ايماقتار • 22 قىركۇيەك، 2020

الماتىدا بيزنەس قۇقىعىن قورعايتىن ءموبيلدى توپتار قۇرىلدى

14 رەت كورسەتىلدى

وڭىرلىك كوممۋنيكاتسيالار قىزمەتى الاڭىندا وتكەن ونلاين بريفينگ بارىسىندا الماتى قالاسى كاسىپكەرلەر پالاتاسىنىڭ ديرەكتورى ناريمان ابىلشايىقوۆ الماتىدا شاعىن جانە ورتا بيزنەس سۋبەكتىلەرىنىڭ قۇقىقتارىن قورعاۋ بويىنشا قانداي شارالار جۇزەگە اسىرىلىپ جاتقانىن ايتتى، دەپ حابارلايدى Egemen.kz الماتى اكىمدىگىنىڭ Facebook-تەگى پاراقشاسىنا سىلتەمە جاساپ.

مەملەكەت باسشىسى قاسىم-جومارت توقاەۆ جىل سايىنعى "جاڭا كەزەڭدەگى قازاقستان: ءىس-قيمىل كەزەڭ" اتتى حالىققا جولداۋىندا مەملەكەتتىك قۇرىلىمداردىڭ كاسىپكەرلىك قىزمەتكە كەز كەلگەن زاڭسىز ارالاسۋى، بيزنەسمەندەردىڭ جۇمىسىنا كەدەرگى جاساۋ مەملەكەتكە قارسى اۋىرلاتاتىن قىلمىس رەتىندە قابىلدانۋى ءتيىس ەكەنىن اتاپ وتكەن بولاتىن. وسىلايشا، الماتى قالاسىندا الماتىلىق بيزنەسمەندەردىڭ مۇددەلەرىن قورعايتىن ءموبيلدى توپتار قۇرىلدى.
 
"بۇل باعىتتا الماتى قالاسى پروكۋراتۋراسى مەن الماتى قالاسى كاسىپكەرلەر پالاتاسىنىڭ بىرلەسكەن جۇمىسىن اتاپ وتكەن ءجون. وسىلايشا بيزنەستىڭ قۇقىقتارى مەن زاڭدى مۇددەلەرىن جەدەل قورعاۋ ءۇشىن قالانىڭ ءاربىر اۋدانىندا قاداعالاۋ ورگانى مەن "اتامەكەن" وكىلدەرىنىڭ قاتىسۋىمەن ارنايى ءموبيلدى توپتار قۇرىلدى. ءموبيلدى توپتار جۇمىسىنىڭ قورىتىندىسى بويىنشا وتكەن جىلى شوب-ءتى زاڭسىز تەكسەرۋدىڭ 2-ەۋى توقتاتىلدى"، دەدى ناريمان ابىلشايىقوۆ .
 
قوسىمشا سۇراقتار تۋىنداعان جاعدايدا "اتامەكەن" ۇكپ-نىڭ بىرىڭعاي بايلانىس ورتالىعىنىڭ 1432 نومىرىنە (قوڭىراۋ شالۋ تەگىن)، سونداي-اق الماتى قالاسىنىڭ پروكۋراتۋراسىنا +7 701 775 55 00 نومىرىنە حابارلاسۋىڭىزدى سۇرايمىز.
سوڭعى جاڭالىقتار

تسيرك - الەم نازارىندا

قازاقستان • بۇگىن، 20:51

ۇقساس جاڭالىقتار