ەڭ الدىمەن ايماق باسشىسى شاھارداعى دەمالىس ورىندارىنىڭ ءبىرى ارباتقا ات باسىن تىرەدى. 3 بولىكتەن تۇراتىن دەمالىس ورنىنداعى قۇرىلىس جۇمىستارى ءالى جۇرۋدە. جوبالاۋشىلاردىڭ يدەياسى بويىنشا "اربات" جاياۋ جۇرگىنشىلەر جولى "كونە تاراز" كەشەنى مەن قاراحان بابا كەسەنەسىن بايلانىستىرماق. وندا جالپى اۋدانى 2,5 گەكتاردى قۇرايتىن ۇزىندىعى 320 مەترلىك سازدى سۋبۇرقاق ىسكە قوسىلادى. جۇرگىزىلىپ جاتقان جۇمىستارعا وڭ باعاسىن بەرگەن بەردىبەك ساپارباەۆ بۇل جەرمەن وتەتىن جاياۋ جۇرگىنشىلەردىڭ قاۋىپسىزدىگىن ويلاستىرۋدى تاپسىردى. ويتكەنى ەكى جەردەن كەسىپ وتەتىن كولىك جولى اپات تۋدىرۋى مۇمكىن.
"مىنا جەردەن بالا جۇگىرىپ شىقسا, ماشينا دا كەلىپ قالسا جامان بولادى. بۇل پروبلەما", دەپ ەسكەرتتى ايماق باسشىسى.
نىسانعا بىرگە كەلگەن تاراز اكىمىنىڭ ورىنباسارى اسحات ەسەناليەۆ كولىكتەرىڭ جولىن باسقا جاققا بۇرۋ مۇمكىن ەمەستىگىن جەتكىزدى. ويتكەنى وسى ماڭايداعى اۋلالارعا اپاراتىن باسقا وتكەل جوق. اربات ءىشىن ەكى جەردەن سۋ ارناسى دا كەسىپ وتەدى. بىراق ولاردىڭ قازىرگى جاعدايى وبلىس اكىمىنىڭ كوڭىلىنەن شىقپادى. وسى جەرمەن سەرۋەندەپ جۇرەتىن تۇرعىندار قوقىس تاستاپ ابدەن كوركىن قاشىرىپ تاستاعان.
كەزىندەگى پەريناتالدىق ورتالىق ورنىندا ينفەكتسيالىق اۋرۋحانا جۇمىسىن باستاۋى ءتيىس. وندا قازىر قايتا جابدىقتاۋ جۇمىستارى قارقىندى جۇرۋدە. جوسپار بويىنشا 3 بلوكتان تۇراتىن نىسان 200 توسەك ورىنعا شاقتالعان. تامىز ايىنىڭ باسىندا باستالعان جۇمىستاردىڭ نەگىزگى بولىگى اياقتالعان. مەردىگەرلەردىڭ ايتۋىنشا, ارلەۋ, ىشكى جالعاۋ جۇمىستارى عانا قالىپ تۇر.
بلوكتاردى ءوزى ارالاپ شىققان بەردىبەك ساپارباەۆ ىشكى بولمەلەردى جوسپارلاعاندا سانيتارلىق تالاپتاردى ۇمىتپاۋ كەرەكتىگىن ەسكەرتتى. ەمدەلۋشىلەرگە جايلى جاعداي جاسالۋى كەرەكتىگىنە ءمان بەردى.
"مۇنداعى جىلۋ جۇيەلەرىن تولىقتاي اۋىستىرامىز. بۇرىنعى شويىن باتارەيالاردىڭ ورنىنا پلاستيك, بيمەتالدى ماتەريالداردان جاسالعان جۇيە بولادى. 40 ادام جۇمىس ىستەپ جاتىر. كافەل توسەۋشىلەر جەتىسپەيدى. قازىر 7 ادام وسىمەن اينالىسادى. نەگىزى 15 جۇمىسشى بولسا, جۇمىس تەزىرەك ءجۇرۋشى ەدى", دەيدى "تالاس-قۇرىلىس" جشس-ءنىڭ ۋچاسكە باسشىسى سامات اقاتاەۆ.
"قانداي ماسەلە بولماسىن, 1-ءشى قازانعا دەيىن اۋرۋحانا دايىن بولۋى كەرەك", دەپ تاپسىردى بەردىبەك ساپارباەۆ.
مەردىگەر مەكەمە وكىلدەرى ەش كەدەرگى بولماسا, بەلگىلەنگەن مەرزىمنەن بۇرىن جۇمىستاردى اياقتاۋعا نيەتتى ەكەنىن ءبىلدىردى.
