ايماقتار • 21 قىركۇيەك، 2020

تارازدا تاعى بىرقاتار نىساندار سالىنادى

58 رەت كورسەتىلدى

بۇگىندە ەكى مىڭ جىلدان استام تاريحى بار كونە تاراز شاھارىن تۇرلەندىرۋ جۇمىستارى جۇرگىزىلۋدە. بۇل ورايدا، تاريحي قالانىڭ ساۋلەتىن ارتتىرۋ جۇمىستارىنا م.ح.دۋلاتي اتىنداعى تاراز مەملەكەتتىك وڭىرلىك ۋنيۆەرسيتەتىنىڭ ستۋدەنتتەرى دە ءوز ۇلەسىن قوسۋدا. قازىرگى كەزدە ءوڭىردىڭ جاس ساۋلەتشى، ءمۇسىنشى، ديزاينەرلەرى مەن اتالعان جوعارى وقۋ ورنىن ءبىتىرۋشى تۇلەكتەر جامبىل وبلىستىق ساۋلەت جانە قالا قۇرىلىسى باسقارماسىنىڭ "ساۋلەتتىك بيۋرو" مەكەمەسىنەن تاجىربيەدەن وتۋدە، دەپ حابارلايدى  Egemen.kz.

ماسەلەن، تارمۋ ستۋدەنتى باقتىباي كۇمەكباەۆ تاراز قالاسىنىڭ وڭ ءيميدجىنىڭ قالىپتاسۋىنا، ونىڭ باسەكەگە قابىلەتتىلىگىن ارتتىرۋعا جانە تۋريستىك قىزمەتتەردىڭ نارىعىنداعى بەدەلىن كوتەرۋگە، سونداي̆-اق، ىقتيمالدى پەرسپەكتيۆالىق ىشكى ءتۋريزمنىڭ دامۋىنا قولاي̆لى جاعداي̆ جاساۋ ماقساتىندا شەبەرلىگىن شىڭداۋدا. ول تاراز قالاسىنداعى مادەني-تاريحي مۇرانى، تابيعي ەرەكشەلىكتەردى جانە جاڭا دامۋ ۇردىستەرىن تولىعىمەن ەسكەرەتىن لوگوتيپىن جاساپ، ديزاينەر-ساۋلەتشىلەر اراسىنان وزا شىققان بولاتىن.

اتالعان "ساۋلەتتىك بيۋرو" مەكەمەسى 2018 جىلى جامبىل وبلىسىنىڭ سول كەزدەگى اكىمى اسقار مىرزاحمەتوۆتىڭ باستاماسىمەن قۇرىلعان. سودان بەرى قالاداعى كوپتەگەن ساياباقتار، سكۆەرلەر مەن تاريحي ورىندار جونگە كەلتىرىلىپ، قۇرىلىس جۇمىستارى جۇرگىزىلدى.

بۇل كۇندە ب.مومىش ۇلى اتىنداعى "جەڭىس" ساياباعى، ت.رىسقۇلوۆ اتىنداعى، ق.رىسقۇلبەكوۆ اتىنداعى ساياباقتار مەن "جەلتوقسان تولقىنى" ساياباعى، "جاستار" اللەياسى ەل يگىلىگى ءۇشىن قىزمەت اتقارۋدا. سونىمەن قاتار، تەمىرجول ۆوكزالىنىڭ اۋماعىن اباتتاندىرۋ جۇمىستارى جۇرگىزىلىپ، «ۇشبۇلاق جاعاجايى»، «تەكتۇرماس» ەتنو-تاريحي كەشەنى جانە "شاحريستان" ەتنو-مادەني كەشەنى بوي كوتەردى. تاراز قالاسىندا العاش رەت "اربات" جاياۋ جۇرگىنشىلەر جولى سالىندى.

"قازىرگى تاڭدا بۇل باستامانى وبلىس اكىمى بەردىبەك ساپارباەۆ قولداپ، جالعاستىرۋدا. اعىمداعى جىلدىڭ  ءبىرىنشى جارتىجىلدىعىندا وبلىس اكىمىنىڭ باستاماسىمەن تاراز قالاسى مەن اۋداندار اۋماعىن دامىتۋ، اباتتاندىرۋ جۇمىستارى قولعا الىندى. ماسەلەن، وبلىس ورتالىعى تاراز قالاسىن دامىتۋ، كوركەيتۋ ماقساتىندا "تەكتۇرماس" ەتنو-تاريحي كەشەنىنىڭ ەكىنشى كەزەڭى جالعاسۋدا. "كونە تاراز" كەشەنى مەن قاراحان بابا كەسەنەسىن بايلانىستىراتىن اربات-1 جولىنىڭ، ايتەكە بي كوشەسىنىڭ بويىنان "اناعا تاعزىم" ورتالىعىنىڭ، قالامىزداعى كوپقاباتتى تۇرعىن ۇيلەردىڭ قاسبەتتەرىن جاڭارتۋ جانە ساۋلەتتىك كەلبەتىن اشاتىن مۋرال سۋرەتتەرىنىڭ ەسكيزدىك جوبالارى ازىرلەنىپ، قازىرگى تاڭدا قۇرىلىس-مونتاج، ارلەۋ جۇمىستارى جۇرگىزىلۋدە"، دەيدى وبلىستىق ساۋلەت جانە قالا قۇرىلىسى باسقارماسىنىڭ باسشىسى ارمان ابدەشوۆ.

