ءبىز ءوزىمىزدى ۇدايى قامشىلاپ, العا ۇمتىلا بىلسەك قانا «قازاقستان-2050» ستراتەگياسىنداعى بيىك ماقساتتارعا جەتە الامىز. پارتيامىز تۇعىرلى, ەلدىگىمىز عۇمىرلى بولسىن. ماڭگىلىك ەلدى بىرگە جاسايىق!
نۇرسۇلتان نازارباەۆ,
«نۇر وتان» پارتياسىنىڭ XV سەزىندە سويلەگەن سوزىنەن.
سوناۋ توقسانىنشى جىلداردىڭ توقىراۋىنىڭ تالمالى دا تۇيىققا تىرەلگەن تۇسىندا ايتىلعان ەلباسى نۇرسۇلتان نازارباەۆتىڭ «مەن ءۇشىن ەلىمدى دامىعان ەلدەردىڭ ساپىنا تۇرعىزىپ, ساناتىنا قوسۋدان ۇلكەن ماقسات جوق!», دەگەن وسى ءبىر اۋىز ءسوزىنىڭ ءدال بۇگىنگى كۇنى اقيقاتقا اينالارىنا يلانعانىمىزدان دا يلانباعاندىعىمىز باسىمداۋ بولعاندىعىن ايتايىق تا اۋەلى. قايداعى دامىعان ەل, قايداعى ساناتقا قوسىلۋ؟! «ەل ءىشى كەبەك جەي باستادى», دەپ الىپقاشپا جەل سوزبەن ەلدىڭ ۇرەيىن ۇشىرىپ جاتقان شۋىلداق توپتاردىڭ توقىم قاعىپ, جەلىگىپ تۇرعان شاعى بولاتىن ول تۇس.
ءبىز ءوزىمىزدى ۇدايى قامشىلاپ, العا ۇمتىلا بىلسەك قانا «قازاقستان-2050» ستراتەگياسىنداعى بيىك ماقساتتارعا جەتە الامىز. پارتيامىز تۇعىرلى, ەلدىگىمىز عۇمىرلى بولسىن. ماڭگىلىك ەلدى بىرگە جاسايىق!
نۇرسۇلتان نازارباەۆ,
«نۇر وتان» پارتياسىنىڭ XV سەزىندە سويلەگەن سوزىنەن.
سوناۋ توقسانىنشى جىلداردىڭ توقىراۋىنىڭ تالمالى دا تۇيىققا تىرەلگەن تۇسىندا ايتىلعان ەلباسى نۇرسۇلتان نازارباەۆتىڭ «مەن ءۇشىن ەلىمدى دامىعان ەلدەردىڭ ساپىنا تۇرعىزىپ, ساناتىنا قوسۋدان ۇلكەن ماقسات جوق!», دەگەن وسى ءبىر اۋىز ءسوزىنىڭ ءدال بۇگىنگى كۇنى اقيقاتقا اينالارىنا يلانعانىمىزدان دا يلانباعاندىعىمىز باسىمداۋ بولعاندىعىن ايتايىق تا اۋەلى. قايداعى دامىعان ەل, قايداعى ساناتقا قوسىلۋ؟! «ەل ءىشى كەبەك جەي باستادى», دەپ الىپقاشپا جەل سوزبەن ەلدىڭ ۇرەيىن ۇشىرىپ جاتقان شۋىلداق توپتاردىڭ توقىم قاعىپ, جەلىگىپ تۇرعان شاعى بولاتىن ول تۇس.كەڭەس وداعى ءوزىنىڭ ىدىراعانىمەن قويماي, «كوممۋنيزم قۇرىلىسشىلارى» بولعان ءوز حالقىنىڭ ىڭىرشىعىن اينالدىرىپ, تاقىر كەدەيشىلىككە ۇرىندىرىپ تۇرالاتىپ تاستاپ كەتكەن سول تۇستا اۋپىرىمدەپ كۇن كورۋدىڭ امالىنا كوشكەن قازاقتىڭ تاۋەلسىزدىگىنىڭ كوگىنەن بۇگىنگى نۇرلى كۇن تۋار دەپ كىم ويلاعان؟! سول نۇرلى كۇندى تۋدىرۋدىڭ تۇعىرىندا تاس تابانداپ تۇرا العان جانە ءالى دە تايسالماي تۇرعان ءبىر عانا ادامدى, نۇرسۇلتان نازارباەۆتى عانا بۇگىنگى جانە دە ماڭگىلىكتىڭ دە ماڭگىلىگىنىڭ تاريحىنىڭ مويىندارى بار!
