پىكىر • 07 قىركۇيەك، 2020

ەرتەڭىمىزگە باستايتىن ماڭىزدى قادام

27 رەت كورسەتىلدى

پرەزيدەنت قاسىم-جومارت توقاەۆتىڭ پارلامەنت پالاتالارىنىڭ بىرلەسكەن ماجىلىسىندە جاريالاعان «جاڭا جاعدايداعى قازاقستان: ءىس-قيمىل كەزەڭى» تاقىرىبىنداعى جولداۋى قازىرگى كۇردەلى كەزەڭدە رەسپۋبليكا حالقىن ەلەڭ ەتكىزگەن ەرەكشە جولداۋ بولدى. جەر-جاھانعا زور قاۋىپ توندىرگەن پاندەميا زارداپتارى سەيىلمەي وتىرعان بۇگىنگى تاڭدا ەكونوميكالىق داعدارىس پەن حالىقتىڭ ءال-اۋقاتىنىڭ تومەندەۋى ءاربىر ازاماتتى تولعاندىرىپ، كوكەيدە مىڭ-سان ساۋال تۋىنداتىپ وتىرعانى بەلگىلى.

مەملەكەت باسشىسى ءوزىنىڭ جاڭا جولداۋىندا مەملەكەت پەن قوعام ءومىرىنىڭ ءار سالاسىنا قاتىستى وي-پىكىرلەرى مەن تىڭ يدەيالارىن، ۇسىنىستارى مەن ءتيىستى ورگاندارعا ارنالعان تاپسىرمالارىن ورتاعا سالا كەلىپ، كوپشىلىكتىڭ كوكەيىندەگى سۇراقتارعا تياناقتى ءارى كوكەيگە قونىمدى جاۋاپ بەردى.

پرەزيدەنتتىڭ ايتۋىنشا، الەم سوڭعى 100 جىل ىشىندە بولماعان اسا كۇردەلى داعدارىستى باستان وتكەرۋدە. جاھاندىق ەكونوميكانى قايتا قالپىنا كەلتىرۋ ءۇشىن كەمىندە 5 جىلعا دەيىن ۋاقىت قاجەت دەيدى ساراپشىلار. «سوندىقتان الەمنىڭ جاڭا بولمىس-ءبىتىمى قالىپتاسىپ جاتقان شاقتا ءبىز رەفورماعا تىڭ سەرپىن بەرۋىمىز كەرەك» دەگەن پرەزيدەنت جاڭا رەفورمالاردىڭ نەگىزگى باعىتتارىنا توقتالدى. ول، اسىرەسە مەملەكەت باسقارۋدىڭ، جاڭا جاعدايداعى ەكونوميكالىق دامۋدىڭ، تەڭگەرىمدى اۋماقتىق دامۋدىڭ، ازاماتتاردىڭ ءال-اۋقاتىن جاقسارتۋدىڭ، قولجەتىمدى ءارى ساپالى ءبىلىم بەرۋدىڭ، دەنساۋلىق ساقتاۋ سالاسىن دامىتۋدىڭ، ادىلەتتى مەملەكەت قۇرۋدىڭ، ازاماتتاردى مەملەكەت باسقارۋ ىسىنە قاتىستىرۋدىڭ جاڭا ۇلگىلەرىن ۇسىندى.

