ەلوردا • 17 قىركۇيەك، 2020

نۇر-سۇلتاندا گاز ءتاريفى بەكىتىلدى

نۇر-سۇلتاندا گاز ءتاريفى بەكىتىلدى. ەگەر بۇرىن گازدىڭ تەكشە مەترى 60 تەڭگە بولسا، اكىمدىك ورتالىق ۋاكىلەتتى ورگاندارمەن بىرگە اقشانى ۇنەمدەۋ ماقساتىندا ونى تومەندەتۋ بويىنشا اۋقىمدى جۇمىس جۇرگىزدى، دەپ حابارلايدى Egemen.kz ەلوردا اكىمدىگىنە سىلتەمە جاساپ.

ايىم ءداۋىت

وسىلايشا، گازدىڭ تەكشە مەترىنىڭ باعاسى 45 تەڭگەگە دەيىن تومەندەتىلدى. ەلوردا اكىمى التاي كولگىنوۆ قوعامدىق كەڭەس مۇشەلەرىمەن كەزدەسۋدە گاز جۇرگىزۋ بارىسى، ۇزاققا سوزىلعان نىساندار قۇرىلىسى، تۇرعىن اۋدانداردا جۇرگىزىلىپ جاتقان جۇمىستار، الەۋمەتتىك ماڭىزى بار تاۋارلار باعاسىن تۇراقتاندىرۋ شارالارى جانە قالانىڭ دامۋى تۋرالى ايتتى.

وسىلايشا، ەلوردا تۇرعىن اۋداندارىندا كۆارتالىشىلىك گازبەن جابدىقتاۋ جەلىلەرىن سالۋ بويىنشا اۋقىمدى جۇمىس جۇرگىزىلۋدە. مىسالى، جەلەزنودوروجنىي تۇرعىن الابىندا 100%، پرومىشلەننىي جانە كوكتال-2 تۇرعىن الاپتارىندا 95%، كوكتال-1 تۇرعىن الابىندا 80% گاز تاراتۋ جەلىلەرى تارتىلعان. بۇل جۇمىستار اگروقالاشىق، وڭتۇستىك-شىعىس تۇرعىن الاپتارىندا دا جۇزەگە اسىرىلادى. اتالعان تۇرعىن اۋداندار حالقى، سونداي-اق اگروقالاشىق تۇرعىن الابىنىڭ ءبىر بولىگى الداعى جىلىتۋ ماۋسىمىندا ۇيلەرىن گازبەن جىلىتادى. ول ءۇشىن تۇرعىندار ۇيلەردى گازعا قوسۋدىڭ تەحنيكالىق شارتتارىن الۋعا فرونت-كەڭسەلەرگە حابارلاسۋى كەرەك. جەكە سەكتور تۇرعىندارى ءۇشىن اكىمدىك ەسەپتەگىشتەردى تەگىن ۇسىنادى.

"ەلوردانى گازداندىرۋ – ەلباسىنىڭ تاريحي جوباسى. "سارىارقا" گاز قۇبىرىنىڭ وڭتۇستىك ايماقتان ەلورداعا دەيىن 1000 شاقىرىمنان استام جولى تارتىلدى. بۇل وتە ۇلكەن جۇمىس، جوباعا ميللياردتاعان قاراجات قۇيىلدى، ول ۋاقىت وتە كەلە قايتارىلۋى كەرەك. گازداندىرۋ قورشاعان ورتانى جاقسارتۋعا عانا ەمەس، تۇرعىنداردىڭ دەنساۋلىعىنا پايدالى اسەر ەتەدى، سونىمەن قاتار جەكە سەكتور تۇرعىندارىنىڭ ءومىر ءسۇرۋ جاعدايلارىن ايتارلىقتاي جەڭىلدەتەدى. اقىر سوڭىندا، ۇزاق قىس ايلارىندا بىرنەشە ساعات سايىن ءۇيدى جىلىتۋدىڭ، كومىر ءتۇسىرىپ، ونى ساقتاۋدىڭ قاجەتى بولمايدى. ادامدار كومىرتەگى توتىعىمەن ۋلانعان جاعدايلار بولدى. بۇل ماسەلەلەردىڭ بارلىعى شەشىمىن تابادى. گاز كومىرگە قاراعاندا سالىستىرمالى تۇردە قىمبات، بىراق ونىڭ ارتىقشىلىعى كوپ، ەڭ الدىمەن بۇل قاۋىپسىز وتىن ءتۇرى. سونىمەن قاتار بيىل ءبىز جەو-1 جانە جەو-2-دە بىرقاتار قازاندىقتاردى گازعا اۋىستىرۋدى جوسپارلاپ وتىرمىز. گازداندىرۋ پروتسەسى ءۇش كەزەڭگە بولىنەدى، كەزەڭ-كەزەڭىمەن بارلىق تۇرعىن اۋداندار گازعا قوسىلادى. بۇل ماسەلە مەملەكەت باسشىسىنىڭ باقىلاۋىندا"، دەدى ەلوردا اكىمى التاي كولگىنوۆ.

سونىمەن قاتار قوعامدىق كەڭەس مۇشەلەرى ەلوردانى گازداندىرۋدىڭ ماڭىزىن اتاپ ءوتتى.

"گاز تارتىلعان وڭىرلەر تۇرعىندارى گازداندىرۋ جەكە سەكتور تۇرعىندارىنىڭ ءومىرىن قانشالىقتى جەڭىلدەتەتىنىن جاقسى بىلەدى. اۋا تازارادى. قازىر قالادا زياندى تۇتىنمەن دەم الىپ جاتىرمىز. گازداندىرۋ زياندى زاتتاردىڭ اتموسفەراعا ەنۋىن 40 مىڭ تونناعا ازايتۋعا مۇمكىندىك بەرەدى"، دەيدى ولار.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز