28-29 قازاندا پاۆلوداردا پرەزيدەنت جانىنداعى جاستار ساياساتى جونىندەگى كەڭەستىڭ XVI كوشپەلى وتىرىسى بولىپ ءوتتى
پرەزيدەنت اكىمشىلىگى باسشىسىنىڭ ورىنباسارى, كەڭەس توراعاسى عابيدوللا ءابدىراحيموۆتىڭ قاتىسۋىمەن وتكەن بۇل جولعى جيىن ەلىمىزدەگى سپورتتىق ينفراقۇرىلىمداردى دامىتۋ مەن جاستاردى دەنەشىنىقتىرۋعا, سپورتقا باۋلۋ ماسەلەسىنە ارنالدى. شاراعا ورتالىق مەملەكەتتىك اتقارۋشى ورگانداردىڭ, سپورت جانە دەنەشىنىقتىرۋ اگەنتتىگىنىڭ وكىلدەرى, كەڭەس مۇشەلەرى, وبلىستاردىڭ جاستار ساياساتى ماسەلەلەرى ءجونىندەگى باسقارما باسشىلارى, ۇكىمەتتىك ەمەس ۇيىمداردىڭ جەتەكشىلەرى, جاستار قاتىستى.
28-29 قازاندا پاۆلوداردا پرەزيدەنت جانىنداعى جاستار ساياساتى جونىندەگى كەڭەستىڭ XVI كوشپەلى وتىرىسى بولىپ ءوتتى
پرەزيدەنت اكىمشىلىگى باسشىسىنىڭ ورىنباسارى, كەڭەس توراعاسى عابيدوللا ءابدىراحيموۆتىڭ قاتىسۋىمەن وتكەن بۇل جولعى جيىن ەلىمىزدەگى سپورتتىق ينفراقۇرىلىمداردى دامىتۋ مەن جاستاردى دەنەشىنىقتىرۋعا, سپورتقا باۋلۋ ماسەلەسىنە ارنالدى. شاراعا ورتالىق مەملەكەتتىك اتقارۋشى ورگانداردىڭ, سپورت جانە دەنەشىنىقتىرۋ اگەنتتىگىنىڭ وكىلدەرى, كەڭەس مۇشەلەرى, وبلىستاردىڭ جاستار ساياساتى ماسەلەلەرى ءجونىندەگى باسقارما باسشىلارى, ۇكىمەتتىك ەمەس ۇيىمداردىڭ جەتەكشىلەرى, جاستار قاتىستى.
جالپى, پرەزيدەنت جانىنداعى جاستار ساياساتى جونىندەگى كەڭەس 2008 جىلى ەلباسى جارلىعىمەن قۇرىلدى. وبلىس ورتالىعىندا وتكەن كەڭەستىڭ كوشپەلى وتىرىسى 5 جىلدىق مەرەيتويعا ارنالدى دەسە دە بولادى. وتىرىستىڭ قورىتىندى جيىنىنىڭ اشىلۋىندا بۇل جايىندا كەڭەس توراعاسى, پرەزيدەنت اكىمشىلىگى باسشىسىنىڭ ورىنباسارى عابيدوللا ءابدىراحيموۆ ايتىپ ءوتتى. بۇل ءبىزدىڭ بيىلعى جىلى وتكىزىپ وتىرعان ءۇشىنشى وتىرىسىمىز. ەلباسى ءوز جولداۋىندا مەملەكەت الدىنا الەمدەگى 30 ەلدىڭ قاتارىنا قوسىلۋ ءمىندەتىن قويعانى بەلگىلى. وسى اۋقىمدى ماقساتقا قول جەتكىزۋدە ەلباسىنىڭ ساليقالى ساياساتىن وڭتايلى جۇرگىزۋدىڭ ماڭىزى زور. جولداۋدا ايتىلعانداي, حالىقتىڭ دەنساۋلىعى جاقسارعاندا عانا بولاشاعىمىز ءماندى بولماق. مەملەكەتىمىزدىڭ دەنەشىنىقتىرۋ مەن سپورتقا اسا ءمان بەرۋىنىڭ استارىندا ۇلكەن ماعىنا بار, دەدى ول.
