ايماقتار • 16 قىركۇيەك، 2020

قوستاناي وبلىسىندا تۇرمىستىق قىلمىسقا قارسى اكتسيا ءوتتى

18 رەت كورسەتىلدى

قوستانايدا تۇرمىستىق قىلمىستىڭ الدىن الۋدى كوزدەيتىن "وتباسىنداعى زورلىق-زومبىلىققا جول جوق!" دەپ اتالاتىن اكتسيا ءوتتى، دەپ حابارلايدى Egemen.kz

شاراعا قاتىسۋشىلاردىڭ ايتۋىنشا، وبلىستا جىل باسىنان بەرى ەكى مىڭنان استام ايەل ءوز شاڭىراعىندا كورسەتىلگەن قورلىقتان زارداپ شەككەن. اكتسيا اياسىندا جەرگىلىكتى پوليتسيانىڭ اعا ينسپەكتورى جۇلدىز قابەنوۆا وتباسىندا تۇرمىستىق زورلىق كورگەندەردى قابىلداۋ ورتالىعىنا كەلۋشىلەرمەن كەزدەستى. جۇزدەسۋ بارىسىندا ۇيدە وتىرىپ قالىپ، تۇرمىستان قاعاجۋ بولعان ازاماتشالاردى جۇمىسقا ورنالاستىرۋ، قايتا وقىتۋ، ولارعا تيىسىنشە الەۋمەتتىك كومەك كورسەتۋ جولدارى قاراستىرىلىپ، وتباسىنداعى الىمجەتتىكتىڭ الدىن الۋ ماسەلەلەرى ءسوز بولدى.

اكتسيانىڭ ماقساتى – ايەلدەرگە قاتىستى زورلىق-زومبىلىقتىڭ الدىن الۋعا،  انا مەن بالانى قورعاۋعا، وتباسىنىڭ قوعامداعى ءرولىن نىعايتۋعا باعىتتالعان جوبالاردى كوپشىلىككە تانىستىرۋ.

"وبلىستا بىلتىردان بەرى جۇرگىزىلىپ كەلە جاتقان بۇل باعىتتاعى ماقساتتى شارالاردىڭ ناتيجەسىندە تۇرمىستىق قۇقىق بۇزۋشىلىقتىڭ 29%-عا ازايعانى بايقالىپ وتىر"، دەدى جۇلدىز قابەنوۆا.  

بۇگىندە وبلىس ورتالىعىندا وتباسىلىق زورلىق-زومبىلىققا قاتىستى ماسەلەلەر بويىنشا ايەلدەر مەن بالالارعا ارنالعان داعدارىس ورتالىعى جۇمىس ىستەيدى. مۇنداعى مامانداردىڭ ايتۋىنشا، ايماقتا بيىلعى 8 اي ىشىندە ايەلدەرگە قاتىستى 2 مىڭ 584 قۇقىق بۇزۋشىلىق تىركەلگەن. سونداي-اق 2611 ادام وتباسى-تۇرمىستىق قاتىناستار سالاسىنداعى قۇقىققا قايشى ارەكەتتەرى ءۇشىن اكىمشىلىك جاۋاپكەرشىلىككە تارتىلعان. 

سوڭعى جاڭالىقتار

ۇقساس جاڭالىقتار