بىزگە وسىلاي دەپ باتىل بايلام جاساتىپ وتىرعان جاي جۋىردا عانا سانكت-پەتەربۋرگ قالاسىندا بولىپ وتكەن G-20, ياعني «ۇلكەن جيىرمالىق» ەلدەرىنىڭ كوشپەلى بريفينگىنىڭ بارىسىندا بۇكىلالەمدىك ەكونوميكالىق فورۋم 2013-2014 جىلداردىڭ جاھاندىق باسەكەلەستىك تۋرالى جىلدىق ەسەبى بويىنشا قازاقستان ءبىر ساتىعا العا باسىپ, 148 ەلدىڭ اراسىنان 50-ءشى ورىندى يەلەنگەندىگىن جاريالاۋى بولدى.
بۇل بارلىق قازاق بالاسىنىڭ, ءاربىر قازاقستاندىقتىڭ سۇيىنشىلەيتىن قۋانىشى ەدى! ءبىز ءوز باسىمىز «نۇر وتان» پارتياسىنىڭ XV سەزىنە قاتىسىپ جانە دە وسى ۇلكەن جيىندا قازاقستان رەسپۋبليكاسىنىڭ پرەزيدەنتى – پارتيا توراعاسى نۇرسۇلتان نازارباەۆتىڭ «قازاقستان-2050» ستراتەگياسى جانە «نۇر وتان» پارتياسى» تاقىرىبىنداعى تەرەڭ ماعىنالى ءسويلەگەن ءسوزىن تىڭداپ, سونان سوڭ وسى سەزدە قابىلدانعان پارتيانىڭ «نۇر وتان. نۇرلى بولاشاق جولىندا!» ساياسي دوكتريناسىنىڭ قاعيداتتارىمەن تولىق تانىسقان ساتتە كوڭىلگە ەڭ اۋەلى وسى ءبىر جايدىڭ ورالعانى بار. ءيا, ءبىز ەلۋىنشى ورىندامىز! وسى ءبىر وي تۇرعىسىنان تولعانا وتىرىپ, ەلدەگى ەڭ قۋاتتى ساياسي كۇش – «نۇر وتانعا» ەندىگى ارادا الىس بولاشاققا كوز تىگىپ جاسالعان «قازاقستان-2050» ستراتەگياسىندا بەلگىلەنگەن بيىك مەجەلەرگە, ايقىن ماقساتتارعا قول جەتكىزە وتىرىپ, ونى مۇلتىكسىز جۇزەگە اسىرىپ, قازاق ەلىن دامۋدىڭ دارا جولىنا باستاۋ سياقتى اسا جاۋاپتى ميسسيا جۇكتەلىپ وتىرعاندىعىن ۇعىندىق.
«نۇر وتان» پارتياسى مەيلىنشە قىسقا ۋاقىتتا الىپ قۇرىلىمعا اينالىپ, ەلىمىزدىڭ ساياسي-الەۋمەتتىك ومىرىندەگى بارلىق ىستەرگە بەلسەنە ارالاسىپ, قازاقستاندىقتاردىڭ زور سەنىمىنە يە بولعاندىعىنا كۇمان كەلتىرۋگە دە ەشبىر نەگىز جوق دەپ سانايمىز. بۇل – الدەقاشان مويىندالعان اقيقات! جانە دە ەلباسىنىڭ بارلىق باستامالارىن ءاردايىم قىزۋ قولداۋ ارقىلى دا پارتيانىڭ زور ابىروي جيناي بىلگەندىگىن ايتقان ءلازىم.