سونىمەن قاتار، ەلىمىزدىڭ بىرلىگى مەن تاتۋلىعىن ناسيحاتتايتىن ء«بىز بىرگەمىز!» مونۋمەنتى كورونوۆيرۋسپەن كۇرەسكەن ازاماتتارعا ارناپ ورناتىلۋدا. باسقارمانىڭ مالىمەتىنشە، عيماراتتاردىڭ سىرتقى قاسبەتتەرىن زاماناۋي تالاپقا سايكەستەندىرۋ ماقساتىندا، اۋداندارداعى مەكتەپ، بالاباقشا، ەمحانا، مادەنيەت جانە سپورت سياقتى الەۋمەتتىك نىسانداردىڭ سىرتقى قاسبەتتەرىنە ۇسىنىستار بەرىلىپ، اۋدان اكىمدىكتەرىمەن تىعىز جۇمىس جۇرگىزىلۋدە ەكەن.

سول سياقتى، تاراز قالاسى، تولە بي كوشەسىندە ورنالاسقان مەكتەپتىڭ جانە "وقۋشىلار سارايىنىڭ"، سونداي-اق، تاراز قالاسىنىڭ ساۋلەتتىك كەلبەتىن دامىتۋ، كورىكتەندىرۋ ماقساتىندا 15-مولتەكاۋدانىنان جاڭادان بوي كوتەرەتىن كوپقاباتتى تۇرعىن ۇيلەردىڭ، ساياباقتىڭ جانە جاعاجايدىڭ ەسكيزدىك جوبالارى جاسالۋدا. ال، تاۋكە حان كوشەسى مەن "اۋليە اتا" حالىقارالىق اۋەجايى قيىلىسىنان باستاپ "تاراز-ارەنا" سپورت كەشەنى ماڭىنا دەيىن قالا تۇرعىندارى مەن قوناقتارىنا ارنالعان سپورتتىق ويىن-ساۋىق كەشەنىنىڭ جوباسى جۇزەگە اسادى. اتاپ ايتقاندا، گۇلزارلار، حالىقارالىق ستاندارتتاعى مۇز ايدىنى، جەڭىل اتلەتيكا مانەجى، "تەننيس" ورتالىعى، قوناقۇي، اكۆاپارك، موتوبايك، باگگي، "راللي" پارك جانە تاعى دا باسقا ساۋىقتىرۋ كەشەندەرىنىڭ ەسكيزدىك جوبالارى "ساۋلەتتىك بيۋرو" مەكەمەسىمەن ازىرلەنگەن.

"بۇگىندە اققوزيەۆ جانە سىپاتاي باتىر كوشەلەرىنىڭ ارالىعىندا اربات-3 كەشەندەرى مەن جاياۋ جۇرگىنشىلەر جولاقتارى، "دوس-نار" ساۋدا ورتالىعىنىڭ ماڭىنان "قازاق حالقىنا مىڭ العىس" مونۋمەنتى ەل يگىلىگىنە بەرىلۋدە. بۇل جەردە قالامىزدا بۇرىن-سوڭدى بولماعان قۇرعاق سۋبۇرقاقتار، قالانىڭ تۇنگى كوركىن اشاتىن قۇس بەينەسىندەگى گيرلياندىلار ورناتىلدى.

وسى اتالعان جۇمىستار "ساۋلەتتىك بيۋرو" مەكەمەسىندەگى ديزاينەر-ساۋلەتشىلەردىڭ ەڭبەكتەرىنىڭ جەمىسى. وسىعان وراي، وبلىستىڭ كوركەيۋىنە ۇلەس قوسۋعا نيەتتى نەمەسە ءبىلىمىن شىڭداۋعا تالاپتانعان جاس ساۋلەتشى تۇلەكتەر مەن ستۋدەنتتەرگە "ساۋلەتتىك بيۋرو" مەكەمەسىنەن تاجىربيەدەن وتۋگە مۇمكىندىك بار»، دەيدى باسقارما باسشىسى.

 

جامبىل وبلىسى

سوڭعى جاڭالىقتار

تسيرك - الەم نازارىندا

قازاقستان • كەشە

ۇقساس جاڭالىقتار