مەن ءوزىم ءبىلىم مەن عىلىم سالا­سىنىڭ مامانى بولعاندىقتان، جولداۋداعى وسى ماسەلەگە ارنايى توقتالعالى وتىرمىن. مەملەكەت باسشىسى 2019 جىلعى جولداۋىندا ءبىلىم ساپاسىن جاقسارتۋ، قالا مەن اۋىل مەكتەپتەرى اراسىنداعى الشاق­تىقتى ازايتۋ، «ديپلوممەن – اۋىلعا!» باعدارلاماسىنىڭ اياسىن كەڭەيتۋ، دارىندى اۋىل جاستارىن ىرىكتەپ، وتاندىق جانە شەتەلدىك جوعارى وقۋ ورىندارىنا دايىنداۋ، از قامتىلعان جانە كوپبالالى وتباسىلاردى قولداۋ، جوعارى ءبىلىم­نىڭ ساپاسىنا قول جەتكىزىپ، با­سە­كەگە قابىلەتتى ماماندار دايارلاۋ سياقتى وزەكتى ماسەلەلەردى كوتەرگەنى بەلگىلى. بۇل مىندەتتەر بۇ­گىن­دە ورىندالۋ ۇستىندە. ال ەندى پرە­­زي­دەنت ق.توقاەۆ بيىلعى جاڭا جول­­داۋ­ىندا دا ءبىلىم مەن عىلىم سا­لا­سىن­داعى جاڭا ماسەلەلەرگە توقتالعان.

بيىلعى پاندەميا ءبىلىم سالا­سى­نا دا زاردابىن از تيگىزگەن جوق. ىندەت سالدارىنان مەكتەپ وقۋ­شى­لارى مەن ستۋدەنتتەر قاشىقتان وقۋعا كوشتى. بۇل جۇمىستىڭ ءتاسى­لى مەن مازمۇنى تۇبەگەيلى وزگەرۋ­دە. قاشىقتان وقىتۋدى ۇيىم­داس­تىرۋدا جىبەرىلگەن كەمشىلىكتەر كوپ. وسى ارادا پرەزيدەنت ءالى كۇنگە بىزدە ناقتى ءبىر ونلاين-پلاتفورما بولماعاندىقتان مۇعالىمدەر، وقۋشىلار مەن اتا-انالار كۇندىز-ءتۇنى «WhatsApp»-تان باس كوتەرمەي وتىرعانىن ايتتى. بۇل ماسەلەنى شەشۋ ءۇشىن قاجەتتى بارلىق فۋنكتسيالارى بار بىرىڭعاي ونلاين ءبىلىم بەرۋ پلاتفورماسىن شۇعىل ازىرلەۋ تۋرالى تاپسىرما بەردى. سونىمەن قاتار مەملەكەت باسشىسى ساپالى ءبىلىم الۋ ءۇشىن ادەتتەگىدەي ساباققا قاتىسىپ، مۇعالىمدەرمەن جانە سىنىپتاستارىمەن ارالاسىپ وقۋدىڭ ءجونى بولەك ەكەنىن، بۇل ءۇشىن سانيتارلىق تالاپتاردى ساقتاي وتى­رىپ، ءبىلىم الۋدىڭ ءداستۇرلى تاسى­لىنە قايتا كوشۋ قاجەتتىگىن ەسكەرتتى. «كۇندەلىكتى ماسەلەلەردى شە­شۋ­مەن قاتار، بالالاردىڭ بارىنە بىر­دەي مۇمكىندىك تۋعىزۋ ءۇشىن جۇيەلى شارالار قابىلداۋ قاجەت. بالا­لارىمىز قاي جەردە جۇرسە دە، قان­داي تىلدە وقىسا دا ساپالى ءبىلىم الۋى كەرەك»، دەدى ق.توقاەۆ.

ءبىلىم سالاسىنداعى باستى ما­سە­لەنىڭ ءبىرى – ۇستازدار جالاقىسىنىڭ ازدىعى ەكەنىن ايتقان پرەزيدەنت 2021 جىلدىڭ قاڭتارىنان باستاپ ولاردىڭ جالاقىسىن 25 پايىزعا كو­بەي­تەتىنىن نازارعا سالدى. 2025 جىل­عا دەيىن 6 جاسقا دەيىنگى بالا­لار مەكتەپكە دەيىنگى تاربيەمەن جا­نە وقىتۋمەن 100 پايىز قام­تى­لادى. مەملەكەت قاراپايىم اۋىل مەك­تەپتەرىنە قولداۋ كورسەتۋ ارقىلى قالا مەن اۋىلداعى ءبىلىم بەرۋ سا­لاسىنداعى الشاقتىقتى قىسقارتادى.

