بۇكىل الەمگە بەلگىلى كارديوحيرۋرگ يۋري پيا ەلىمىزدىڭ دەنساۋلىق ساقتاۋ جۇيەسىنە ەلەۋلى ۇلەس قوستى. ول كىسىنىڭ جەتەكشىلىگىمەن بۇگىنگى تاڭدا بىرەگەي كۇردەلى وتالار جاسالاتىن "كارديوحيرۋرگيا ۇلتتىق عىلىمي ورتالىعى" اق (بۇدان ءارى – ورتالىق) نەگىزى قالاندى. ورتالىق اشىلعاننان كەيىن حالىقارالىق اۋقىمداعى كلينيكاعا اينالىپ, الەمنىڭ 22 ۇزدىك كارديوحيرۋرگيالىق ورتالىعى قاتارىنا ەندى. 2011 جىلدان باستاپ ورتالىق دارىگەرلەرى قوسالقى قان اينالىمى قۇرالعىسىن يمپلانتتاۋ وتالارىن جاساي باستادى. 2012 جىلى وڭىردە العاشقى بولىپ يۋ.ۆ.پيا دونور جۇرەگىن ترانسپلانتتاۋ وتاسىن, 2016 جىلى ترانسپلانتولوگياداعى ەڭ كۇردەلى وتالاردىڭ ءبىرى سانالاتىن وكپە ترانسپلانتاتسياسىن رەسپۋبليكادا تۇڭعىش رەت جاسادى. 2017 جىلى ونىڭ جەتەكشىلىگىمەن حالىقارالىق دەڭگەيدە العاش رەت تولىقتاي جاساندى جۇرەك يمپلانتتالدى. 2018 جىلدىڭ جەلتوقسان ايىندا جۇرەكتىڭ سول جاق قالقانشاسىنىڭ يمپلانتتالعان قۇرىلعىسىن تولىق الماستىرۋ ورتالىقتىڭ ەڭ جوعارعى كورسەتكىشتەرىنىڭ ءبىرى بولدى. سونىمەن قاتار ورتالىق - جاڭا تۋعان سابيلەرگە جاسالاتىن جوعارى تەحنولوگيالىق كوپساتىلى كارديوحيرۋرگيالىق وپەراتسيالاردىڭ كۋراتورى.
ن.ي. پيروگوۆ اتىنداعى 2-ءشى ماسكەۋ مەملەكەتتىك مەديتسينالىق ينستيتۋتىنىڭ تۇلەگى يۋري ۆلاديميروۆيچ پيا ءتۇرلى جىلدارى رەسەي, قىرعىزستان, تۇركيا سياقتى ەلدەردە جۇمىس ىستەدى. 2003 جىلى ەلگە ورالىپ, قازاقستاندا كارديوحيرۋرگيالىق قىزمەتتى دامىتۋعا كىرىستى. 2003-2010 جىلدارى ۇلتتىق عىلىمي مەديتسينالىق ورتالىقتا قىزمەت ەتىپ, 2010 جىلدان «كارديوحيرۋرگيا ۇلتتىق عىلىمي ورتالىعى» اق باسقاردى. يۋري پيا وسى ورتالىقتاعى قىزمەتىن حيرۋرگيا جانە عىلىم جونىندەگى ديرەكتورى رەتىندە جالعاستىرا بەرەتىنىن ايتا كەتۋ كەرەك.
يۋري پيا - "قازاقستاننىڭ ەڭبەك ەرi" مەملەكەتتىك ناگراداسىنىڭ, "قۇرمەت" جانە "پاراسات" وردەندەرىنىڭ يەگەرى. قازاقستان پاتريوتتارىنىڭ V جالپىۇلتتىق فورۋمىندا "جىل پاتريوتى", "جىل دارىگەرى 2012" اتالىمىندا "التىن ادام" حالىقارالىق جۇلدەسىنىڭ لاۋرەاتى اتىندى.
"University Medical Center" كورپوراتيۆتىك قورىن بۇعان دەيىن باسقارىپ كەلگەن ءجۇمادىلوۆ جاقسىباي شايماردان ۇلى "National Laboratory Astana" باس ديرەكتورى جانە نازارباەۆ ۋنيۆەرسيتەتىنىڭ مەديتسينا مەكتەبىنىڭ پروفەسسورى رەتىندە قىزمەتىن جالعاستىرادى.
"University Medical Center" كورپوراتيۆتىك قورى انا مەن بالا ۇلتتىق عىلىمي ورتالىعى, بالالاردى وڭالتۋ ۇلتتىق ورتالىعى, رەسپۋبليكالىق دياگنوستيكالىق ورتالىق, "University Medical Center" كورپوراتيۆتىك قورىنىڭ قىزىلوردا فيليالى سياقتى ەلىمىزدىڭ جەتەكشى مەديتسينالىق ورتالىقتارىن بىرىكتىرەدى. قور "نازارباەۆ ۋنيۆەرسيتەت" دببۇ قامقورشىلىق كەڭەسىنىڭ 2015 جىلعى 20 قىركۇيەكتەگى شەشىمىمەن "ۇلتتىق مەديتسينالىق ورتالىق" اق ەنشىلەس ۇيىمدارى نەگىزىندە قۇرىلدى.
