قارۋلى كۇشتەردىڭ ۇلتتىق اسكەري-پاتريوتتىق ورتالىعىندا "جاس سارباز" اسكەري-پاتريوتتىق قوزعالىسىنىڭ استانالىق فيليالىنىڭ تاربيەلەنۋشىلەرى پارلامەنت ءماجىلىسىنىڭ دەپۋتاتى, حالىق قاھارمانى, گەنەرال-لەيتەنانت باقىتجان ەرتاەۆپەن كەزدەستى.
جاس پاتريوتتار زاماناۋي قازاقستاندىق ارميا, اسكەري قىزمەت جانە اسكەري قىزمەتشى ماماندىعى تۋرالى ءبىلدى. قوناقتار پاتريوتيزم, باتىلدىق, اسكەري بورىشقا ادالدىق سياقتى ۇعىمدار تۋرالى ايتتى. اڭگىمەدەن وقۋشىلار قارۋلى كۇشتەردىڭ قۇرىلۋ تاريحى مەن قازىرگى جاعدايىنان حاباردار بولدى.
"وتانعا قىزمەت ەتۋ ءۇشىن قاجىرلى ەڭبەك ەتۋ, پاتريوت بولۋ, ءوز بەتىمەن تىنىمسىز جۇمىس ىستەۋ, كاسىبي شەبەرلىكتى ارتتىرىپ, جاڭا داعدىلاردى يگەرۋ قاجەت. وسكەلەڭ ۇرپاقتىڭ بويىنان ەلىمىزگە دەگەن پاتريوتتىق سەزىم تابىلۋى كەرەك. اسكەرگە شاقىرىلعان جاستار وتان الدىنداعى بورىشىن ابىرويمەن اتقاراتىنىنا سەنىمدىمىن", - دەيدى باقىتجان ەرتاەۆ.
بالالار بەيرەسمي اڭگىمەگە بەلسەندى قاتىسىپ, وزدەرىن قىزىقتىرعان سۇراقتارىن قويدى.
"ەلىمىزگە تانىمال ادامداردىڭ ءومىر تاريحىن ءبىلۋ مەن ءۇشىن وتە قىزىق. ءبىز ءۇشىن ولار ەلىمىزدىڭ دامۋىنا ءوز ۇلەسىن قوسا الاتىن قاجىرلى ەڭبەگىنىڭ ارقاسىندا كەز كەلگەن ادامنىڭ تابىسقا قول جەتكىزە الاتىندىعىنىڭ مىسالى بولىپ تابىلادى", – دەيدى "جاس سارباز" تاربيەلەنۋشىسى مادينا باۋىرجانقىزى.
ءىس-شارا سوڭىندا حالىق قاھارمانىنا "جاس سارباز" جاسوسپىرىمدەر اسكەري-پاتريوتتىق قوزعالىسىنىڭ "قۇرمەتتى مۇشەسى" بەلگىسى تابىستالدى.
"ەرلىك ساباقتارى" قازاقستاندىق وقۋشىلار ءۇشىن تۇراقتى نەگىزدە وتكىزىلەدى. وتكەن جىلدان باستاپ "جاس سارباز" تاربيەلەنۋشىلەرى ءۇشىن ولار ەلىمىزدىڭ دامۋىنا ۇلەس قوسقان كورنەكتى تۇلعالارمەن تىكەلەي كەزدەسۋلەر فورماتىندا ۇيىمداستىرىلادى. بۇعان دەيىن جاس پاتريوتتار قازاقستاندىق عارىشكەر, حالىق قاھارمانى, اۆياتسيا گەنەرال-مايورى ايدىن ايىمبەتوۆ, سونداي-اق بەلگىلى سپورتشى, قوعام قايراتكەرى ارداق نازاروۆپەن كەزدەستى.
ءداستۇرلى "ەرلىك ساباعى" سانيتارلىق-ەپيدەميالىق تالاپتاردى ساقتاي وتىرىپ وتكىزىلدى.