جاستار ساياساتى جونىندەگى كەڭەستە جاستاردىڭ مۇددەسىنە قاتىستى ءتۇرلى سالاداعى ورتالىق مەملەكەتتىك ورگانداردىڭ دا ەسەبىن تىڭداۋ تاجىريبەسى ەنگىزىلگەنى بەلگىلى. ويتكەنى, جاستار ساياساتىنىڭ ماسەلەلەرىنە بۇگىندە بۇكىل الەم نازار اۋدارۋدا. جاستار ساياساتىنا ەلباسى نۇرسۇلتان نازارباەۆتىڭ «قازاقستان-2050» ستراتەگياسىندا دا باسا نازار اۋدارىلعان. سونىمەن قاتار, ەلباسى تاپسىرماسىمەن «جاستار» عىلىمي-زەرتتەۋ ورتالىعى قۇرىلىپ, ەل ۇكىمەتىنىڭ قاۋلىسىمەن «قازاقستان-2020: بولاشاققا جول» اتتى مەملەكەتتىك جاستار ساياساتىنىڭ 2020 جىلعا دەيىنگى تۇجىرىمداماسى قابىلداندى. وسى ورايدا, جاستاردى جۇمىسقا ورنالاستىرۋ جانە باسپانامەن قامتۋ ماقساتىندا «جۇمىسپەن قامتۋ-2020», «جاسىل ەل», «ديپلوممەن – اۋىلعا!», «جاستار پراكتيكاسى» جوبالارى جۇزەگە اسىپ كەلەدى.
جۋىردا وتكەن «نۇر وتان» پارتياسىنىڭ كەزەكتەن تىس XV سەزىندە ەلباسى, پارتيا ءتوراعاسى جاستار ساياساتى بويىنشا جۇكتەلگەن تاپسىرما تولىق ورىندالماي وتىرعانىن ايتقان بولاتىن. مەملەكەت باسشىسى اتاپ كورسەتكەندەي, ءححى عاسىردا جاستاردى قولداۋشى پارتيا عانا كوشباسشىلىقتى ۇستاپ تۇرا الادى. ال «جاس وتاننىڭ» 200 مىڭنان استام جاستىڭ باسىن بىرىكتىرىپ وتىرعانى, ءبىر جىل بۇرىنعى باسقوسۋدا جاستارمەن جۇمىس بويىنشا كەشەندى جوسپار ۇسىنىلعانى تاعى ءمالىم. «اشىعىن ايتايىن, مەنىڭ تاپسىرمالارىم جارتىلاي عانا ورىندالىپ وتىر. ماسەلەن, ۇكىمەت 2020 جىلعا دەيىنگى مەملەكەتتىك جاستار ساياساتىنىڭ تۇجىرىمداماسىن بەكىتتى. الايدا, ونى جۇزەگە اسىرۋ ءىس-شارالارى بويىنشا قارجىلاندىرۋدىڭ كولەمى انىقتالماعان. بارلىعى باعدارلامالاردىڭ اكىمشىلىكتەرىنە كەلىسىلگەن شەك بويىنشا بەرىلگەن. ال بۇل شەكتى قاراجات تۇتىنۋشىعا جەتە مە, جوق پا؟ بۇل بەلگىسىز. تاعى ءبىر مىسال, مەنىڭ تاپسىرمام بويىنشا ءبىلىم مينيسترلىگى «جاستار» عىلىمي-زەرتتەۋ ورتالىعىن قۇردى. الايدا, قارجىلاندىرۋدىڭ جوقتىعىنان بۇل دا تولىققاندى جۇمىس ىستەي الماي وتىر», دەدى ەلباسى ءوزىنىڭ سوزىندە.
