لۋكاشەنكو كونستيتۋتسياعا قولىن قويىپ, بەلارۋس تىلىندە انت بەردى. بۇدان سوڭ, رەسپۋبليكا وسك توراعاسى ليديا ەرموشينا وعان پرەزيدەنت كۋالىگىن تابىستادى.
"بەلارۋس رەسپۋبليكاسىنىڭ پرەزيدەنتى قىزمەتىنە كىرىسە وتىرىپ, مەن بەلارۋس رەسپۋبليكاسىنىڭ حالقىنا ادال قىزمەت ەتۋگە, ادام قۇقىقتارى مەن بوستاندىقتارىن قۇرمەتتەۋگە جانە قورعاۋعا, بەلارۋس رەسپۋبليكاسىنىڭ كونستيتۋتسياسىن ساقتاۋعا جانە قورعاۋعا, وزىمە جۇكتەلگەن جوعارى مىندەتتەردى ادال اتقارۋعا سالتاناتتى تۇردە انت ەتەمىن", - دەدى ا.لۋكاشەنكو ۇلىقتاۋ راسىمىندە.
اگەنتتىكتىڭ حابارلاۋىنشا, سالتاناتتى راسىمگە اتالعان ەلدىڭ جوعارى لاۋازىمدى تۇلعالارى, پارلامەنتاريلەر, مەملەكەتتىك ورگاندار مەن جەرگىلىكتى بيلىك ورگاندارىنىڭ جانە رەسپۋبليكالىق باق-تىڭ باسشىلارى, سونداي-اق عىلىم, مادەنيەت جانە سپورت قايراتكەرلەرى قاتىسقان.
