ايماقتار • 18 قىركۇيەك، 2020

الماتىدا سايران اۆتوبەكەتىندەگى جۇگىزۋشىلەر جۇمىستان كەتىپ جاتىر

سايران اۆتوبەكەتىندەگى جولاۋشى تاسىمالداۋشىلار ۇلكەن شىعىنعا باتىپ، جۇرگىزۋشىلەر جۇمىستان كەتىپ جاتىر، دەپ حابارلايدى Egemen.kz اlmaty.tv تەلەارناسىنا سىلتەمە جاساپ.

ايىم ءداۋىت

سايران اۆتوبەكەتىندە كولەڭكەلى كاسىبىن دوڭگەلەتىپ جۇرگەن باسەكەلەستەرى بەكەت ماڭىندا جابايى تۇراق جاساپ، جولاۋشىلاردىڭ ءبارىن كاسساعا جەتكىزبەي اكەتىپ جاتىر. سالدارىنان اۆتوبەكەتتەگى زاڭدى تاسىمالداۋشىلارعا دەگەن سۇرانىس ون ەسەگە تومەندەپ كەتكەن. ونسىز دا، كارانتين كەزىندە شىعىنعا باتقان كاسىپ يەلەرىنىڭ جان-ايقايى ورىندى.

ۆوكزالدا رەسمي تۇردە جۇمىس ىستەيتىن اۆتوبۋستاردىڭ باسىم بولىگى قاڭىراپ بوس تۇر. كارانتينگە دەيىن كۇنىنە 170-200-دەي كولىككە سۇرانىس بولسا، قازىر 20-25 اۆتوبۋس ارەڭ تولادى ەكەن. شاراسى قالماعان جۇرگىزۋشىلەر جاپپاي جۇمىستان كەتىپ جاتىر.

كارانتيندىك شەكتەۋلەر جەڭىلدەپ، ۆوكزال قايتا اشىلعانمەن جۇمىسى جاندانباي وتىر. اۆتوبەكەت قىزمەتكەرلەرىنىڭ ايتۋىنشا زاڭسىز تاسىمالداۋشىلار ەلدەگى توتەنشە جاعدايدى دا ەلەمەي، ەش ءۇزىلىسسىز جۇمىس ىستەپ كەلگەن. تيىسىنشە، ولاردىڭ سانى دا ارتا ءتۇسىپتى. ەندى بەكەت جۇرگىزۋشىلەرى رەسمي كاسسادان ءتۇسۋى ءتيىس قوماقتى قارجىدان قاعىلىپ وتىر.

"تاسىمالداۋشىلاردىڭ مالىمەتى بويىنشا جۇرگىزۋشىلەر جۇمىستان شىعىپ جاتىر. ويتكەنى جۇمىس جوق. ارينە، ول 40 ادام تاسىعان ءبىر بولەك، 4 ادام اپارعان ءبىر بولەك. وعان گسم دەيمىز، سولياركىگە، بەنزينگە قانشاما اقشا كەتەدى. ول قاراجاتتىڭ بارلىعىن قايدان تابادى جولاۋشى بولماسا؟"، دەدى "سايران" اۆتوۆوكزالى تاسىمالداۋ ءبولىمىنىڭ باسشىسى ەرلان ابىلداەۆ.

كولەڭكەلى كاسىبىن دوڭگەلەتىپ جۇرگەندەر اۆتوۆوكزال ماڭىنان قۋدالاناتىندىقتان بەكەتتىڭ اينالاسىنداعى استىرتىن تۇراقتارعا ورنالاسىپ العان.

مامانداردىڭ ايتۋىنشا زاڭسىز قىزمەت ەتەتىندەر جولاۋشىلاردىڭ ومىرىنە ۇلكەن قاۋىپ توندىرەدى. ماسەلەن، مۇنداي تاسىمالداۋشىلاردا تالاپ ەتىلەتىن ليتسەنزيالار مەن جۇرگىزۋشىلەرگە قاراستىرىلعان مەديتسينالىق باقىلاۋ سياقتى قۇجاتتار اتىمەن جوق. ونىمەن قوسا، اۆتوبۋستار كارانتين تالاپتارىنا ساي بولماۋى دا مۇمكىن.

"جولاۋشى باسقا قالاعا بارامىن دەپ سايرانعا كەلە جاتىپ، تۇراقتى رەيسپەن جۇرەتىن اۆتوبۋسقا ەمەس، زاڭسىز جۇرەتىن اۆتوبۋسقا وتىرادى. وندا قانشالىقتى سانيتارلىق نورمالارعا سايكەس ەكەندىگىن، ونىڭ تەحنيكالىق جاعدايى قانشالىقتى دۇرىس ەكەندىگىن بىلمەي ءوز باسىن، ءوز قاۋىپسىزدىگىن قاتەرگە توندىرەدى"، دەدى قالالىق كولىكتىك باقىلاۋ ينسپەكتسياسى باقىلاۋ ءبولىمىنىڭ جەتەكشى مامانى ەرلان ءجۇسىپوۆ.

كولىكتىك باقىلاۋ ينسپەكتسياسى ۆوكزال ماڭىندا رەيد جۇرگىزگەنىمەن، كولەڭكەلى كاسىپكە توسقاۋىل قويۋ مۇمكىن بولماي وتىر. كارانتين باستالعالى 31 جۇرگىزۋشىگە حاتتاما تولتىرىلعان. بىراق، بۇل شارالار ەشكىمدى توقتاتقان جوق. ەندى، ماماندار اۆتوۆوكزال ماڭىندا سەرگەك كامەرالارىن ورناتۋدى ۇسىنىپ وتىر.