قوعام • 04 قىركۇيەك، 2020

Nur Otan دەنساۋلىق ساقتاۋ جانە ەڭبەك ۆيتسە-مينيسترلەرىنە شارا قولدانۋدى تالاپ ەتتى

57 رەت كورسەتىلدى

قازاقستاندا كوروناۆيرۋستىق ينفەكتسيادان 186 مەديتسينا قىزمەتكەرى قايتىس بولدى. الايدا قازا تاپقانداردىڭ تەك 9-ىنىڭ وتباسىنا عانا وتەماقى تولەنگەن. مۇنداي كوڭىل جۇدەتەتىن ستاتيستيكا بۇگىن "Nur Otan" پارتيالىق باقىلاۋ كوميتەتىنىڭ وتىرىسىندا جاريا ەتىلدى، دەپ حابارلايدى Egemen.kz پارتيانىڭ ءباسپاسوز قىزمەتىنە سىلتەمە جاساپ.

پارتيالىقتار COVID-بەن كۇرەس بويىنشا ەپيدەمياعا قارسى ءىس-شارالارعا تارتىلعان دارىگەرلەرگە اي سايىنعى جالاقىعا قوسىمشا ۇستەمەاقى تولەۋ، سونداي-اق وسى ىندەتتى جۇقتىرعان نەمەسە سودان قايتىس بولعان جاعدايدا مەديتسينا قىزمەتكەرلەرىنە وتەماقى تولەۋ ماسەلەلەرىن قارادى.

سونىمەن، پارتيالىق باقىلاۋ كوميتەتىنىڭ توراعاسى پاۆەل كازانتسەۆ الەۋمەتتىك مەديتسينالىق ساقتاندىرۋ قورىنان بۇگىنگە دەيىن ينفەكتسيا جۇقتىرعان 1093 دارىگەر عانا 2 ملن. تەڭگەدەن وتەماقى العانىنا توقتالدى. ال سول كەزدە، ناۋقاستانعان مەديتسينا قىزمەتكەرلەرىنىڭ جالپى سانى 11293 ادامدى قۇرادى.

"ەل پرەزيدەنتى قاسىم-جومارت كەمەل ۇلى توقاەۆ ءوزىنىڭ قازاقستان حالقىنا جولداۋىندا پاندەميا تۋىنداتقان داعدارىس ءبىزدى كوپ نارسەگە ۇيرەتكەنىن اتاپ ءوتتى. ماسەلەن، دارىگەردىڭ ەڭبەگىن باعالاي ءبىلۋ، ونىڭ ماڭىزدىلىعىن كۇشەيتۋ ءۇشىن ماتەريالدىق تۇرعىدان قولداۋ كەرەك. قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى مەن دەنساۋلىق ساقتاۋ ءمينيسترىنىڭ بىرلەسكەن بۇيرىعى 9 ساۋىردە قابىلدانىپ قويعانىنا قاراماستان، وتەماقى تولەۋ جونىندەگى وڭىرلىك كوميسسيالاردىڭ العاشقى وتىرىستارى تەك تامىز ايىندا ءوتتى. مەديتسينا قىزمەتكەرلەرىنىڭ ىندەت جۇقتىرۋىنىڭ العاشقى جاعدايلارى ناۋرىز ايىندا ورىن العان بولسا، بۇل ماسەلەنى وسىنشا سوزبالاڭعا سالۋدىڭ سەبەبى نەدە؟! ايماقتىق پارتيالىق باقىلاۋ كوميسسيالارى بيۋروكراتيا مەن سوزبۇيداعا سالۋ فاكتىلەرىن قاراپ، كىنالى پارتيا مۇشەلەرىن ەڭ قاتاڭ جاۋاپكەرشىلىك شارالارىنا تارتۋى كەرەك"، - دەدى پاۆەل كازانتسەۆ.

دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆانىڭ ايتۋىنشا، قازىرگى ۋاقىتتا ينفەكتسيا جۇقتىرۋشىلاردى 3 توپقا بولگەن. وسى ماقساتقا رەسپۋبليكالىق بيۋدجەتتەن 3 اي مەرزىمگە قاراجات قارالىپتى. ۇستەمەاقى ناقتى جۇمىس ىستەگەن كەزەڭ ءۇشىن اي سايىن ەسەپتەلەدى.

ءوز كەزەگىندە قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ ۇستەماقى تولەۋدەن باس تارتۋدىڭ نەگىزگى سەبەپتەرى رەتىندە ىندەتتى قايدان جۇقتىرعانىن كورسەتپەۋ نەمەسە ونى جۇقتىرۋدىڭ جۇمىس بارىسىندا ورىن الماۋى، دەرەكتەردى قاتە كورسەتۋ جانە ت.ب. اتادى.

"ۇلتتىق عىلىمي مەديتسينالىق ورتالىق" اق باسقارما توراعاسى، بەلگىلى پۋلمانولوگ اباي بايگەنجين دە قوسىمشا تولەمدەرگە قاتىستى ماڭىزدى ماسەلە كوتەردى. ول ۇعمو-تىڭ 2 اي بويى جۇقپالى اۋرۋلار كلينيكاسى رەتىندە جۇمىس ىستەگەنىن، ناۋقاستار تاۋلىك بويى قابىلدانعانىن، ال قوسىمشا جۇمىس ءۇشىن دەنساۋلىق ساقتاۋ مينيسترلىگىنەن ۇستەمەاقى تۇسپەگەنىن ايتتى.

"تاجىريبەمىزدى ەسكەرىپ، بىزگە ەڭ اۋىر ناۋقاستار جەتكىزىلدى. ءبىزدىڭ دارىگەرلەر، مەدبيكەلەر، سانيتارلار، تاۋلىك بويى جۇمىس ىستەدى، ويتكەنى ناۋقاستاردى ەمدەۋ كەرەك. جۇمىس ستاۆكاسى تۋرالى ويلاعان دا جوقپىز. ۇلتتىق ورتالىق بولعاندىقتان، بىزدە قارجىلىق رەسۋرستار بار، مەن شىعىنداردى ورتالىق ەسەبىنەن جاپتىم. ال بۇل اقشانى قايتارۋ ءۇشىن دەنساۋلىق ساقتاۋ مينيسترلىگىنە جۇگىنگەنگەنىمىزدە، بىزگە بۇل سىزدەردىڭ شىعىندارىڭىز، ءبىز ونى قايتارمايمىز دەدى. وڭىرلەردەگى ارىپتەستەرىمنىڭ جاعدايى قانشالىقتى قيىن بولعانىن جاقسى تۇسىنەمىن. ولاردىڭ جاعدايى بىزدەن ون ەسە اۋىر. ۇستەماقى تولەۋ سونشالىقتى قيىن با؟"،- دەدى اباي بايگەنجين.

پبك مۇشەسى، ءماجىلىس دەپۋتاتى مۇرات تەمىرجانوۆ ايماقتاردا ورىن العان اۋىر جاعدايلاردىڭ ءبىر كورىنىسى رەتىندە كوكشەتاۋ قالاسىنداعى مەديتسينالىق مەكەمەنى مىسالعا كەلتىردى. مۇنداعى مەديتسينا قىزمەتكەرلەرىنىڭ جۇمىس كۇنىنىڭ باسىندا جانە جۇمىستان سوڭ يفا (قاننىڭ يممۋنوفەرمەنتتىك تالداۋى) ادىسىمەن قاجەتتى تەستىلەۋدەن وتۋگە مۇمكىندىكتەرى بولماعان.