«ەلىمىزدى الەمنىڭ ەڭ قۋاتتى 30 ەلىنىڭ قاتارىنا قوسۋ – الدىمىزداعى ۇلكەن, ۇلى ماقسات. بۇل «نۇر وتاننىڭ» بولاشاققا جول سىلتەيتىن تەمىرقازىعى بولۋعا ءتيىس», دەگەن نۇرسۇلتان نازارباەۆتىڭ سەزدە ايتقان وسى ءبىر اۋىز ءسوزى, ياعني الداعى ۋاقىتتا قازاق ەلىن الەمنىڭ ەڭ دامىعان 30 ەلىنىڭ ءبىرى بولۋىنا قول جەتكىزۋ پارتيانىڭ عانا ەمەس, بارشا قازاقستاندىقتاردىڭ ءومىرىنىڭ تەمىرقازىعىنا اينالۋى كەرەك. ويتكەنى, ءبىز سوعان لايىقتى ەلمىز! ءبىز ءوزىنىڭ دامۋ تاريحىندا بۇرىن-سوڭدى تاپ بۇگىنگىدەي ەكونوميكالىق جانە الەۋمەتتىك تاماشا تابىستارعا يە بولىپ كورمەگەن قازاقستاندى ەلباسىنىڭ قايراتتى دا قارىمدى ەرىك-جىگەرىنىڭ جانە دە كەمەل كەلەشەكتى بولجاپ بەرە الىپ وتىرعان كورەگەندىگىنىڭ ارقاسىندا ەۋرازيا كەڭىستىگىنىڭ ابىرويى دا, اتاق-داڭقى دا لايىقتى جاڭا مەملەكەتى بولا الدىق. «ەندىگى جەردە قاشان دا بۇكىلالەمدىك قوعامداستىقپەن قاتار ادىمداۋعا ءتيىسپىز», دەگەن مىندەتتى نۇرسۇلتان نازارباەۆ ءبىزدىڭ الدىمىزعا وسى تۇرعىدان تارتىپ وتىرعاندىعى دا بار. كوكەيىمىزگە وسىنى تۇيە بىلگەنىمىز ءجون.
دۇربەلەڭى مەن دۇرمەگى كوبەيىپ بارا جاتقان بۇگىنگى دۇنيە قۇرىلىمىندا ەلىمىزدەگى تىنىشتىق پەن ىنتىماقتى, ەل بىرلىگىن كوزىمىزدىڭ قاراشىعىنداي ساقتاي وتىرىپ, «قازاقستان-2050» ستراتەگياسىن ويداعىداي ەتىپ جۇزەگە اسىرۋ, ەلباسىنىڭ سوزىمەن ايتقاندا, «ءبىزدىڭ الەمدەگى ەڭ تانىمال ۇلتتاردىڭ شوعىرىنا ءبىرجولاتا قوسىلۋىمىز ءۇشىن بەرىلگەن ۇلى تاريحي ءمۇمكىنشىلىك», ەكەندىگىن دە ەستە ۇستاعان ابزال. وسى ءبىر قاعيدات ءارى-بەرىدەن سوڭ «قازاقستان-2050» ستراتەگياسىن جۇزەگە اسىرۋ باعىتىندا جۇرگىزىلەتىن بار جۇمىستارىمىز بەن ىستەرىمىزدىڭ يدەلوگياسىنا اينالۋى قاجەت دەپ سانار ەدىك.
