بۇگىن قالا اكىمىنىڭ ورىنباسارى باقتيار ماكەن بىرقاتار ۇيىمداردا بولىپ, كۇزگى ماۋسىمدىق اۋرۋلار – جرۆي مەن تۇماۋدىڭ كوبەيۋىن ەسكەرە وتىرىپ, مەكەمەلەردىڭ COVID-19 ىندەتىنە دايىندىعىن تەكسەردى.
وسىلايشا, 50-دەن استام وكپەنى جاساندى جەلدەتۋ اپپاراتى, 2 كومپيۋتەرلىك توموگراف; وكپەنىڭ زاقىمدانۋ پايىزىن كورۋگە مۇمكىندىك بەرەتىن 7 ساندىق رەنتگەن جۇيەسى; 3 وتتەگى رەزەرۆۋارى قوسىمشا ساتىپ الىندى. سونىمەن قاتار قالانىڭ ەمدەۋ مەكەمەلەرىنە 500-دەن استام وتتەگى كونتسەنتراتورى, 250-گە جۋىق وكپەنى جاساندى جەلدەتۋ اپپاراتى, 300-گە جۋىق فلوۋمەتر, 500 كوپفۋنكتسيونالدى ارنايى كەرەۋەت جەتكىزىلدى. سونداي-اق 1600-گە جۋىق وتتەگى نۇكتەسى بار.
"دەمالىس كۇندەرى كارانتين شارالارىن ەنگىزۋ ارقاسىندا قالادا COVID-19-عا قاتىستى احۋال تۇراقتالدى. مەديتسينا مەكەمەلەرى مەن قىزمەتكەرلەرگە اۋىرتپالىق تۇسپەۋ ءۇشىن, قاتاڭ سانيتاريا نورمالارىن ساقتاۋدى جالعاستىرۋ قاجەت. كوروناۆيرۋسپەن كۇرەسكە دايىندىق توقتاعان ەمەس. 110 توننادان استام ءدارى-دارمەك ساتىپ الىنىپ, مەكەمەلەر مەديتسينالىق جابدىقتارمەن قامتاماسىز ەتىلۋدە. كۇزدە ءورشيتىن جرۆي ىندەتىمەن بىرگە كوروناۆيرۋسقا قاتىستى احۋال دا كۇردەلەنۋى مۇمكىن. سوندىقتان ءبىزدىڭ بارلىق مەديتسينا ۇيىمدارى دايىن.
جاقىندا مەديتسينالىق جابدىقتاردان باسقا جىلجىمالى فليۋوروگرافيالىق كەشەندەر, ساندىق رەنتگەن جۇيەلەرى جانە جوعارى دالدىكتەگى جەلدەتكىشتەر دە كەلەدى. مىسالى, بۇگىندە ستاتسيونارلاردى وكپەنى جاساندى جەلدەتۋ اپپاراتىمەن قامتاماسىز ەتۋ شامامەن 94%-دى قۇرايدى", – دەدى قالا اكىمىنىڭ ورىنباسارى باقتيار ماكەن.
باقتيار ماكەن اكىمدىك جەكە جانە رەسپۋبليكالىق كلينيكالارمەن ولاردىڭ كومپيۋتەرلىك توموگرافيا اپپاراتتارىن قالا ەمحانالارى مەن ستاتسيونارلارىنا بەكىتۋ تۋرالى كەلىسىمگە قول قويعانىن اتاپ ءوتتى. كومپيۋتەرلىك توموگرافتاردىڭ جالپى سانى – 19. قاجەت بولسا, قالانىڭ بارلىق 17 ستاتسيونارى قايتا اشىلىپ, ينفەكتسيامەن كۇرەسكە جۇمىلدىرىلاتىن بولادى.
