قوعام • 22 قىركۇيەك، 2020

ازاماتتىق قوعامدى دامىتۋدىڭ 2020-2025 جىلدارعا ارنالعان تۇجىرىمداما جوسپارى تالقىلاندى

15 رەت كورسەتىلدى

قازاقستان رەسپۋبليكاسىندا ازاماتتىق قوعامدى دامىتۋدىڭ 2020-2025 جىلدارعا ارنالعان تۇجىرىمداماسىن ء(بىرىنشى كەزەڭ) ىسكە اسىرۋ جونىندەگى ءىس-شارالار جوسپارىنىڭ جوباسى ونلاين-تالقىلاندى، دەپ حابارلايدى Egemen.kz

كەڭەسكە وبلىستار مەن رەسپۋبليكالىق ماڭىزى بار قالالاردا ءوز قىزمەتىن جۇزەگە اسىراتىن ازاماتتىق قوعام وكىلدەرى قاتىستى.

جيىنعا قاتىسۋشىلار قۇقىقتىق رەتتەۋ قۇرالدارىن نىعايتۋعا جانە جەتىلدىرۋگە، ازاماتتىق بەلسەندىلىكتى قولداۋعا جانە دامىتۋعا باعىتتالعان قۇجاتتى قارادى، اتاپ ايتقاندا جوبادا قابىلداناتىن باسقارۋشىلىق شەشىمدەردىڭ تيىمدىلىگىن ارتتىرۋ، مەملەكەتتىك باسقارۋدىڭ اشىقتىعى مەن ەسەپتىلىگىن قامتاماسىز ەتۋ ءۇشىن ءوزارا ءىس-قيمىل راسىمدەرىن، ادىستەرى مەن جولدارىن ساپالى جاقسارتۋ جونىندە شارالار قابىلداۋ كوزدەلگەن. ايتا كەتەيىك، قۇجات جوباسى 5 نەگىزگى بولىكتەن تۇرادى جانە 46 ءىس-شارانى قامتيدى.

جوسپارمەن جان-جاقتى تانىسىپ شىققان قاتىسۋشىلار ەنگىزىلگەن تارماقتاردىڭ دەر كەزىندە قابىلدانعانىن اتاپ ءوتىپ، وسى باعىتتاعى مينيسترلىكتىڭ باستامالارىنا قولداۋ ءبىلدىردى.

سونىمەن قاتار، تالقىلاۋ بارىسىندا "قازاقستان مەدياتورلارى قاۋىمداستىعىنىڭ" ديرەكتورى ءجاندىلدا جاقىپوۆ قازاقستانداعى مەدياتيۆتىك ساياساتتىڭ ودان ءارى دامۋىنا ەرەكشە نازار اۋداردى.

قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگى قوعامدىق كەڭەسىنىڭ مۇشەسى ەلەنا ميتروفانوۆا ءوز سوزىندە ازاماتتىق قوعام ينستيتۋتتارىنىڭ الەۋەتىن نىعايتۋعا، قازاقستانداعى بۇۇ-نىڭ تۇراقتى دامۋ ماقساتتارىن ىسكە اسىرۋعا ازاماتتىق قوعامدى تارتۋعا قاتىستى ماسەلەلەردى اتاپ ءوتتى.

قازاقستاننىڭ ازاماتتىق اليانسىنىڭ پرەزيدەنتى - بانۋ نۇرعازيەۆا ازاماتتىق قوعامدى ساپالى قۇجات قابىلداۋ ماقساتىندا بەلسەندى تالقىلاۋعا شاقىردى.

كەڭەستى قورىتىندىلاي كەلە، ازاماتتىق قوعام ىستەرى كوميتەتىنىڭ توراعاسى ماديار قوجاحمەت قاتىسۋشىلارعا سىندارلى ديالوگ ءۇشىن العىسىن ءبىلدىردى.

وسى ورايدا، ءىس-شارالار جوباسىنىڭ جوسپارىن مەملەكەتتىك ورگاندار دەڭگەيىندە تالقىلاۋ دا جوسپارلانىپ وتىرعانىن ايتا كەتكەن ءجون. ازاماتتىق سەكتوردىڭ، مەملەكەتتىك ورگانداردىڭ جانە مۇددەلى ازاماتتاردىڭ بارلىق ۇسىنىستارى ازاماتتىق قوعامدى دامىتۋ تۇجىرىمداماسىن ىسكە اسىرۋ جونىندەگى ءىس-شارالار جوسپارىندا ءسوزسىز كورىنىس تابادى.

 

سوڭعى جاڭالىقتار

تسيرك - الەم نازارىندا

قازاقستان • بۇگىن، 20:51

ۇقساس جاڭالىقتار