الدا تۇرعان اۋقىمدى دا كۇردەلى جۇمىستاردى ءبىز جاھاندىق دامۋدىڭ بۇگىنگى داعدارىستاعى زاڭدىلىقتارى مەن قاراما-قايشىلىقتارى جانە دە ءتىپتى جان الىسىپ جان بەرىسەر قىزۋ باسەكەلەستىك جاعدايلارىندا جۇزەگە اسىرۋعا تۋرا كەلەتىندىگىن دە ەستەن شىعارماۋعا ءتيىستىمىز. بۇل ورايدا ەلباسىنىڭ «قازاقستان-2050» ستراتەگياسىندا ءححى عاسىردىڭ جاھاندىق 10 سىن-قاتەرىن ناقتىلاپ كورسەتىپ بەرگەندىگىن دە ءجيى ءجيى ەسكە الىپ وتىرعانىمىز ابزال. ويتكەنى, ەلباسى اتاپ ايتقان سول بولجامدى قاتەرلەردىڭ الدى قازىردىڭ ءوزىندە بوي كورسەتىپ وتىرعاندىعىن دا اڭداۋعا بولار ەدى. بيىلعى جىلدىڭ باسىنداعى «كيپر داعدارىسى» بەتىنىڭ زورعا قايتارىلعاندىعىنا قاراماستان, قازىر ەۋرووداقتىڭ ەكونوميكاسى بولسا, ول ەڭ تومەنگى ماكروكورسەتكىشتەر ۇشىنا ءىلىنىپ تۇر. الەۋمەتتىك داعدارىس تا باسەڭسي قويعان جوق. تاياۋ شىعىس ەلدەرىندەگى الدەبىر قارۋلى قاقتىعىستار دا مىناۋ سولقىلداق الەمنىڭ تۇراقسىزدىعىن ءالى دە شايقاي تۇسكىسى كەلگەندەي. مىنە, بۇگىنگى الەمنىڭ دامۋ ءۇردىسى بىزگە نۇرسۇلتان نازارباەۆتىڭ سەزدە ايتقان «مەنىڭ ىشكى تۇيسىگىم مەن تاجىريبەم الەمنىڭ تاياۋ بولاشاقتاعى دامۋ كەزەڭى اسا كۇردەلى بولاتىنىن اڭداتادى. وسىنداي جاعدايدا بارلىق قازاقستاندىقتار ءوز وتانىمىزداعى تۇراقتىلىق پەن دامۋ باعدارىن بولجاۋعا بولاتىندىعىنىڭ باعاسىن بىلۋگە ءتيىس!», دەگەن ءسوزىنىڭ مانىنە اسا دەن قويا وتىرىپ جانە دە ەل بىرلىگى قازاقستاننىڭ دۇنيە ەلدەرىنىڭ الدىڭعى قاتارىنا شىعۋىنىڭ باستى كريتەريى ەكەندىگىن دە ۇعىنۋ كەرەك.
ءبىز قانداي جاعداي بولسا دا, ءوز ەلىمىزدى تىعىرىققا تىرەيتىن ساياساتتان دا, ءتۇرلى ارەكەتتەردەن دە ساقتاي بىلۋگە ءتيىستىمىز. ەلباسىنىڭ وسى باعىتتا جۇرگىزىپ كەلە جاتقان جاسامپاز باعىتىنىڭ دۇرىستىعىنا ەل تاۋەلسىزدىگىنىڭ جيىرما ەكى جىل بويىنداعى جىلناماسى ايقىن كوز جەتكىزىپ بەرىپ وتىرعاندىعى دا اقيقات. بۇل ورايدا ەلباسىنىڭ ءبىر عانا قازاقستاندى يندۋستريالاندىرۋدىڭ جاڭا باعىتى مەن ساياساتىن بەلگىلەۋى ەلىمىزدىڭ الەمدەگى قۋاتتى دا دامىعان مەملەكەتتەردىڭ قاتارىنان الار ورنىمىزدى انىقتاۋشى باستى ءارى ماڭىزدى فاكتور ەكەندىگىن دە ۋاقىت وزعان سايىن ۇعىندىرىپ كەلە جاتقاندىعى دا انىق جاي. ءبىر كەزدەرى, ياعني تاۋەلسىزدىكتىڭ العاشقى كەزەڭدەرىندە «ەڭ اياعى قارا شەگە دە شىعارمايدى» دەپ سوگەتىن قازاقستان وسى كۇندەرى الەمنىڭ 111 ەلىنە ءوزىنىڭ دايىن ونىمدەرىن ەسكپورتتاپ كەلە جاتىر! جانە دە قازاقستاندا ەكونوميكانىڭ تىپتەن دە جاڭا سالالارى پايدا بولعاندىعى, ءسويتىپ, ەلىمىزدە بۇرىن-سوڭدى ەشقاشان بولىپ كورمەگەن اۆتوموبيل, لوكوموتيۆ, ۆاگون مەن تىكۇشاقتار جاسايتىن وندىرىستەردىڭ ىسكە قوسىلىپ, جۇمىس ىستەي باستاعانى, سونداي-اق ەكسپورتقا اككۋمۋلياتورلار, ترانسفورماتورلار, مەتالل قۇبىرلارى, تىڭايتقىشتار, ازىق-ت ۇلىك ونىمدەرى سياقتى كوپتەگەن دايىن تاۋارلاردى شىعارا باستاعانى دا وسى يندۋستريالاندىرۋدىڭ بىزدەگى العاشقى ءارى وتە ماڭىزدى قاناتقاقتى ناتيجەلەرى مەن تابىستارى بولىپ سانالادى.