"كوكشەتاۋ اۋرۋحاناسىناداعى كەزەكشىلىك اۋىسىمنىڭ قالاي جۇزەگە اساتىنىن ءوز كوزىممەن كوردىم. ادامدار اۆتوبۋسقا وتىردى دا، ءۇيدى-ۇيىنە كەتىپ قالدى. وبلىستىق دەنساۋلىق ساقتاۋ باسقارماسىنان نەگە ولاردىڭ الدىمەن تەستىلەۋدەن وتپەيتىنىن سۇرادىم. سويتسەك، كوكشەتاۋداعى جەكە مەنشىك زەرتحانالاردا دا، مەملەكەتتىك زەرتحانالاردا دا يفا ادىسىمەن تەكسەرۋ جۇرگىزىلمەيتىن بولىپ شىقتى. شىن مانىندە، وسى 4-5 اي بويى ولار باس سانيتارلىق دارىگەردىڭ قاۋلىسىن بۇزدى. سوندا سىزدەر (دەنساۋلىق ساقتاۋ مينيسترلىگىنە قاراتىپ ايتىپ وتىر) ولاردىڭ قايسىسى جۇمىسقا باسقا جەردەن اۋرۋ جۇقتىرىپ كەلگەنىن، قايسىسى كەزەكشىلىك اۋىسىمىن اتقارۋ بارىسىندا جۇقتىرىپ العانىن قالاي انىقتادىڭىزدار؟ ىندەتتى كىمنىڭ قاي جەردەن جۇقتىرعانىن قالاي انىقتاۋعا بولادى؟"،- دەدى مۇرات تەمىرجانوۆ.

پارتيالىقتار قر دسم جانىنداعى "رەسپۋبليكالىق ەلەكتروندىق دەنساۋلىق ساقتاۋ ورتالىعى" شجق رمك قىزمەتىنە جەكە توقتالدى. پارتباقىلاۋ كوميتەتىنىڭ مالىمەتى بويىنشا، "Mapcovid" جۇيەسىن ەڭبەك مينيسترلىگىنىڭ اقپاراتتىق جۇيەسىمەن ينتەگراتسيالانۋ پروتسەسىنە بايلانىستى قاتەلىكتەر ورىن الىپ وتىر. جۇيە ستاتسيوناردا ەمدەلمەگەن، بىراق امبۋلاتوريالىق ەم قابىلداعان مەديتسينا قىزمەتكەرلەرىنىڭ قۇجاتتارىن قابىلدامايدى (جۇيە "دياگنوز تابىلمادى" دەگەن قاتە تابادى).

"بۇل نەگە بۇرىنىراق جاسالىپ قويماعان؟ تەحنيكالىق تۇرعىدان بۇل سونشالىقتى قيىن با الدە ونى شەشۋ ەندى عانا قولعا الىنىپ جاتىر ما؟ قاراپايىم نارسە عوي. Excel-دەگى بىرنەشە كەستەنى ءبىر جەرگە جيناۋ كەز كەلگەن ستۋدەنتتىڭ دە قولىنان كەلەدى! ال مۇندا وسىنى بۇتىندەي ءبىر شجق رمك اتقارا الماي وتىر. بۇل نە سوندا قاسارىسۋ ما الدە بەيقامدىق پا؟"، - دەدى پاۆەل كازانتسەۆ.

وتىرىس سوڭىندا پارتيالىق باقىلاۋ كوميتەتى دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆانى جانە ەڭبەك ۆيتسە-ءمينيسترى ەربول وسپانوۆتى سوگىس تۇرىندەگى پارتيالىق جاۋاپكەرشىلىككە تارتۋدى ۇسىندى.

ەڭبەك مينيسترلىگى مەن دەنساۋلىق ساقتاۋ مينيسترلىگىنىڭ وكىلدەرى بولسا، وتەماقى تولەۋ ماسەلەسى وسى جىلدىڭ 14 قىركۇيەگىنە دەيىن شەشىلەتىنىنە سەندىردى.

سوڭعى جاڭالىقتار

وڭىردە دامۋ ءۇردىسى بار

ايماقتار • كەشە

تاڭدايدىڭ تارلانى

تاريح • كەشە

جوعالعان سولدات

تاريح • كەشە

دومبىرانى دارىپتەدى

رۋحانيات • كەشە

ۇقساس جاڭالىقتار