ەلباسى سونداي-اق وڭىرلەردە جاستار رەسۋرستىق ورتالىقتارىن قۇرۋ جۇمىسى سوزىلىپ كەتكەنىن, استانا, الماتى, اقتوبە قالالارىندا, شىعىس قازاقستان, سولتۇستىك قازاقستان, قىزىلوردا وبلىستارىندا بۇل جۇمىس مۇلدەم باستالماعانىن كولدەنەڭ تارتتى. ايتپاقشى, «جاستارعا قىزمەت كورسەتۋ ورتالىعى» العاش رەت بىلتىر ءبىزدىڭ وبلىس ورتالىعىندا اشىلدى. ال بيىلعى جىلدىڭ التى ايىندا وڭىردە 1500 جاس مامان جۇمىسقا ورنالاسىپتى. ەندى, مىنە, وسى ورتالىقتىڭ جۇمىسىمەن, اتقاراتىن قىزمەتىمەن تانىسۋ ءۇشىن ەلىمىزدىڭ ءار وبلىسىنان جاستار جينالىپ وتىر. جاستاردى ەڭبەككە باۋلۋ, سپورتقا بەيىمدەۋ, مادەني جانە رۋحاني تاربيە بەرۋ بويىنشا وڭىردە جۇيەلى جۇمىستار اتقارىلۋدا. جاڭاشىل جوبالار بارلىق سالانى قامتۋدا. جاستار ساياساتى جونىندەگى باسقارما قۇرىلدى. جاستار باستامالارىن دامىتۋ ورتالىعى دا ءوز جۇمىسىن باستادى. «رەگيون.kz» اتتى ەكى تىلدە وبلىستىق جاستار گازەتى شىعىپ تۇرادى. كورشىلەس رەسەيلىك جاستارمەن كەزدەسۋ ورتالىعى جۇمىس جاسايدى. جاستار ساياساتىنىڭ ۇلكەن جولعا تۇسۋىنە ستۋدەنت جاستارمەن جۇمىس جاساۋدا ءتاجىريبەسى بار سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتتىڭ بۇرىنعى رەكتورى, قازىرگى وبلىس اكىمى ەرلان ارىن ءوزى باستاما جاساپ, قولداۋ كورسەتۋدە.
بۇل ماسەلەلەر وبلىس ورتالىعىنداعى «دوستىق» ۇيىندە وتكەن كەڭەستىڭ كوشپەلى وتىرىسىندا جان-جاقتى ايتىلدى. كەڭەس مۇشەلەرى جاستاردى الاڭداتىپ وتىرعان ماسەلەلەرمەن تانىسىپ, ولاردىڭ يدەيالارىن, ويلارىن ءبىلدى. مادەنيەت جانە اقپارات ۆيتسە-ءمينيسترى, پرەزيدەنت جانىنداعى جاستار ساياساتى جونىندەگى كەڭەستىڭ مۇشەسى ارمان قىرىقباەۆتىڭ ايتۋىنشا, نەگىزگى ماقسات – جەر-جەردەگى جاستارمەن كوزبە-كوز جۇزدەسىپ, ولاردىڭ وي-پىكىرلەرىن ءبىلۋ, وتىنىشتەرىن تىڭداۋ. ءبىز ءجۇز رەت اڭگىمە ايتقانشا, ءبىر رەت كوزبەن كورىپ, اڭگىمەلەسسەك دەگەن ويمەن جينالىپ وتىرمىز. جاستارعا بايلانىستى مەملەكەتتىك ساياساتتىڭ نەگىزگى باعىتتارىنىڭ ءبىرى – دەنە تاربيەسى جانە سپورتپەن اينالىساتىن جاستاردىڭ سانىن ارتتىرۋ, اسىرەسە, اۋىل جاستارىنا, مۇگەدەكتەر مەن از قامتاماسىز ەتىلگەن وتباسى بالالارىنا سپورتتىق جانە سپورتتىق-ساۋىقتىرۋ قىزمەتتەرىنىڭ قولجەتىمدىلىگىن قامتاماسىز ەتۋ.
سپورت جانە دەنەشىنىقتىرۋ اگەنتتىگى توراعاسىنىڭ ورىنباسارى تاستانبەك ەسەنتاەۆتىڭ ايتۋىنشا, ادام دەنساۋلىعى جاقسى بولۋىنىڭ 50 پايىزى سالاماتتى ءومىر سالتىنا بايلانىستى. سپورت جانە دەنەشىنىقتىرۋ – ءبىزدىڭ مەملەكەتتىك جاستار ساياساتىنىڭ ماڭىزدى باعىتى. ياعني, جاستارعا قاتىستى ماسەلەلەردىڭ بارلىعى دا شەشىمىن تابادى دەگەن ءسوز. بۇل ءۇشىن مەملەكەت قارجىلاي كومەك كورسەتۋگە دايار. باستىسى – ءار جاستىڭ بويىندا سپورتقا, جاقسى ءومىر سۇرۋگە دەگەن تالپىنىستى وياتۋ.