پرەزيدەنت ازاماتتاردىڭ ساۋات­تىلىعى مەن تسيفرلى بىلىكتىلىگىن ارتتىرۋ ماقساتىندا ۇكىمەتكە ۇزدىكسىز ءبىلىم بەرۋ تۇجىرىمداماسىن ازىرلەۋدى تاپسىردى.

كاسىبي ءبىلىم بەرۋدىڭ بۇكىل جۇيەسى ەڭبەك نارىعىندا سۇرانىسقا يە بىلىكتى ماماندار قالىپتاستىرۋعا باعىتتالۋعا ءتيىس. ءبىزدىڭ زامان – كاسىپكەرلەردىڭ زامانى. كاسىپكەرلىك قابىلەت ءار بالاعا جاس كەزىنەن دارىتىلۋى كەرەك. بۇل ءۇشىن «كاسىپكەرلىك نەگىزدەرى» ءپانى مەكتەپتەن باستاپ جوعارى وقۋ ورىندارىنا دەيىن تەگىس وقىتىلۋى كەرەكتىگىن ەسكەرت­تى پرەزيدەنت. بالالاردى سپورت پەن دەنە تاربيەسىنە تارتۋ، «بالا­لار ۇيىرمەلەرىن» قالپىنا كەلتى­رۋ نازارعا الىندى. وسى ارادا پرە­زي­دەنت بالالارعا زورلىق-زومبى­لىق جاساۋشىلاردىڭ جازاسى قاتاي­تىلاتىنىنا دا نازار اۋداردى.

«عىلىم سالاسىن دامىتۋ تۋرالى دا ايتقىم كەلەدى. بۇل ماسەلەدە بىزگە تىڭ كوزقاراس پەن جاڭا تاسىلدەر كەرەك، سونداي-اق حالىقارالىق تاجىريبەگە ارقا سۇيەۋىمىز قاجەت. ۇكىمەتكە جىل سايىن الەمنىڭ جەتەكشى عىلىمي ورتالىقتارىندا 500 عالىمنىڭ تاعىلىمدامادان ءوتۋىن قامتاماسىز ەتۋدى، سونداي-اق «جاس عالىم» جوباسى اياسىندا زەرتتەۋ جۇرگىزۋ ءۇشىن 1 مىڭ گرانت ءبولۋدى تاپسىرامىن»، دەگەن پرەزيدەنت عىلىمدى قارجىلاندىرۋدىڭ جانە قولداۋدىڭ ماڭىزدى كوزى – ءىرى كاسىپورىنداردىڭ، اسىرەسە شيكىزات سالاسىنداعى كومپانيالاردىڭ قاراجاتى ەكەنىن، ولار تاپقان تابىستىڭ 1 پايىزىن عىلىم مەن تەحنولوگيانى دامىتۋعا بەرۋ تۋرالى قولدانىستاعى نورما تالاپتارى ساقتالماي وتىرعانىن ەسكەرتتى.

پرەزيدەنت ۇكىمەتكە وسى قارا­جاتتى جيناقتاۋ ءىسىن ورتالىق­تان­دىرۋدى جانە ونىڭ بيۋدجەت ارقىلى جالپىۇلتتىق عىلىمي باسىمدىققا ساي ءبولىنۋىن قامتا­ما­سىز ەتۋدى تاپ­سىردى. ءىرى بيزنەس وكىلدەرىن وڭىر­لىك ۋنيۆەرسيتەتتەردىڭ عىلىمي قىز­­مەتىن قامقورلىققا الۋعا شا­قىر­عان مەم­لەكەت باسشىسى ەلىمىزدى عى­لىمي-تەحنو­لوگيالىق تۇرعىدان دامىتۋ جونىندەگى ار­ناۋلى باع­دارلامالىق قۇجات قاجەت ەكەنىن ايتتى. ونىڭ باستى مىندەتى ۇلتتىق دەڭگەيدەگى ناقتى ماسەلەلەردى شەشۋگە عىلىمنىڭ الەۋەتىن پايدالانۋ بولماق.

