قازاقستان • 17 قىركۇيەك، 2020

قارۋلى كۇشتەرگە 6700-دەن استام قازاقستاندىق شاقىرىلادى

24 رەت كورسەتىلدى

كۇزگى اسكەرگە شاقىرۋ ناۋقانى اياسىندا 17 مىڭنان استام ادامدى اسكەرگە شاقىرۋ جوسپارلانۋدا، دەپ حابارلايدى Egemen.kz قورعانىس مينيسترلىگىنە سىلتەمە جاساپ.

ونىڭ ىشىندە 6700 جاس سارباز قارۋلى كۇشتەرگە، قالعاندارى شەكارا قىزمەتى مەن ۇلتتىق ۇلانعا قىزمەت ەتۋگە اتتانباق.

ازاماتتاردى مەرزىمدى اسكەري قىزمەتكە شاقىرۋدى جۇرگىزۋ مەديتسينالىق كوميسسيالار مەن جەرگىلىكتى اتقارۋشى ورگاندارعا جۇكتەلگەن.

اسكەرگە شاقىرىلۋشىلاردى ىرىكتەۋ مەن ءبولۋ بارىسىندا دەنساۋلىق جاعدايى، ولاردىڭ اسكەرگە شاقىرىلعانعا دەيىن العان ماماندىقتارى ەسكەرىلەدى. فيزيكالىق دايىندىعى جوعارى، مورالدىق جانە پسيحولوگيالىق تۇرعىدان ءتوزىمدى جاستار تەڭىز جاياۋ اسكەرلەرىنىڭ، دەسانتتىق-شابۋىلداۋشى اسكەرلەرى مەن اسكەري-تەڭىز كۇشتەرىنىڭ بولىمشەلەرىنە بارا الادى.

2020 جىلعى كوكتەمگى اسكەرگە شاقىرۋدى تالداۋ دەرەكتەرى بويىنشا اسكەرگە شاقىرىلۋشىلاردىڭ 50% ورتا ءبىلىمى، جاس بۋىنداردىڭ 47% تەحنيكالىق جانە كاسىپتىك، 3% جوعارى ءبىلىمى بار. بۇل رەتتە قازىرگى اسكەرگە شاقىرىلۋشىلاردىڭ اراسىندا قورعانىس مينيسترلىگىنىڭ اسكەري-تەحنيكالىق مەكتەبىنىڭ تۇلەكتەرى دە از ەمەس.

كوروناۆيرۋستىق ينفەكتسيانىڭ تارالۋىنىڭ الدىن الۋ شارالارىن كۇشەيتۋ ماقساتىندا جيناقتاۋ پۋنكتتەرىندە مەديتسينالىق بەكەتتەر ورنالاستىرىلعان. سونىمەن قاتار، وبلىستىق مەديتسينالىق كوميسسيالاردىڭ قۇرامىنا ينفەكتسيونيست دارىگەرلەر ەنگىزىلدى.

اسكەرگە شاقىرىلۋشىلاردى اسكەري بولىمدەرگە جونەلتۋ الدىندا مىندەتتى تۇردە پتر ادىسىمەن COVID-19-عا زەرتحانالىق زەرتتەۋ جۇرگىزىلەدى. بولىمگە كەلگەننەن كەيىن جاس تولىقتىرۋشىلار ەكى اپتالىق كارانتينگە ورنالاستىرىلادى، سونداي-اق مەديتسينالىق تەكسەرۋ جۇرگىزىلىپ اسكەرگە شاقىرىلۋشىنىڭ الەۋمەتتىك-پسيحولوگيالىق مارتەبەسى بەلگىلەنەدى.

قازاقستاندا كۇزگى شاقىرۋ 1 قىركۇيەكتە باستالدى. اسكەرگە شاقىرۋ ناۋقانى جەلتوقساننىڭ سوڭىندا، اسكەرگە شاقىرىلۋشىلاردىڭ سوڭعى لەگى بولىمگە قىزمەتكە اتتانعان كەزدە اياقتالادى.

اسكەرگە شاقىرۋ كوميسسياسىنىڭ مۇشەلەرى اتاپ وتكەندەي، سوڭعى جىلدارى قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ قاتارىن تولىقتىرۋعا نيەت بىلدىرۋشىلەر سانىنىڭ ءوسىمى بايقالادى. كوپتەگەن جاستار قىزمەتتى پايدالى جانە قاجەت دەپ سانايدى. اسكەردە جارتى جىل قىزمەت ەتكەن، تەحنيكالىق، كاسىپتىك نەمەسە جوعارى ءبىلىمى بار جاستار جاقسى ناتيجە كورسەتىپ، كەلىسىمشارت بويىنشا اسكەري قىزمەتكە ورنالاسا الادى.

سوڭعى جاڭالىقتار

ۇقساس جاڭالىقتار