پرەزيدەنت ق.توقاەۆتىڭ قازاقستان حالقىنا جولداۋىن تالقىلاۋعا بايلانىستى قالانىڭ زيالى قاۋىم وكىلدەرىمەن كەزدەسۋىندە الماتى قالاسىنىڭ اكىمى ب.ساعىنتاەۆ "مەملەكەت باسشىسى ءوزىنىڭ جولداۋىندا پاندەميا كەزىندەگى جانە ودان كەيىنگى كەزەڭدەگى جاڭا جاعدايدا مەملەكەتىمىزدىڭ دامۋى تۋرالى پايىمدايدى. ەل احۋالىنا ەگجەي-تەگجەيلى تالداۋ جاساعان ءداستۇرلى جولداۋدىڭ تۇيىنىندە ۇلتتىڭ جاڭا بولمىسىن قالىپتاستىرۋعا وزگەشە سيپات, زور سەرپىن بەرىلگەن" دەپ اتاپ ءوتتى.
"بۇل ەكونوميكانى ىنتالاندىرۋعا ارنالعان اۋقىمدى پاكەت. جاڭا سىن-قاتەرلەرگە وراي مەملەكەتتىك باسقارۋ جۇيەسىن جەتىلدىرۋ. الەۋمەتتىك رۋحاني باعدار الۋ. مەملەكەت باسشىسى تۇجىرىمداعانداي, "جاڭارعان ۇلت قانا جاڭعىرعان ەلدىڭ جەتىستىگىن جاھان جۇرتىنا تانىتا الادى". سوندىقتان ۇلتتىڭ جاڭا ساپاسىن قالىپتاستىرۋ مىندەتتەرى وتە ماڭىزدى.
بۇگىن ءبىزدىڭ اڭگىمەمىزدىڭ ۇلت رۋحانياتىنان, وسكەلەڭ ۇرپاقتىڭ بويىندا ۇلتتىق قۇندىلىقتاردى دۇرىس تاربيەلەۋ ماسەلەسىنەن باستالعانى وتە ورىندى. الماتىنىڭ زيالىلارى قازىرگى كەزەڭدە رۋحاني دامۋدىڭ جاڭا پاراديگماسىن قالىپتاستىرۋ بويىنشا وتە ۇقىپتى ءارى ەلەۋلى جۇمىستى قالاي دۇرىس قۇرۋ تۋرالى ءوز پايىمداۋلارىمەن بولىسەتىنىنە سەنىمدىمىن. بۇل رەتتە جولداۋدا مەملەكەت باسشىسى "قازاق زيالىلارىنىڭ جاڭا كەزەڭدەگى مىندەتى – ۇلت بولمىسىنىڭ جاڭا قاعيداتتارىن ورنىقتىرۋ» دەپ قاشان دا ەل ايناسىنىڭ ولشەمى, باعىت-باعدارى بولىپ تابىلاتىن زيالى قاۋىمنىڭ مىندەتىن تايعا تاڭبا باسقانداي انىق كورسەتكەن.
شىنىندا دا, الەمنىڭ وزگەرگەنىن كورىپ وتىرمىز. قازىرگى كەزەڭ – وزگەرىستەر مەن سەرپىلىستەر, ىرگەلى ىزدەنىستەر كەزەڭى. كەز كەلگەن ۇلتقا ۇدايى جاڭارىپ, جاڭعىرىپ وتىرۋ ءتان.
الماتى اكىمدىگىنىڭ پاندەميادان تۇيگەنى – بۇل ۇلتتىڭ جاڭا ساپاسى, ونىڭ باسەكەگە قابىلەتتىلىگى مەن ينتەللەكتۋالدىق الەۋەتى, ەڭ الدىمەن: دەنساۋلىق ساقتاۋ جۇيەسىنە, ءبىلىم بەرۋ, اۋقىمدى تسيفرلاندىرۋ ارقىلى يننوۆاتسياعا اشىقتىققا, ۇلتتىڭ ۋاقىت تالابىنا بەيىمدەلۋ قابىلەتىنە جانە وتكەنى, بۇگىنگىسى مەن بولاشاعى ءۇشىن ءوزىنىڭ جوعارى جاۋاپكەرشىلىگىن تۇسىنۋىنە بايلانىستى", - دەدى ءوز سوزىندە ب.ساعىنتاەۆ.
