ءبىلىم • 24 قىركۇيەك، 2020

ونەر اكادەمياسىنىڭ رەكتورى ونلاين ەسەپ بەردى

80 رەت كورسەتىلدى

ت.ق.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى اقان ابدۋاليەۆ كوپشىلىك الدىندا ەسەپ بەرۋ كەزدەسۋىن ونلاين رەجىمدە وتكىزدى، دەپ حابارلايدى Egemen.kz

قر پرەزيدەنتى قاسىم-جومارت توقاەۆ ورتالىق اتقارۋشى ورگاندار باسشىلارىنىڭ، اكىمدەردىڭ جانە ۇلتتىق جوعارى وقۋ ورىندارى رەكتورلارىنىڭ حالىققا ەسەپ بەرۋ كەزدەسۋلەرىن وتكىزۋ تۋرالى جارلىققا وزگەرىس ەنگىزگەن ەدى. وسى وزگەرىستەرگە ساي  ونلاين-ترانسلياتسيالار ۇيىمداستىرا وتىرىپ، جۇرتشىلىق وكىلدەرىمەن ەسەپ بەرۋ كەزدەسۋلەرىن وتكىزۋ تۋرالى تاپسىرما بەرىلگەن ەدى. اتالعان ۇندەۋ اياسىندا ت.ق.جۇرگەنوۆ اتىنداعى قازۇوا رەكتورى 2019-2020 وقۋ جىلىندا اتقارىلعان جۇمىستار جايىمەن ءبولىسىپ، كەزەكتى ەسەپ بەرۋ جيىنىن ۇيىمداستىردى.

شارا ZOOM، YouTube پلاتفورمالارى، ينستاگرام، Facebook الەۋمەتتىك جەلىلەرى ارقىلى ءوتتى. قازاقستاننىڭ مادەنيەت جانە سپورت مينيسترلىگىنىڭ وكىلدەرى، قازاقستاننىڭ جەتەكشى جوعارعى وقۋ ورىندارىنىڭ رەكتورلارى، تەاتر جانە ونەر مەكتەپتەرىنىڭ باسشىلارى، باق وكىلدەرى، اكادەميا ۇجىمى، اتا-انالار، ستۋدەنتتەر ونلاين ەسەپ بەرۋ جيىنىنىڭ كۋاسى بولدى.

ت.ق.جۇرگەنوۆ اتىنداعى قازۇوا رەكتورى ءوز بايانداماسىندا ءبىلىم ورداسىنىڭ بىرقاتار جەتىستىكتەرىن اتاپ ءوتتى. وتكەن جىلعى الەمنىڭ جەتەكشى رەيتينگتەرى Webometrics مالىمەتتەرىنە سايكەس، اكادەميا قازاقستان بويىنشا  – 42 ورىن يەلەنگەن بولسا، حالىقارالىق ARES رەيتينگىسىندە ءوز كورسەتكىشتەرىن جوعارىلاتىپ – 19 ورىنعا تابان تىرەدى. سونداي-اق، جەتەكشى رەيتينگ بولىپ تابىلاتىن اككرەديتتەۋ جانە رەيتينگ تاۋەلسىز اگەنتتىگى (ناار) اكادەميانىڭ ۇلتتىق ءبىلىم بەرۋ نارىعىنداعى جەتەكشى ورنىن كەزەكتى رەت مويىندادى. باس رەيتينگ قورىتىندىسى بويىنشا قازاقستان رەسپۋبليكاسى جوعارى وقۋ ورىندارىنىڭ اراسىندا اكادەميا 8 ورىندى يەلەنسە، ونەر ءبىلىم بەرۋ وردالارىنىڭ اراسىنداعى رەيتينگتە ءبىرىنشى ورىندى يەلەنىپ كوش باستاپ تۇر.

​ا.ابدۋاليەۆ اكادەميانىڭ الداعى جوسپارلارىنا دا كەڭىرەك توقتالىپ ءوتتى. سونىڭ ىشىندە، مەملەكەت باسشىسى قاسىم-جومارت توقاەۆتىڭ: "الداعى 5 جىلدىڭ ىشىندە كەمىندە 90 مىڭ جاتاقحانا ورنى سالىنۋى كەرەك. جاتاقحانا وتە وزەكتى ءارى ومىرلىك ءمانى بار ماسەلە"، دەگەن تاپسىرماسىنا وراي، ت.ق. جۇرگەنوۆ اتىنداعى قازۇوا-عا 300 ورىندىق جاتاقحانا سالۋدى جوسپارعا ەنگىزگەنىن جەتكىزدى.

 

سوڭعى جاڭالىقتار

ۇقساس جاڭالىقتار