رۋحانيات • 18 قىركۇيەك، 2020

تۇركىستاندا "بەرەكە، بىرلىكتىڭ سيمۆولى - تايقازان" كورمەسى اشىلدى

45 رەت كورسەتىلدى

تايقازاننىڭ تۇركىستان قالاسىنا قايتا ورالعان كۇنىنە وراي، "ازىرەت سۇلتان" مەملەكەتتىك تاريحي-مادەني قورىق-مۋزەيىنىڭ ۇيىمداستىرۋىمەن، "بەرەكە، بىرلىكتىڭ سيمۆولى – تايقازان" كورمەسى اشىلدى، دەپ حابارلايدى Egemen.kz

كيەلى تايقازان مەملەكەت جانە قوعام قايراتكەرى وزبەكالى جانىبەكوۆتىڭ باستاماسىمەن 1989 جىلى 18 قىركۇيەك كۇنى قوجا احمەت ياساۋي كەسەنەسىنە جەتكىزىلگەن بولاتىن. وسى كۇنى قوجا احمەت ياساۋي كەسەنەسىندە تاريحي جادىگەر جايلى كورمە ۇيىمداستىرۋ داستۇرگە اينالعان. «كورمەنىڭ ماقساتى – كيەلى تايقازاننىڭ جاسالۋ، تاريحي ورنىنا ورالۋ جانە جاساعان ۇستانىڭ ەسىمى مەن جاسالعان ورنىنىڭ تاريحىمەن تانىستىرۋ، ءتول تاريحىمىزدى ناسيحاتتاۋ. سونداي-اق، ەلباسى ن.نازارباەۆتىڭ "بولاشاققا باعدار: رۋحاني جاڭعىرۋ" جانە " ۇلى دالانىڭ جەتى قىرى" باعدارلامالىق ماقالالارىندا كورسەتىلگەن باعىتتارىن جۇزەگە اسىرۋ ماسەلەلەرىن دە قامتيدى. بيىلعى شارانىڭ ەرەكشەلىگى تايقازان كوشىرمەسىن جاساپ جۇرگەن تانىمال قولونەر شەبەرلەرىنىڭ دە جۇمىستارى تانىستىرىلۋدا»، دەيدى  "ازىرەت سۇلتان" مەملەكەتتىك تاريحي-مادەني قورىق-مۋزەيىنىڭ ديرەكتورى  نۇربولات احمەتجانوۆ.

كورمە جادىگەرلەرى اراسىنداعى اعاشتان جاسالعان الىپ تايقازان كەلۋشىلەردى قىزىقتىرۋدا. كوشىرمە اۆتورلارى – شىمكەنت قالاسىنداعى №90 دارىندى بالالارعا ارنالعان مامانداندىرىلعان مەكتەپ-گيمنازياسىنىڭ ۇستازدارى قىدىرعالي اگيباەۆ، پەردەحان تانسيحوۆ جانە بولات سەرىكبەكوۆ. تايقازاننىڭ جەتى ءتۇرلى مەتالدان جاسالعانى بەلگىلى. قولونەر شەبەرلەرى دە سوعان نەگىزدەپ جەتى ءتۇرلى اعاشتى قولدانىپتى. ياعني اقش، وڭتۇستىك كورەيا، رەسەي، وزبەكستان،  قىرعىزستان جانە ەلىمىزدىڭ ساپالى اعاشتارىنان  جاسالعان. كوشىرمەنى جاساپ شىعۋعا ءبىر جارىم جىلداي ۋاقىت جۇمساعان ۇستازدار مۇمكىن بولعانشا نەگىزگى نۇسقاسىنا كەلتىرۋگە تىرىسقاندارىن ايتادىق.

"سالماعى 300 كەلىگە جۋىقتايدى. تۇپنۇسقا تايقازاننىڭ ويۋ-ورنەكتەرى مەن وزگە دە ەلەمەنتتەرىن ءدال ءتۇسىرىپ، جازۋلارىنان قاتەلىك جىبەرمەۋ ءۇشىن ارنايى مامانداردىڭ كومەگىنە جۇگىندىك. تايقازاندى وقۋشىلارعا اعاش جونۋ، كەسۋ، جەلىمدەۋ سىندى جۇمىستاردى ۇيرەتە وتىرىپ جاسادىق. شاكىرتتەرىمىز ءۇشىن بۇل جۇمىس ەڭ ەرەكشە تاجىريبە بولدى دەپ ويلايمىز"، دەيدى اعاش شەبەرى، ۇستاز قىدىرعالي اگيباەۆ.

كورمەگە تايقازاننىڭ قۇيىلعان ورنى مەن 1935 جىلى لەنينگراد (سانكت-پەتەربۋرگ) قالاسىنداعى يران شەبەرلەرىنىڭ III حالىقارالىق كونفەرەنتسياسىنا الىپ كەتكەن جانە قايتا ورالعان ساتتەرىنەن سۋرەتتەر، جادىگەردىڭ قايتا ورالۋىنا بايلانىستى تاريحي قۇجاتتار، كىتاپتار، مۋزەي، قالا اكىمشىلىكتەرىنىڭ ۇكىمەتكە، جوعارعى كەڭەسكە، حالىق دەپۋتاتتارىنا جازعان حاتتارى مەن جەدەلحاتتارىنىڭ كوشىرمەلەرى، قولونەر شەبەرلەرى جاساعان تايقازان كوشىرمەلەرى جانە ءار جىلدارى سىيعا تارتىلعان مۋزەي قورىندا ساقتالعان جادىگەرلەر قويىلعان. كارانتين تالاپتارىنا سايكەس كورمەگە كەلۋشىلەردىڭ ساقتىق شارالارى ساقتالعان. كورمە ءبىر اي بويى قوجا احمەت ياساۋي كەسەنەسىنە كەلۋشىلەردىڭ نازارىنا ۇسىنىلادى.

 

تۇركىستان وبلىسى

سوڭعى جاڭالىقتار

ۇقساس جاڭالىقتار