قالادا COVID-19 ۆيرۋسىمەن اۋىرعان 14 328 جاعداي تىركەلدى. ءبىر تاۋلىك ىشىندە جاڭا 3 جاعداي انىقتالدى. بۇگىنگى كۇنى 13 941 ادام ساۋىعىپ شىقتى, ياعني 97,5 پايىزدى قۇرايدى. كوروناۆيرۋستان قايتىس بولعان ادامدار سانى — 270 قۇرادى.
"بۇگىنگى تاڭدا جاعداي تۇراقتى دەپ باعالانۋدا جانە COVID-19 ۆيرۋسىنا قارسى كۇرەس جونىندەگى قالالىق شتابتىڭ تولىق باقىلاۋىندا. جاعدايدى تۇراقتاندىرۋ ءۇشىن ءبىز جۇيەلى شارالار كەشەنىن قابىلدادىق. پاندەميا جاعدايىندا دەنساۋلىق ساقتاۋ جۇيەسىن باسقارۋدىڭ جاڭا مودەلى ازىرلەندى", دەپ حابارلادى ك.نادىروۆ. قالا بويىنشا توسەك-ورىن قۋاتى 6211 توسەك-ورىنعا ارنالعان 27 كوۆيدتىك كلينيكا جانە 250 رەانيماتسيالىق كلينيكا دايىندالدى.
قازىرگى ۋاقىتتا 1923 توسەك-ورىنعا ارنالعان 17 كلينيكا جۇمىلدىرىلدى, رەزەرۆتە 4288 ورىن بار.
تۇركسىب اۋدانىندا 500 توسەك ورىندىق اۋرۋحانالار پايدالانۋعا بەرىلۋدە, قازان ايىندا 300 توسەك ورىندىق زاماناۋي, جاڭا ءمودۋلدى ەمحانانىڭ قۇرىلىسى اياقتالىپ, پايدالانۋعا بەرىلەدى دەپ جوسپارلانىپ وتىر. سونداي-اق قۋاتى 215 توسەك ورىندىق ەكى جەكە مەنشىك ەمحانانىڭ اشىلۋى اياقتالۋ ساتىسىندا تۇر.
"سوڭعى ءۇش ايدا ينفەكتسيالىق توسەك-ورىندار سانى ەكى ەسەگە ارتتى جانە 1 قازانعا قاراي كوۆيدتىك ستاتسيونارلاردىڭ توسەك-ورىندار سىيىمدىلىعى 7226 توسەك-ورىندى قۇرايدى. ەپيدەميا باسەڭدەپ, تىنىشتالعان كەزدە كلينيكالار جۇمىسى توقتاپ قالمايدى, ولار شتاتتىق رەجىمدە جۇمىس ىستەپ, حالىققا ءتۇرلى باعىتتا مەديتسينالىق كومەك كورسەتەتىن بولادى", دەپ تولىقتىردى باسقارما باسشىسى.
ودان ءارى ول قالاداعى جاعدايدى تۇراقتاندىرۋعا مۇمكىندىك بەرگەن جاساقتالعان جۇيەلى شارالارعا توقتالدى.
"COVID-19, جرۆي, اۋرۋحانادان تىس پنەۆمونياسى بار پاتسيەنتتەرگە شۇعىل مەديتسينالىق كومەك كورسەتۋ الگوريتمى جەتىلدىرىلدى. ەندى جەدەل جاردەم وسى كاتەگورياداعى پاتسيەنتتەردى اۋرۋحاناعا جاتقىزۋدا جالعىز مەحانيزم بولىپ تابىلادى. ءوزى ءوتىنىپ كەلگەن ناۋقاستاردى جاتقىزۋعا تىيىم سالىنعان", دەدى ك. نادىروۆ.
بۇل ينفەكتسيالىق اۋرۋحانالارعا گوسپيتاليزاتسيانى وڭتايلاندىرۋعا مۇمكىندىك بەردى. شىعۋعا قىزمەت كورسەتۋ كەزىندە ۇيدەگى جەدەل جاردەم بريگاداسى ناۋقاستىڭ اۋىرلىعىن ارنايى ازىرلەنگەن باقىلاۋ پاراعى بويىنشا باعالايدى جانە ناۋقاستىڭ جاعدايىنا بايلانىستى ونى اۋرۋحاناعا جەتكىزەدى. بۇل رەتتە ستاتسيونارعا, ناۋقاس اۋرۋحاناعا بارا جاتىپ, كت-عا تەكسەرۋ جۇرگىزىلەدى. ول ءۇشىن قالادا بارلىق قاۋىپسىزدىك شارالارى قاراستىرىلعان ارنايى كت ورتالىقتارى انىقتالدى (تازا جانە لاس اعىندارعا ءبولۋ). وسىلايشا, ناۋقاس اۋرۋحاناعا تۇسكەن كەزدە قولىندا كت زەرتتەۋ ناتيجەسى بار, بۇل تەراپيانى قابىلداۋ كەزىندە بىردەن باستاۋعا مۇمكىندىك بەرەدى. سونداي-اق قابىلداۋ كەزىندە پتر-تەست سىناعى الىنادى. مۇنىڭ بارلىعى تمككك اياسىندا تەگىن كورسەتىلەدى. سونىمەن بىرگە ك.نادىروۆ رەزەرۆ قۇرۋ جانە COVID-19 جاعدايىندا جۇمىس ىستەۋ ءۇشىن مامانداردى دايىنداۋ ماسەلەسىنە توقتالدى.
"بۇگىنگى تاڭدا الدىڭعى قاتاردا مىڭنان استام, ونىڭ ىشىندە دارىگەرلەر, ورتاشا جانە كىشى مەديتسينالىق پەرسونالمەن بىرگە, باسقا دا قىزمەتكەرلەر بار. دەرت ورشىگەن كەزدە الدىڭعى شەپتە 4500-دەن استام مەديتسينا قىزمەتكەرى ەڭبەك ەتتى. ءبىزدىڭ تاراپىمىزدان 2515 قىزمەتكەردەن كادرلىق رەزەرۆ جاسالدى, ولاردىڭ ىشىندە دارىگەرلەر, ورتاشا جانە كىشى مەديتسينالىق پەرسونال بار", دەپ اتاپ ءوتتى ك. نادىروۆ.