يندۋستريالاندىرۋدىڭ وسى باعدارلاماسىنا ساي ەل بويىنشا 250-دەن استام جاڭا ءونىم تۇرلەرىن شىعارۋ يگەرىلدى. ولاي بولسا, يندۋستريالاندىرۋ باعدارلاماسىنىڭ قازاقستان ءۇشىن ومىرلىك ماڭىزى بار ەكەندىگىن ەستەن شىعارماعانىمىز ابزال. ەلباسىنىڭ جۋىردا بولىپ وتكەن ۇكىمەتتىڭ كەڭەيتىلگەن وتىرىسىندا ەل بويىنشا يندۋستريالاندىرۋ باعدارلاماسى مەن بەرىلگەن تاپسىرمالاردىڭ ورىندالۋ جايىن جان-جاقتى سۇراپ, سوعان وراي, تالاپ تا قويعاندىعىن ەل تاعدىرى ءۇشىن ءاردايىم الاڭداپ, مازاسىز كۇي كەشىپ كەلە جاتقاندىعى دەپ ۇعىنايىق ءارى وسى جاۋاپكەرشىلىكتى ەلباسىمەن بىرگە ارقايسىمىز دا سەزىنە بىلەيىك!
قازىرگى ۋاقىتتا قوعام الەۋەتى مەن كوزقاراستارىنىڭ وزگەرۋىنە بايلانىستى جۇيەلى جاڭارۋ تالابى قويىلىپ وتىرعاندىعى دا باسى اشىق ماسەلەنىڭ ءبىرى. بۇل كۇندەرى حالىق مۇددەسىنىڭ جوقتاۋشىسى جانە دە ءبىزدىڭ بۇكىل قوعامىمىزدىڭ ايناسى ىسپەتتى بولىپ وتىرعان «نۇر وتان» پارتياسىنىڭ سەزىندە ءبىزدىڭ مۇراتتارىمىز بەن قۇندىلىقتارىمىزدى, نەگىزگى قاعيداتتارىمىزدى انىقتاپ بەكىتكەن ساياسي دوكترينانىڭ قابىلدانۋى دا ماڭىزى جوعارى وقيعالار قاتارىنان ورىن الدى.
«نۇر وتان» پارتياسى قازاقستاندىقتاردىڭ الدىندا تۇرعان تاريحي مىندەتتەردى جۇزەگە اسىرۋ ءۇشىن قوعامدى ۇيىستىرىپ, توپتاستىراتىن جانە ەلباسىنىڭ مەملەكەتتىك باعىتى مەن «قازاقستان-2050» ستراتەگياسىن ويداعىداي ورىنداۋدى قامتاماسىز ەتۋدەگى بارىنشا باسىمدىعى بار ساياسي كۇش رەتىندە ءوزىنىڭ ءححى عاسىرداعى ميسسياسىن وسى دوكترينامەن ايقىنداپ الىپ وتىر. اتا-بابالارىمىز سان عاسىرلار بويى ارمانداسا دا, وسى تاۋەلسىزدىك ءۇشىن قانشاما الىسىپ, ارپالىسسا دا قول جەتكىزە الماعان بۇگىنگى قازاقستاننىڭ تاۋەلسىزدىگىن باستى جەتىستىككە بالاي وتىرىپ, ونى حالقىمىزدىڭ قاسيەتتى قۇندىلىعى دەپ تانۋ ارقىلى جانە سول تاۋەلسىزدىكتى نىعايتۋدى, ەلدىگىمىزدى قورعاۋدى تاريح پەن بولاشاق ۇرپاقتار الدىنداعى پارىزىمىز دەگەن ورىندى تۇجىرىم جاسالعاندىعى ءبىزدىڭ ارقايسىمىزدىڭ ەل مەن ەل تاۋەلسىزدىگى ءۇشىن اسا جاۋاپتى ەكەندىگىمىزدى ۇعىندىرا تۇسەدى.
