسسىز، شالعاي اۋىلداردا تۇرادى. بۇل ادامدار تۇراقتى جۇمىسقا ورنالاسقانعا دەيىن جۇمىسسىزدار ەسەبىنەن شىعارىلمايدى.           

«جۇمىس ورىندارىن سۋبسيديالاۋ ەڭبەك نارىعىنداعى جاعدايعا جەدەل جانە يكەمدى ارەكەت ەتۋ قۇرالى رەتىندە تانىلدى. وسى تەتىكتى قولدانا وتىرىپ جۇمىسپەن قامتۋعا جاردەمدەسۋ جانە كاسىپكەرلىككە تارتۋ ارقىلى جالپى 739 مىڭ جۇمىس ورنى قۇرىلدى، ونىڭ 153 مىڭى - تۇراقتى جانە 586 مىڭى - ۋاقىتشا. 2017 جىلدان 2019 جىلعا دەيىنگى كەزەڭدە تۇراقتى جۇمىس ورىندارىنىڭ سانى 7 ەسەگە ءوستى»، - دەپ اتاپ ءوتتى ءبىرجان نۇرىمبەتوۆ.           

مينيستر سونىمەن بىرگە قر ەڭبەك جانە حالىقتى الەۋمەتتىك قورعاۋ مينيسترلىگى «ەڭبەك» باعدارلاماسىنىڭ قۇرالدارىن ۇنەمى جەتىلدىرىپ وتىراتىنىن اتاپ ءوتتى.           

«ماسەلەن، ءبىز ەڭبەك ءوتىلى جوق جاستاردى جۇمىسقا ورنالاستىرۋ ءۇشىن «العاشقى جۇمىس ورنى» جوباسىن جۇزەگە اسىرىپ جاتىرمىز. تاعى ءبىر باستاما - «ۇرپاقتار كەلىسىمشارتى»، بۇل زەينەتكەرلىككە شىعاتىن مامانداردىڭ التى اي بويى ءوز تاجىريبەسى مەن جۇمىس ورنىن جاڭا كادرلارعا «تابىستاۋى». ءبىز سونىمەن قاتار مۇمكىندىكتەرى شەكتەۋلى ادامداردىاتاۋلى جۇمىسپەن قامتۋدى جۇزەگە اسىرامىز. بۇل رەتتە 3115 ادام تۇراقتى جۇمىسقا، 6877 ادام ۋاقىتشا جۇمىسقا ورنالاستىرىلدى»، - دەدى ءبىرجان نۇرىمبەتوۆ.           

ەڭبەكمينىنىڭ باسشىسىكوروناۆيرۋستىقپاندەميادان تۋىنداعان جاھاندىق داعدارىس جالپى الەمدىك ەكونوميكاعا ايرىقشا اسەر ەتكەنىن باسا ايتتى. بارلىق ەلدەر ەكونوميكاعا زارداپ شەكتىرتپەي ادام ءومىرىن قۇتقارۋ سياقتى قيىندىققا تاپ بولدى.            

«ۇكىمەت مەملەكەت باسشىسىنىڭ تاپسىرماسى بويىنشا حالىقتى قولداۋ جانە ەكونوميكانى تۇراقتاندىرۋ بويىنشا شۇعىل شارالار كەشەنىن قابىلدادى. مەملەكەتتىك الەۋمەتتىك ساقتاندىرۋ قورىنان كىرىستى جوعالتقانى ءۇشىن ءبىر ەڭ تومەنگى جالاقى مولشەرىندەگى الەۋمەتتىك تولەم - 11 جانە 2 مامىر ارالىعىنداعى توتەنشە جاعداي كەزەڭىندە 4،6 ميلليون ادامعا، 5 شىلدە مەن 17 تامىز ارالىعىندا كارانتيندى كۇشەيتۋ كەزىندە 2،4 ملن ادامعا تاعايىندالدى. شىعىستاردىڭ جالپى سوماسى 475 ميللياردتان استام تەڭگەنى قۇرادى. حالىقتىڭ الەۋمەتتىك وسال توپتارىنا، ونىڭ ىشىندە جۇمىسسىزدارعا ازىق-ت ۇلىك-تۇرمىستىق جيىنتىق رەتىندە 2 اەك كولەمىندە تولەم جۇرگىزىلدى. مۇنداي تولەمدى ناۋرىز-مامىر ايلارىندا 1 ميلليون ادام، ال شىلدەدە 1،1 ميلليون ادام الدى»، - دەدى ول.           

