وسىعان بايلانىستى پرەزيدەنت وندىرۋشىلەردى قولداۋ شارالارىنا توقتالىپ, ولاردىڭ اراسىندا كۆازيمەملەكەتتىك سەكتوردىڭ بارلىق قاتىسۋشىلارى ءۇشىن مەملەكەتتىك ساتىپ الۋ سالاسىندا بىرىڭعاي زاڭ قۇرۋ باستاماسىن تىلگە تيەك ەتتى. سوعان سايكەس قازاقستاندىق قامتۋ ساتىپ الۋ پروتسەسىنىڭ نەگىزگى فاكتورلارىنىڭ ءبىرى بولۋى ءتيىس.
پرەزيدەنت جاڭا ەكونوميكالىق باعىتتىڭ نەگىزگى جەتى باعىتىنىڭ ءبىرى ازاماتتاردىڭ يگىلىكتەرى مەن مىندەتتەرىن ءادىل ءبولۋ قاعيداتىنا باسىمدىق بەردى. بۇل شەشىم شىن مانىندە وتە ماڭىزدى. وسىعان بايلانىستى تۇرعىن ءۇي ماسەلەسىن ەرەكشە اتاپ ءوتۋ قاجەت. ويتكەنى جاس وتباسىلار ءۇشىن باستى پروبلەمالاردىڭ ءبىرى – جەكە تۇرعىن ءۇيدىڭ جوقتىعى.
بۇگىنگى تاڭدا قازاقستان كاسىپكەرلەرى 40-قا جۋىق ءتۇرلى سالىق تولەيدى. سول سەبەپتى سالىق ساياساتىنىڭ جۇيەسى مەن تەتىگىن قايتا قاراۋ, ونىڭ ىشىندە سالىق مولشەرلەمەلەرىن سارالاۋ مۇمكىندىگىن قاراستىرۋ تاپسىرىلدى. بۇل شارالار جاستاردى كاسىپكەرلىككە تارتۋعا جاڭا سەرپىن بەرەدى.
اۋىلدىق جەرلەر مەن مونوقالالاردى دامىتۋعا كوپ كوڭىل ءبولىندى. قالا قۇراۋشى كاسىپورىنداردى تارتا وتىرىپ, شالعاي ەلدى مەكەندەردى دامىتۋ ءۇشىن جاڭا جاعدايلار جاساۋ قاجەت. بۇل وڭىرلىك ءبىلىم بەرۋ ورتالىقتارىن, ونىڭ ىشىندە شاعىن قالالاردا ورنالاسقان ۋنيۆەرسيتەتتەر مەن كوللەدجدەردى دامىتۋ تەتىگىن ىسكە قوسۋعا مۇمكىندىك بەرەدى.
الىبەك رايپوۆ,
«ەكونوميكالىق زەرتتەۋلەر ينستيتۋتى» اق جەتەكشى ساراپشىسى