قازاقستاندى وركەندەتۋ مەن مەملەكەتتىڭ ورنىقتى دا تۇراقتى دامۋى ءۇشىن قاجەتتى بار جاعدايدىڭ جاسالعاندىعىن اتاپ كورسەتە وتىرىپ, «نۇر وتاننىڭ» ساياسي دوكتريناسى وركەندەۋ دەگەندى «بارلىق ازاماتتاردىڭ ءومىر ساپاسىن ۇدايى جاقسارتۋدى قامتاماسىز ەتەتىن ەكونوميكالىق دامۋدىڭ جوعارى قارقىنىنا قول جەتكىزۋ» دەپ تاني وتىرىپ, وسى ورنىقتى ەكونوميكا مەن قوعامدىق-ساياسي تۇراقتىلىقتىڭ ارقاۋى بولىپ تابىلاتىن قۋاتتى ورتا تاپتى قالىپتاستىرۋ سياقتى اسا ماڭىزدى مىندەتتى شەشۋگە ءوزىنىڭ مۇددەلى ەكەندىگىن جاريالادى دا, «ءبىز قازاقستاننىڭ ودان ءارى وركەندەي بەرۋى ءۇشىن جاۋاپكەرشىلىكتى وزىمىزگە جۇكتەيمىز», دەپ مالىمدەدى. مۇنى «نۇر وتان» پارتياسىنىڭ ەلباسىنىڭ, ءوز كوشباسشىسىنىڭ ساياسي باعىتى مەن ۇستانىمىنىڭ ابدەن دۇرىستىعىنا جانە دە ەلدى دامىتۋدىڭ «قازاقستان-2050» ستراتەگياسىن ويداعىداي جۇزەگە اسىرۋعا دەگەن بارلىق قازاقستاندىقتاردىڭ ىنتاسى مەن قۇلشىنىسىنا, ەل بىرلىگى مەن حالقىمىزدىڭ ىنتىماقشىل نيەت كۇشىنە سەنگەندىگى دەپ قاراستىرعانىمىز ابزال. ال «نۇر وتاننىڭ» سەنىمى – ەل سەنىمى!
ەل مەن حالىق تاعدىرى ءۇشىن جاۋاپكەرشىل بولۋدى بىزگە ەلباسى ءاردايىم ءۇيرەتىپ كەلەدى جانە سونىڭ تاماشا ۇلگىسىن كورسەتىپ تە كەلە جاتقاندىعى تالاس تۋدىرمايتىن تاريحي اقيقات. قازاقستان رەسپۋبليكاسىنىڭ تۇڭعىش پرەزيدەنتى – پارتيانىڭ نەگىزىن قالاۋشى نۇرسۇلتان نازارباەۆتىڭ وسى دوكترينادا ءبىزدىڭ, بارشا قازاقستاندىقتاردىڭ ساياسي يدەالى بولاتىندىعىن اتاپ كورسەتۋى دە تاريحي اقيقات! «ەلباسىنىڭ دانالىعى, گۋمانيزمى, مۇقالماس ەرىك-جىگەرى, بولاشاققا ۇمتىلىسى جانە حالقىنا شەكسىز بەرىلە قىزمەت ەتۋى ءبىز ءۇشىن دە, بولاشاق ۇرپاقتار ءۇشىن دە ارقاشان ۇزدىك ۇلگى بولا بەرمەك», دەگەن دوكتريناداعى وسى ءبىر اۋىز تۇجىرىمدى ءسوز ءار قازاقستاندىقتىڭ كوكەيىنە الدەقاشان بەرىك ورنىققاندىعى دا ءسوزسىز.
