"پاندەميا كەزىندە قوعامدىق باقىلاۋ ينستيتۋتىنىڭ قانشالىقتى ماڭىزدى ەكەنىنە كوزىمىز جەتتى. قازىرگى تاڭدا قوعامدىق باقىلاۋ فۋنكتسياسىنا قوعامدىق كەڭەستەر يە. الايدا ۋاقىتتىڭ ءوزى بۇل فۋنكتسياعا يە ۇيىمداردىڭ ءتىزىمىن كەڭەيتۋ كەرەكتىگىن كورسەتىپ وتىر. سەبەبى ءبىزدىڭ اقپارات جانە قوعامدىق دامۋ مينيسترلىگى قوعامدىق باقىلاۋ فۋنكتسياسىن مىندەتىنە العان بەلسەندىلەردىڭ جۇمىسىنىڭ ۇيلەستىرۋشىسى بولدى. دارىحانادارداعى ءدارى-دارمەك باعاسىنىڭ الا-قۇلالىعى, گۋمانيتارلىق كومەكتى ءبولۋ ماسەلەسى, مەديتسينالىق ۇيىمداردىڭ جۇمىسىنا قاتىستى قانشاما ماسەلە تۋىنداعانىن بىلەسىزدەر. مىنە وسى رەتتە ءبىز بەلسەندىلەرگە قولداۋ بىلدىردىك", دەدى ايدا بالاەۆا پرەزيدەنتتىك كادرلىق رەزەرۆتەگى جاستارمەن كەزدەسۋ بارىسىندا.
مينيستر ءوزىنىڭ كەڭەسشىسى ليما دياس وسى جۇمىستاردىڭ ۇيلەستىرۋشىسى بولعانىن, بۇگىنگە دەيىن بۇكىل رەسپۋبليكاداعى 300-گە تارتا بەلسەندى ازامات جۇمىس جۇرگىزگەنىن ايتادى.
"بەلسەندى ازاماتتار ءدارى-دارمەك باعاسىنىڭ تۇراقتىلىعى, گۋمانيتارلىق كومەكتى ءبولۋ, مەديتسينالىق ۇيىمداردىڭ جۇمىسى سەكىلدى ءۇش ماسەلەنى نازارعا العان ەدى. قوعامدىق باقىلاۋدىڭ ارقاسىندا وسى باعىتتاعى جۇمىستى تۇراقتاندىرۋعا مۇمكىندىك الدىق", دەدى ول.
ەسكە سالا كەتسەك بۇگىن ەلوردادا پرەزيدەنتتىك كادرلىق رەزەرۆتەگى جاستار بىرقاتار مينيسترمەن كەزدەسۋ وتكىزدى. ناقتىراق ايتقاندا ىرىكتەلىپ, رەزەرۆكە ەنگەن جاستارمەن كەزدەسۋگە اقپارات جانە قوعامدىق دامۋ ءمينيسترى ايدا بالاەۆا, تسيفرلىق دامۋ, يننوۆاتسيالار مەن اەروعارىش ونەركاسىبى ءمينيسترى باعدات مۋسين, پرەزيدەنت اكىمشىلىگى باسشىسىنىڭ ورىنباسارى مالىك مىرزالين, سونداي پرەزيدەنتتىڭ كومەكشىسى ەرلان قارين شاقىرىلعان. باسقوسۋدىڭ باستى ماقساتى – پرەزيدەنت جولداۋىن تالقىلاپ, الداعى ۋاقىتتا پرەزيدەنتتىك جاستار كادرلىق رەزەرۆىن دامىتىپ,جۇزەگە اسىرۋدى جوسپارلاۋ.