ال اتالعان اگەنتتىكتىڭ ءمالىمەتتەرى بويىنشا, سپورتتىق ءۇيىرمەلەردە شۇعىلداناتىن بالالار مەن جاسوسپىرىمدەردى قامتۋ كولەمى 11 پايىزدى عانا قۇرايدى. وكىنىشكە قاراي, بۇگىنگى كۇنى ەلىمىزدەگى 2 مىڭعا جۋىق مەكتەپتە ستاندارتتى سپورت زالدارى جوق كورىنەدى. ياعني, وقۋشىلاردىڭ 61 پايىزى عانا دەنەشىنىقتىرۋمەن اينالىسا الادى دەگەن ءسوز. سوندىقتان ماسەلەنىڭ وسى جاعىنا ءمان بەرىلۋى كەرەك.
جيىن كۇندەرى «ميلليونعا باعالانعان يدەيا» وڭىرلىك جوباسى دا ءوز جۇمىسىن باستادى. مىسالى, 18 جاستاعى ءيمانجۇسىپ دوستارىمەن بىرگە قۋىرشاقتار, ويىنشىق جيھازدار جاسايدى. ولاردىڭ ماقساتى – كىشكەنتايلاردى «باربيمەن» ەمەس, قازاقتىڭ ۇلتتىق ناقىشتاعى ونەرىمەن تانىستىرۋ. قولدا قارجى بولسا, وسى ماقساتتا ءتۇرلى ويىنشىقتار جاساماقشى ەكەن. ءبىر قۋانتارلىعى, جاستاردىڭ كوپشىلىگى قازىرگى كۇندەرى بۇكىل عالام الاڭداپ وتىرعان جاھاندىق تاقىرىپتارعا وراي «جاسىل ەنەرگەتيكا» جانە «ەكولوگيا» تاقىرىپتارى بويىنشا وزدەرى جاساعان جوبالارىن, ۇسىنىستارىن الا كەلىپتى. ەكى كۇندىك جيىن بارىسىندا كەڭەس مۇشەلەرى اۋىل جاستارىمەن, جۇمىسشى جاستارمەن, بيۋدجەتتىك سالا قىزمەتكەرلەرىمەن, جاس كاسىپكەرلەرمەن كەزدەسۋلەر وتكىزدى.
مەكتەپ سپورتى فەدەراتسياسىنىڭ پرەزيدەنتى بولىپ كەڭەستىڭ توراعاسى عابيدوللا ءابدىراحيموۆ سايلاندى. ءسويتىپ, كوشپەلى جيىن بارىسىندا ەل ۇكىمەتىنە سپورتتىق ينفراقۇرىلىمداردى جانە جاستار اراسىندا كوپشىلىك سپورتتى دامىتۋ بويىنشا ۇسىنىستار جىبەرىلدى. جەر-جەردەگى جاستار ساياساتى جونىندەگى جۇمىستاردىڭ ءتيىمدى تاجىريبەلەرى ارقىلى پىكىر الماسۋ مەن جۇمىستى ۇيلەستىرۋ ماقساتىندا اتالعان ۇيىمداردىڭ جەتەكشىلەرىنە سەمينار-ترەنينگتەر جۇرگىزىلدى.
دەنەشىنىقتىرۋ جانە سپورتپەن شۇعىلدانۋعا ىنتالاندىرۋ, سپورتتىق شەبەرلىكتى ارتتىرۋ, جوعارى وقۋ ورىندارى ستۋدەنتتەرىنىڭ اراسىنداعى دوستىق بايلانىستى نىعايتۋ ماقساتىندا 16-27 قازان ارالىعىندا وبلىس اكىمدىگىنىڭ قولداۋىمەن ۆولەيبول, باسكەتبول, فۋتبول, توعىزقۇمالاق, قازاق كۇرەسى سياقتى سپورتتىڭ بەس تۇرىنەن ۋنيۆەرسيادا وتكەن بولاتىن. جەڭىمپازدار مەن جۇلدەگەرلەرگە ديپلومدار, مەدالدار مەن ۋنيۆەرسيادا كۋبوكتارىن پرەزيدەنت اكىمشىلىگى باسشىسىنىڭ ورىنباسارى عابيدوللا ءابدىراحيموۆ پەن وبلىس اكىمى ەرلان ارىن تابىستادى.
فاريدا بىقاي,
«ەگەمەن قازاقستان».
پاۆلودار.
