مەملەكەتتىك كورپوراتسيا قىزمەتكەرىن ۇيگە شاقىرتۋ ءۇشىن ازامات نەمەسە ونىڭ قامقورشىسى 1414 ءنومىرى بويىنشا بىرىڭعاي بايلانىس ورتالىعىنا قوڭىراۋ شالىپ, قىزمەتكە سۇرانىس قالدىرۋى كەرەك. بۇدان كەيىن ازاماتتارعا ارنالعان ۇكىمەتتىڭ ماماندارى ءوتىنىش قالدىرۋشىمەن بايلانىسىپ, قۇجاتتاردىڭ تولىقتىعىن ناقتىلايدى جانە ۇيگە بارىپ مەملەكەتتىك قىزمەت كورسەتۋدىڭ كۇنى مەن ۋاقىتىن بەلگىلەيدى. ايتا كەتەتىنى, قىزمەتكەرلەر ءوتىنىشتى قابىلداعاننان كەيىن قىزمەت الۋشىعا 7 جۇمىس كۇنىنەن كەشىكپەي بارۋى كەرەك.
«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما ءتورايىمى اسەمگۇل بالتاشەۆانىڭ ايتۋىنشا, بيىل 7 ايدا مەملەكەتتىك كورپوراتسيا قىزمەتكەرلەرى ءۇي-ۇيگە بارىپ 22 مىڭنان استام مەملەكەتتىك قىزمەت كورسەتكەن.
ء«موبيلدى توپتى ۇيگە شاقىرۋ كەزىندە حالىقتى قۇجاتتاندىرۋ قىزمەتىن كوشى-قون پوليتسياسىنىڭ قىزمەتكەرلەرى جۇزەگە اسىراتىنىن ەسكەرۋ قاجەت. سوندىقتان ەگەر جەكە كۋالىكتى جارامدىلىق مەرزىمى اياقتالۋىنا بايلانىستى اۋىستىرۋ قاجەت بولسا, ۇيگە بارۋ جانە قۇجاتتى دايىنداۋ ۋاقىتىن ەسكەرە وتىرىپ, ءوتىنىشتى كەم دەگەندە 2 اپتا بۇرىن قالدىرۋعا كەڭەس بەرەمىز», دەپ اتاپ ءوتتى ءا.بالتاشەۆا.
ەستەرىڭىزگە سالا كەتەيىك, ۇيگە شاقىرتۋ بارىسىندا الىناتىن ەڭ تانىمال قىزمەتتەردىڭ ىشىندە تولقۇجاتتار مەن جەكە كۋالىكتەر بەرۋ, مۇگەدەكتەردى سۋردو-تەفلوتەحنيكالىق جانە مىندەتتى گيگيەنا قۇرالدارىمەن قامتاماسىز ەتۋ, مۇگەدەكتەرگە پروتەزدىك-ورتوپەديالىق كومەك كورسەتۋ ءۇشىن ءتيىستى قاعازدارىن دايىنداۋ سياقتى قىزمەتتەر بار.
مەملەكەتتىك كورپوراتسيا قىزمەتكەرلەرى كوروناۆيرۋس پاندەمياسى جاعدايىندا قىزمەتتەردى بارلىق قاۋىپسىزدىك شارالارىن ساقتاي وتىرىپ كورسەتەدى. بارلىق مامان ماسكا مەن انتيسەپتيكتەرمەن قامتاماسىز ەتىلگەن. قىزمەت الۋشىلارمەن بايلانىستى ازايتۋ ءۇشىن حقو ماماندارى دالىزدەن ارى وتپەي, الەۋمەتتىك قاشىقتىقتى ساقتايدى.
