ايماقتار • 16 قىركۇيەك، 2020

اقتوبە وبلىسىندا 12 مىڭعا جۋىق جاڭا جۇمىس ورنى قۇرىلادى

529 رەت كورسەتىلدى

اقتوبە وبلىسىندا "جۇمىسپەن قامتۋدىڭ جول كارتاسى-2020" باعدارلاماسى شەڭبەرىندە وسى جىلدىڭ سوڭىنا دەيىن 11 مىڭ 942 جاڭا جۇمىس ورىندارى قۇرىلادى، دەپ حابارلايدى Egemen.kz

ونىڭ 11 مىڭ 567-ءسى ۋاقىتشا، 375-ءى تۇراقتى جۇمىس ورىندارى دەپ بەلگىلەندى. نەگىزىنەن ماۋسىمدىق سيپاتقا يە ۋاقىتشا جۇمىس ورىندارى ەلدى مەكەندەرگە بيۋدجەتتىك باعدارلامالار بويىنشا ينفراقۇرىلىمدار جۇرگىزەتىن مەردىگەرلىك مەكەمەلەردە اشىلىپ جاتىر. جول جوندەۋ، اۋزسۋ جۇرگىزگەندە قۇبىر توسەۋ سياقتى كوبىنەسە قول ەڭبەگىن قاجەت ەتەتىن جۇمىستارعا رەسمي تىركەلگەن جۇمىسسىزدار شاقىرتىلادى. ۋاقىتشا قۇرىلعان جۇمىس ورىندارىنداعى ازاماتتاردىڭ ەڭبەكاقىسى 87 مىڭ تەڭگە دەپ بەلگىلەندى.

ەگەردە وڭىردە تۇراقتى جۇمىس ورىندارىن قۇرۋ كىدىرىسسىز جۇمىس ىستەپ تۇرعان نەمەسە جاڭادان اشىلاتىن كاسىپورىندار  ەسەبىنەن جۇزەگە اسىرىلاتىن بولسا، وندا كۇن تارتىبىندەگى ماسەلە − جەرگىلىكتى نارىقتىڭ سۇرانىسىن زەرتتەۋ بولىپ تۇر. ءدال قازىرگى جاعدايدا الەۋمەتتىك باعدارلامالاردى ۇيلەستىرۋشى  جەرگىلىكتى مەملەكەتتىك ورگاندار ەكونوميكانىڭ سالالارى بويىنشا ماماندار سۇرانىسىن انىقتاپ وتىرعان جوق. 

ول ءۇشىن حالىقتى جۇمىسپەن قامتۋ مەكەمەلەرىنىڭ قولىندا جۇمىسسىزدىق كارتاسى بولۋى كەرەك. وندا جەرگىلىكتى ەڭبەك نارىعىندا قانداي ماماندىقتاردىڭ سۇرانىسقا يە ەكەندىگى، قانداي ماماندىقتارعا قايتا دايارلاۋدىڭ  قاجەتتىلىگى، شاعىن جانە ورتا كاسىپكەرلىك نىساندارىنىڭ ەكونوميكالىق بەلسەندىلىك دەڭگەيى ءدال كورسەتىلۋى ءتيىس. وسى ماقساتتا وبلىس اكىمى وڭداسىن ورازالين اقتوبە قالاسى مەن 12 اۋدان اكىمدەرىنە جەرگىلىكتى جەرلەردىڭ ەرەكشەلىكتەرىن ەسكەرە وتىرىپ، تۇراقتى جۇمىس ورىندارىن قۇرۋدىڭ  مەحانيزمەرىن ازىرلەۋدى تاپسىردى.   

اقتوبە وبلىسىنىڭ ەڭبەك ينسپەكتسياسى جونىندەگى باسقارما باسشىسى سالامات امانباەۆتىڭ ايتۋىنشا، وسى جىلدىڭ سوڭىنا دەيىن وڭىردەگى بارلىق كاسىپورىندار ەڭبەك جانە حالىقتى الەۋمەتتىك قورعاۋ مينيسترلىگىنىڭ ارنايى سايتىنا تىركەلۋگە مىندەتتى. وسى مەرزىمگە دەيىن وڭىردەگى بارلىق وندىرىستىك مەكەمەلەر تىركەلىپ بولسا، وندا كەلەسى جىلدان باستاپ جۇمىس ورىندارىنىڭ ورتاق بازاسى جاساقتالىپ، بوس جۇمىس ورىندارىن انىقتاۋ مەن جاڭا جۇمىس ورىندارىن قۇرۋ ەڭبەك نارىعىن تالداپ-زەرتتەۋ ارقىلى ىسكە اسىرىلاتىن بولادى.

سوڭعى جاڭالىقتار

مۇحتار مەن قايىم

قازاقستان • كەشە

ەلدە قىلمىس ازايعان

قوعام • كەشە

اقاڭ جانە قازاق راديوcى

احمەت بايتۇرسىن ۇلى • كەشە

رۋحتى جىردىڭ يەسى

ادەبيەت • كەشە

ۇقساس جاڭالىقتار