الەۋمەتتىك قولداۋ شارالارىمەن قاتار جۇمىسپەن قامتۋدىڭ جول كارتاسى جۇمىسپەن قامتۋعا جاردەمدەسۋگە ايتارلىقتاي ۇلەس قوستى، بۇل جەردە جوبالاردى ىسكە اسىرۋعا 1 تريلليون تەڭگە ءبولىندى.           

«جۇمىسپەن قامتۋدىڭ جول كارتاسى 179 مىڭ ادامدى جۇمىسپەن قامتاماسىز ەتتى. ولاردىڭ ورتاشا جالاقىسى 130 مىڭ تەڭگەنى قۇرايدى.باعدارلاماعا قاتىسۋشىلاردىڭ وتباسى مۇشەلەرىن ەسكەرە وتىرىپ، 700 مىڭعا جۋىق ادام كىرىسپەن قامتاماسىز ەتىلدى. شاعىن جانە ورتا بيزنەستىڭ19 مىڭ سۋبەكتىسى 370 ميلليارد تەڭگەگە تاپسىرىس الدى، بۇل 114 مىڭ جۇمىس ورنىن ساقتاپ قالۋعا مۇمكىندىك بەردى. سونىمەن قاتار، جول كارتاسى جوبالارىن ىسكە اسىرۋ بولاشاقتا 100 مىڭنان استام تۇراقتى جۇمىس ورنىن اشۋعا نەگىز بولادى»، - دەدى مينيستر.           

جول كارتاسى داعدارىس كەزەڭىندە حالىقتى جۇمىسپەن قامتۋ جانە تابىسپەن قامتاماسىز ەتۋدەن باسقا، الەۋمەتتىك، كوممۋنالدىق جانە كولىك ينفراقۇرىلىمىنىڭ جوندەلگەن جانە جاڭا نىساندارى تۇرىندە بولاشاق ءۇشىن الەۋمەتتىك قور قالىپتاستىرۋدا. بۇل 3 اۋىسىمدى جانە اپاتتى مەكتەپتەر، ءبىلىم بەرۋ، دەنساۋلىق ساقتاۋ، اۋىل تۇرعىندارىنىڭ تازا اۋىزسۋعا قولجەتىمدىلىگى، سۋارمالى، جايىلىمدىق جەرلەردىڭ اۋماعىن ۇلعايتۋ جانە اۋىلدىق ەلدىمەكەندەردى گازداندىرۋ سياقتى تۇيتكىلدى ماسەلەلەردىڭ ءبىر بولىگىن شەشۋگەمۇمكىندىك بەرەدى.           

سونىمەن قاتار 2020 جىلى باسقا مەملەكەتتىك باعدارلامالار شەڭبەرىندە جۇمىس ورىندارىن قۇرۋ قارقىنىن ۇستاپ تۇرۋ مۇمكىن بولدى. 8 ايدا 238 مىڭ جۇمىس ورنى قۇرىلدى. بۇل ىسكە نۇرلى جول (117 مىڭ)، نۇرلى جەر (28 مىڭ)، تسيفرلىق قازاقستان (25 مىڭ)باعدارلامالارىەڭ كوپ ۇلەس قوسقان.           

ءبىرجان نۇرىمبەتوۆتىڭ ايتۋىنشا، قابىلدانعان شارالاردىڭ ارقاسىندا ىشكى ەڭبەك نارىعى ءۇشىن اۋىر زارداپتاردىڭ الدىن الۋعا، جۇمىس ورىندارىنىڭ جاپپاي قىسقارتىلۋىنا جانە جۇمىسسىزدىقتىڭ ايتارلىقتاي وسۋىنە جول بەرمەۋگە مۇمكىندىك تۋدى.           

مينيستر ءسوزىنىڭ سوڭىندا Covid-19 پاندەمياسى جانە كارانتيندىك شەكتەۋ شارالارىن بىرنەشە رەت ەنگىزۋ ىقتيمالدىعى جاعدايىندا قر ۇكىمەتى ەڭبەك باعدارلاماسىن، جۇمىسپەن قامتۋدىڭ جول كارتاسىن جانە باسقا دا مەملەكەتتىك باعدارلامالاردى ىسكە اسىرۋ اياسىندا حالىقتى جۇمىسپەن قامتاماسىز ەتۋ جانە جۇمىس ورىندارىن قۇرۋ بويىنشا جەدەل جانە جۇيەلى شارالاردى قابىلداۋعا دايىن ەكەنىن اتاپ ءوتتى.

سوڭعى جاڭالىقتار

ۇقساس جاڭالىقتار