مىنە، جولداۋدىڭ ءار جولى وسى­لايشا ەلگە، جاس ۇرپاققا، جاس قا­زاقستان مەم­لەكەتىنىڭ بولاشا­عىنا دەگەن قامقورلىققا تولى. اباي اتىنداعى قازاق ۇلتتىق پەدا­گو­گيكالىق ۋنيۆەرسيتەتىنىڭ ۇجىمى ومىرلىك ماڭىزى زور بۇل جولداۋدى قىزۋ قۋاتتاي وتىرىپ، جاڭا جاعداي­داعى جاڭا قازاقستاننىڭ بىلىكتى پەداگوگ كادرلارىن دايارلاۋ ءۇشىن تىڭ سەرپىنمەن ەڭبەك ەتۋگە قۇلشىنۋلى ەكەنىن اتاپ كەتكىم كەلەدى.

ەلىمىزدە پەداگوگ كادرلارىن دايار­لاپ كەلە جاتقان قازاقستانداعى تۇڭعىش جوعارى وقۋ ورنى – اباي اتىنداعى قازاق ۇلتتىق پەدا­گو­گيكالىق ۋنيۆەرسيتەتى جىل سايىن الەمنىڭ ەڭ ۇزدىك ۋنيۆەرسيتەتتەرىنىڭ قاتارىندا ءوز ورنىن جوعارىلاتۋدا. QS World University Rankings-2021 جاھاندىق رەيتينگىنىڭ ناتيجەسى بويىنشا اباي اتىنداعى قازۇپۋ #601-650 ورىندارىن يەلەنىپ، الەم­دەگى ەڭ ۇزدىك پەداگوگيكالىق ۋني­ۆەر­سيتەتتەردىڭ توپ-5-ىنە كىردى. قازاقستان بويىنشا ۋنيۆەرسي­تەت­ارالىق رەيتينگتە اباي ۋنيۆەر­سيتەتى التىنشى ورىنعا يە بولدى.

اككرەديتتەۋ جانە رەيتينگتىڭ تاۋەلسىز اگەنتتىگىنىڭ زەرتتەۋ قورىتىندىسى بويىنشا اباي اتىنداعى قازاق ۇلتتىق پەدا­گو­گيكالىق ۋنيۆەرسيتەتى ۇزدىك تورتتىك­كە ەندى. پەداگوگيكالىق جوعارى وقۋ ورىن­دارىنىڭ اراسىندا ءبىزدىڭ ۋنيۆەرسيتەت 1-ورىنعا يە بولدى. جوعارى وقۋ ورىندارىنىڭ ينستيتۋتسيونالدىق رەيتين­گىسىندە باكالاۆرياتتىڭ ءبىلىم بەرۋ باعدار­لامالارىنىڭ باعىتتارى بويىنشا قورىتىندى كورسەتكىشتەرمەن ەل جوعارى وقۋ ورىندارىنىڭ اراسىندا ءبىرىنشى ورىندى يەلەندى. الەمدىك پاندەمياعا بايلانىستى تۋىنداپ وتىرعان قيىنشىلىقتارعا قاراماي ءبىز كاسىبي ماماندار دايارلاۋ جانە ءبىلىم ساپاسىن كوتەرۋ جولىندا تاباندىلىقپەن ەڭبەك ەتە بەرەمىز.

 

تاكير بالىقباەۆ،

اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى، پروفەسسور

سوڭعى جاڭالىقتار

اتىراۋدا 9 بالانى يت تالادى

ايماقتار • بۇگىن، 19:57

ۇقساس جاڭالىقتار