ءبىلىم • 19 قىركۇيەك، 2020

اسحات ايماعامبەتوۆ پرەزيدەنتتىك جاستار كادرلىق رەزەرۆىنىڭ مۇشەلەرىمەن كەزدەستى

158 رەت كورسەتىلدى

بۇگىن ءبىلىم جانە عىلىم ءمينيسترى اسحات ايماعامبەتوۆ پرەزيدەنتتىك جاستار كادرلىق رەزەرۆى مۇشەلەرىمەن كەزدەسۋدە ءبىلىم سالاسىندا بولىپ جاتقان وزگەرىستەر جايىندا ايتىپ بەردى، دەپ حابارلايدى Egemen.kz.

"پرەزيدەنتتىك جاستار كادرلىق رەزەرۆىندە كوپتەگەن تالانتتى جاستار بارىن كورىپ ءجۇرمىز. بۇگىندە ءبىلىم سالاسىندا پرەزيدەنتتىك جاستار رەزەرۆىنە مۇشە 7 مامان جۇمىس ىستەپ جاتىر. ولاردىڭ جۇمىستارى ءوز ناتيجەسىن بەرۋدە. تالانتتى جاستاردىڭ ءبىلىم سالاسىن جەتىلدىرۋگە ءوز ۇلەستەرىن قوسىپ جاتقانىنا قۋانىشتىمىز. بىزگە كەلگەن كادرلىق رەزەرۆ مۇشەلەرى ءبىلىم سالاسىنا وڭ وزگەرىستەر ەنگىزۋدە، ياعني قازىرگى ۋاقىتتا ءبىلىم سالاسىنا قاتىستى بىرنەشە نورماتيۆتىك اكتىلەرگە وزگەرىستەر مەن تولىقتىرۋلار ەنگىزىلدى"،- دەدى مينيستر.

بۇدان سوڭ، ول ءبىلىم سالاسىنداعى وزگەرىستەردى ءسوز ەتتى.

“مەملەكەت باسشىسىنىڭ تاپسىرماسىنا سايكەس، تاربيە-ءبىلىم سالاسىنا قاتىستى ءبىرىنشى ماسەلە ەلىمىزدى تولىقتاي بالاباقشامەن قامتاماسىز ەتۋ. ونىڭ ىشىندە بالاباقشانى كوپتەپ اشۋ عانا ەمەس، ساپاعا ءمان بەرۋ كەرەك. سول سياقتى بالانىڭ قانداي بالاباقشاعا باراتىنىن اتا-انانىڭ ەركىنە بەرۋ قاجەت. بۇل باعىتتاعى جۇمىس جۇيەلى تۇردە قولعا الىنۋدا. ەكىنشى كەزەكتە ورتا ءبىلىم. اسىرەسە قازىرگى ۋاقىتتا ماڭىزدى بولىپ تۇرعان قاشىقتان وقۋ ماسەلەسى. وسى ورايدا پرەزيدەنت قاشىقتان وقۋدى بىرىزدەندىرۋدى تاپسىردى. بۇگىندە بۇل سۇراق بىزدە كۇن تارتىبىندە تۇر جانە جاقىن ۋاقىتتا ول ءوز شەشىمىن تابادى دەپ ويلايمىن. كەلەسى ماسەلە جوعارعى ءبىلىم بەرۋ. سوڭعى كۇندەرى بايقاپ جاتقاندارىڭىزداي، ءبىز ەلىمىز بويىنشا بىرنەشە جوعارعى وقۋ ورنىن ليتسەنزياسىنان ايىردىق. ونىڭ سەبەبى ءبىلىمنىڭ دۇرىس بەرىلمەۋى جانە ساپانىڭ بولماۋى. جوعارعى وقۋ ورىندارىنا دا قاتىستى تۇيىتكىلدى ماسەلەلەر بارىن جاسىرمايمىز. ءبىزدىڭ ماقسات – وسى ماسەلەلەردى جۇيەلى تۇردە شەشۋ"، - دەدى ا.ايماعامبەتوۆ.

سوڭعى جاڭالىقتار

تسيرك - الەم نازارىندا

قازاقستان • بۇگىن، 20:51

ۇقساس جاڭالىقتار