قازاقى تۇيسىك پەن ساناعا باق پەن داۋلەت ىنتىماعى جاراسقان جەرگە عانا داريدى دەگەن ۇعىمنىڭ بەرىك ورنىققاندىعى دا تالاسسىز. ساياسي دوكترينادا سول ىنتىماقتىڭ اۋەلى ءار وتباسىنان باستالاتىندىعى دا جانە سول بولاشاققا ۇمتىلىس پەن تالپىنىسىمىزدىڭ قازاقستاننىڭ ودان ءارى وركەندەۋىنىڭ اسا ماڭىزدى شارتى ەكەندىگى ايتىلادى. جانە دە «جاھاندانۋ داۋىرىندە ءوزىنىڭ تاريحىنىڭ, مادەنيەتى مەن ءتىلىنىڭ قادىرىنە جەتەتىن حالىق قانا تابىستى وركەندەي الادى», دەگەن تۇجىرىمدى العا تارتا وتىرىپ, «نۇر وتان» پارتياسىنىڭ دوكتريناسىندا «وتباسى جانە ءداستۇر» قاعيداتتارىندا قازاقستاندى مەكەندەگەن بارلىق ۇلتتاردىڭ وزىندىك ەرەكشەلىكتەرىن ساقتاي وتىرىپ, قازاق ءتىلىن, ءتول مادەنيەتىمىز بەن سالت-ءداستۇرىمىزدى دامىتۋ ءبىزدىڭ ستراتەگيالىق باسىمدىعىمىز بولىپ تابىلاتىندىعى دا ايقىندالادى. ەندىگى ارادا قازاقستاندىق قوعامدا وتباسى – ءبىزدىڭ بارلىق ادامي قۇندىلىقتارىمىزدى ساقتاۋدىڭ اسا ماڭىزدى ينستيتۋتىنا اينالۋمەن بىرگە, اتا-انانىڭ بالا الدىنداعى, بالانىڭ اتا-انا الدىنداعى ءوزارا جاۋاپكەرشىلىكتەرىن سەزىنەتىندەي تاربيە قالىپتاستىرۋ ءبىزدىڭ يدەولوگيامىزدىڭ نەگىزگى وزەگى بولۋى دا كەرەك. ويتكەنى, ۇلكەندى سىيلاۋ, ەڭبەكسۇيگىشتىك پەن بىلىمگە قۇشتارلىق اتا-انا تاربيەسىمەن وتباسىندا قالىپتاساتىندىعىن ۇمىتپاعانىمىز ءجون.
قازىرگىدەي جاھاندانۋ ۇردىسىندەگى مادەنيەتتەردىڭ ءوزارا كىرىگۋى جەدەلدەي تۇسكەن زامانداعى الەم كەلبەتىندە ءوزىمىزدىڭ حالىق ەسەبىندە ساقتالىپ قالۋىمىز ءۇشىن «ءبىز وزگەلەردىڭ جاقسى جاعىن بويىمىزعا سىڭىرە وتىرىپ, ءوزىمىزدىڭ مادەني ءتولتۋمالىعىمىزدى ساقتاي ءبىلۋىمىز قاجەت» دەگەن تۇجىرىم وتە ورىندى بولىپ كوڭىلگە ورنىققانىن ايتار ەدىك. وسى ورايدا پارتيا توراعاسى نۇرسۇلتان نازارباەۆتىڭ: «ءبىز قوعامىمىزدىڭ ەرەكشەلىكتەرىن ارتىقشىلىققا اينالدىرا بىلدىك. ارالۋاندىعىمىز – بايلىعىمىزعا, ءبىرلىگىمىز – تابىسىمىزعا اينالدى. وسىنى ۇلت زيالىلارى ۇنەمى ەستە ۇستاپ, جاستارعا ءاردايىم ىنتىماقتىڭ ۇلگىسىن كورسەتكەنى ءجون», دەگەن سەزدەگى وسى ءبىر اۋىز ءسوزىن قايتالاي وتىرىپ, مۇنى ارقايسىمىزدىڭ سانامىزعا سىڭىرە ءبىلۋ قاجەت دەگەن وي تۇيدىك.
دوكترينادا قۋاتتى ەكونوميكا قۇرۋ ارقىلى ادىلەتتى الەۋمەتتىك ساياسات ورنىقتىرۋداعى زياتكەر ۇلتقا جۇكتەلەر مىندەتتەر ايتىلادى دا جانە ول الەم بويىنشا ۇدەمەلى ەكونوميكالىق دامۋدىڭ وزەكتى شارتى – ءبىلىم مەن يننوۆاتسيا بولىپ تابىلادى دەلىنگەن قاعيدامەن ۇشتاستىرىلادى. زياتكەر ۇلتتىڭ نەگىزىن جاڭا ءبىلىم مەن سەرپىندى تەحنولوگيالاردى جانە تىڭ يدەيالار مەن ءبىلىمدى بويعا سىڭىرۋگە دايىن تۇراتىن, سونىمەن بىرگە, جاسامپازدىق دەڭگەيدە ويلاي بىلەتىن ءبىلىمدى دە كاسىبي ازاماتتار قۇرايتىندىعى بولسا, پارتيا ازاماتتارىمىزدىڭ زياتكەرلىك الەۋەتىن بارىنشا جۇزەگە اسىرۋ ءۇشىن ولارعا قولايلى جاعدايلار جانە يننوۆاتسيالىق ينفراقۇرىلىم جاساۋ قاجەتتىلىگىن دە سەزىنىپ وتىرعاندىعى قۋانتادى.
