سوندىقتان ۇلتتىق بانكتىڭ قۇرامىنان اقشا-نەسيە ساياساتى كوميتەتىن قۇرۋ تۋرالى شەشىمنىڭ قابىلدانۋى قۇپتارلىق قادام دەپ ەسەپتەيمىن. ءبىر قاراعاندا سەنىم دەگەن ءسوزدىڭ قارجى سالاسىنا قاتىسى جوقتاي كورىنەدى. بىراق اقشا-نەسيە ساياساتىنا دەگەن سەنىم ەكونوميكالىق عىلىمنىڭ ءبىر بولىگى بولىپ تابىلاتىنىن ۇمىتپايىق.
ەل حالقىنىڭ اقشا-نەسيە ساياساتىنا دەگەن سەنىمى جوعارى بولسا, ۇلتتىق ۆاليۋتا دا تۇراقتىلىعىن ساقتايدى. جەرگىلىكتى تۇرعىندار سەنىم ارتقان سوڭ, شەتەلدىك ينۆەستورلاردىڭ كوكەيىندە ەشقانداي كۇدىك قالمايدى. وكىنىشكە قاراي بۇعان دەيىن ورىن العان دەۆالۆاتسيالاردىڭ سالدارىنان رەسپۋبليكانىڭ اقشا-نەسيە ساياساتىنا دەگەن سەنىم تىپتەن قۇلدىراپ كەتتى. ادامداردىڭ ارتىلعان اقشانى تەڭگەمەن ەمەس, دوللارمەن ساقتاۋعا تىرىساتىنى دا سوندىقتان. ال تەڭگە مەن دوللاردى سالىستىرار بولساق, ءبىزدىڭ ۆاليۋتانىڭ كىرىستىلىگى الدەقايدا جوعارى. سونى بىلە تۇرا, تۇرعىندار شەتەلدىك ۆاليۋتاعا يەك ارتادى. اقشا-نەسيە ساياساتىنا دەگەن سەنىمنىڭ تومەندىگىن وسىدان-اق اڭعارۋعا بولادى.
مەملەكەتىمىز بۇرىن ىشكى اقشا-نەسيە ساياساتىنا نازار اۋدارسا, بۇل جولى سىرتقى ساياساتقا كوڭىل ءبولىپ وتىر. تەكتەن تەك ەمەس, ارينە. ۇلتتىق بانك تە سوڭعى جىلدارى وسى باعىتتا جەمىستى جۇمىس ىستەپ كەلەدى. سونىڭ ناتيجەسىندە قازىر باس بانكتىڭ جۇمىسى الدەقايدا اشىق بولا ءتۇستى. مۇنى نارىقتىڭ كاسىبي ويىنشىلارى دا بايقاپ, باعالاپ وتىر.
شەتەلدىكتەردىڭ اقشا-نەسيە ساياساتىنا دەگەن سەنىمىن ارتتىرۋ قاشاندا ماڭىزدى. سەبەبى ءبىز ءالى كۇنگە دەيىن سىن-تەگەۋرىندەردەن ارىلماعان قاۋىپتى نارىققا جاتامىز. دەسە دە قازىر قازاقستانداعى عانا ەمەس, تۇتاس الەمدەگى جاعداي ءماز ەمەس. ەگەر جاعداي رەتتەلسە, شەتەلدىك ينۆەستورلاردىڭ ءبىزدىڭ ەلگە قارجى قۇيۋىنا اسەر ەتەتىن ءبىر فاكتور بار. ول – قازاقستانداعى بازالىق مولشەرلەمەنىڭ جوعارىلىعى. قازىر بازالىق مولشەرلەمە 9 پايىزدى قۇراپ وتىر. دەمەك كىرىستىلىك جوعارى. ىرگەمىزدەگى رەسەيدە, باسقا دا دامۋشى نارىقتارداعى بازالىق مولشەرلەمە بىزبەن سالىستىرعاندا الدەقايدا تومەن.
پرەزيدەنت ايتقان كەشەندى شارالار ءبىر ايدا, ءبىر جىلدا جاسالاتىن دۇنيەلەر ەمەس. ول ءاردايىم ساقتالۋعا ءتيىس ۇزاقمەرزىمدى ءۇردىس. نارىقتاعى جاعداي اشىق بولۋى كەرەك. قارجىلىق رەتتەۋشىنىڭ اشىقتىققا كوڭىل ءبولىپ وتىرعانى قۋانتادى.
ولەگ چەبوتارەۆ,
قارجى ساراپشىسى
