تۇرىك كومپانياسىنا قازاقستاندىق نارىق تاڭسىق ەمەس. ءوڭىر باسشىسى وسى جىلدار ىشىندە باۋىرلاس حالىقپەن تىعىز جانە دوستىق قارىم-قاتىناس ورناعانىن اتاپ ءوتتى.
– ينۆەستورلار نەگىزىنەن بيزنەستى دامىتۋعا قولايلى جانە بولاشاعى بار وڭىرلەرگە بارادى. وسى ورايدا مەملەكەتتىك باعدارلامالار ازىرلەنگەن دەسەك, بۇگىندە ولار وزدەرىنىڭ تيىمدىلىگىن دالەلدەي تۇسۋدە. بۇل باعدارلامالار اياسىندا سىزدەردىڭ كومپانيالارىڭىزعا دا جان-جاقتى قولداۋ كورسەتىلەتىن بولادى, – دەدى بەردىبەك ساپارباەۆ.
Yildirim Holding-ءتىڭ باس ديرەكتورى يسمايل دجەيلان ينۆەستيتسيالىق جوبا تۋرالى ەگجەي-تەگجەيلى ايتىپ بەردى. قۇرىلىسى كەلەر جىلى باستالادى دەپ جوسپارلانعان زاۋىتتىڭ جىلدىق جوبالىق قۋاتى 400 مىڭ توننانى قۇرايدى. بولاشاقتا بۇل كورسەتكىش جىلىنا 1,2 ميلليون تونناعا دەيىن ارتادى دەپ كۇتىلۋدە. نىسان قۇرىلىسىنا 325 ميلليون اقش دوللارىن ينۆەستيتسيالاۋ جوسپارلانۋدا.
1500-دەن استام ادام تارتىلاتىن قۇرىلىس-مونتاجداۋ جۇمىستارى كەلەسى جىلى باستالماق. جوبا 2023 جىلى پايدالانۋعا بەرىلەدى دەپ كۇتىلۋدە. ول ىسكە قوسىلعاننان كەيىن بيۋدجەتكە جىل سايىن 8 ميلليون اقش دوللارى مولشەرىندەگى سالىق ءتۇسىمى ءتۇسىپ وتىرماق. وندا 250 ادام تۇراقتى جۇمىسپەن قامتىلادى. كاسىپكەر كاسىپورىنعا جەرگىلىكتى مامانداردىڭ تارتىلاتىنىنا سەندىردى. ول قازاقستان اۋماعىندا جۇزەگە اسىرىلعان باسقا دا جوبالاردى مىسالعا كەلتىردى.
– زاۋىت قۇرىلىسى باستالماي تۇرىپ جانە ونىڭ اشىلۋىنا دەيىن قانداي ماماندار قاجەت ەكەنىن سارالاپ, ولاردى وقىتۋ مەن دايىنداۋدى بۇگىننەن قولعا الۋ كەرەك, – دەدى ايماق باسشىسى.
بەردىبەك ساپارباەۆ ينۆەستورلارعا ىشكى جانە سىرتقى نارىقتاعى سوداعا دەگەن سۇرانىستى زەردەلەپ الۋدىن ماڭىزدىلىعىن جەتكىزدى.
– وندىرىلگەن ءونىم سۇرانىسقا يە بولۋى ءتيىس, – دەپ اتاپ ءوتتى وبلىس اكىمى.
يسمايل دجەيلان ءونىم تەك قازاقستاندا عانا ەمەس, سونىمەن قاتار الەمدىك نارىقتا دا سۇرانىسقا يە بولاتىنىنا سەندىردى. سەرىكتەستەر بۇل ىسكە كالتسيلەنگەن سودا وندىرىسىندە قولدانىلاتىن جاڭا تەحنولوگيالاردى تارتۋعا نيەتتى.
سونىمەن قاتار زاماناۋي ءوندىرىس تولىعىمەن قالدىقسىز جۇيەدە جۇمىس جاساماق. قالدىقتار قايتا وڭدەلەتىن بولادى. كەزدەسۋ بارىسىندا ينفراقۇرىلىممەن قامتاماسىز ەتۋ ماسەلەلەرى جانە جوبانى جۇزەگە اسىرۋعا قاتىستى باسقا اسپەكتىلەر سارالاندى.