تاۋەلسىزدىك جىلدارى حالقىمىز رۋحىنىڭ قايتا ورلەگەنى دە انىق. سول رۋحتى قايتادان سەنىمدى ورلەتە تۇسەرلىك جاي دوكترينادا مەملەكەتتىك ءتىلدىڭ ەل بىرلىگىن ساقتاۋشى فاكتورى رەتىندە اتالۋىنا وراي ەلباسىنىڭ: «بۇل ماسەلەگە اسا دەن قوياتىن كەز كەلدى. قازاق ءتىلىن ءبىلۋ ازاماتتىق پارىزدى عانا ەمەس, ۇلتقا دەگەن قۇرمەتتى دە بىلدىرەدى», دەۋى ارقىلى ءبىزدىڭ ەندىگى تىلدىك ساياساتىمىز بەن ۇستانىمىمىزدى ايقىنداپ بەردى. جانە دە وسىعان قوسىمشا ەلباسى بۇل عاسىردى انا ءتىلىمىز بەن اتا ءداستۇرىمىزدىڭ, ۇلتتىق مادەنيەتىمىزدىڭ ماڭگى جاڭعىرۋ ءداۋىرى دەپ تاني وتىرىپ, «نۇر وتان» پارتياسىنا مەملەكەتتىك ءتىلدى نىعايتۋعا, قازاقتىڭ ءداستۇرى مەن مادەنيەتىن جاڭعىرتۋعا بايلانىستى قوعامدىق-ساياسي جۇمىستاردىڭ ءتيىمدى جۇيەسىن جاساۋدى دا تاپسىردى. بۇل ارادا پارتياعا ءبىزدىڭ كوپەتنوستى حالقىمىزدىڭ بىرلىگى ءۇشىن جوعارى جاۋاپكەرشىلىك جۇكتەلەتىندىگى دە ايتىلماي قالعان جوق.
«ءبىز بابالارىمىز سان عاسىرلار بويى اڭساعان ارمانعا قول جەتكىزگەنىمىزدى ماقتان ەتە ءبىلۋىمىز كەرەك. ۇلتىمىزدىڭ ۇلى تاريحىنىڭ جاڭا تاراۋى قۋاتتى دا تابىستى تاۋەلسىز مەملەكەتتىڭ شەجىرەسى بولىپ جازىلۋدا. ەلىمىز وسى جىلداردا ەرلىك پەن بىرلىكتىڭ ۇلگىسىن كورسەتتى. تاۋەلسىزدىكتىڭ قيىنشىلىقپەن كەلگەنىن, ونى ۇستاپ قالۋ وڭاي ەمەس ەكەندىگىن حالقىمىز ءبىلدى. وسىنى ءتۇسىنىپ وتىرعان, ءبىر جۇدىرىقتاي جۇمىلىپ وتىرعان حالقىما شىن جۇرەگىمنەن العىسىمدى ايتامىن. بىرتە-بىرتە بارلىق جاعداي تۇزەلەدى, بارلىق ماسەلە شەشىلەدى. بارلىعىمىز قولىمىزعا قونعان التىن قۇس –باقىتىمىزدى ساقتاي بىلەيىك, دەگەن ەلباسىنىڭ ايتقانىن ءححى عاسىردىڭ پارتياسى – «نۇر وتاننىڭ» ماڭگىلىك ەل بولۋ دوكتريناسىنىڭ التىن ارىپتەرمەن جازىلار تۇسى دەپ قابىلدايمىز!
جابال ەرعاليەۆ,
جازۋشى, قازاقستاننىڭ ەڭبەك سىڭىرگەن قايراتكەرى,
پارلامەنت سەناتىنىڭ دەپۋتاتى.
